తెలంగాణలో మరోసారి భారీగా డ్రగ్స్(Drugs) పట్టుబడ్డాయి. సంగారెడ్డి జిల్లా మొగుడంపల్లి మండలం మాడిగి అంతర్రాష్ట్ర చెక్‌పోస్టు వద్ద తనిఖీల్లో డ్రగ్స్ తరలిస్తున్న లారీని స్వాధీనం చేసుకున్నారు. ఓ లారీలో డ్రగ్స్ తరలిస్తున్నారనే ముందస్తు సమాచారంతో డీఆర్‌ఐ, నార్కొటిక్‌ డ్రగ్స్ కంట్రోల్‌, సెంట్రల్‌ విజిలెన్స్‌ అధికారులు ఈ తనిఖీలు నిర్వహించారు. డ్రగ్స్ తరలిస్తున్న లారీని ఆపగా.. డ్రైవర్‌, క్లీనర్‌ పరారయ్యారు. లారీని చిరాగ్‌పల్లి పోలీసు స్టేషన్‌కు తరలించారు. పట్టుబడిన డ్రగ్స్ విలువ రూ.100 కోట్లు ఉంటుందని సమాచారం. ఈ మాదక ద్రవ్యాలను ఏపీలోని కాకినాడ పోర్టు(Kakinada Port) నుంచి ముంబై తరలిస్తున్నట్లు అధికారులు గుర్తించారు.
కాగా కాకినాడ పోర్టులో రేషన్ బియ్యం స్మగ్లింగ్ ఇటీవల సంచలనంగా మారిన సంగతి తెలిసిందే. ఏపీ డిప్యూటీ సీఎం పవన్ కళ్యాణ్‌(Pawan Kalyan) బియ్యం స్మగ్లింగ్ చేస్తున్న షిప్‌ అడ్డుకుని సీజ్ చేయించిన సంగతి తెలిసిందే. ఆ సమయంలో రేషన్ బియ్యమే కాకుండా డ్రగ్స్, గంజాయి స్మగ్లింగ్ కూడా జరిగే అవకాశం ఉందని హెచ్చరించారు. అయితే ఇప్పుడు అదే పోర్టు నుంచి లారీలో డ్రగ్స్ తరలిస్తూ పట్టుబడటం తీవ్ర చర్చనీయాంశంగా మారింది.
