GHMC sanitation complaint WhatsApp number : మీ వీధిలో చెత్త పేరుకుపోయిందా? చెత్త కుండీలు నిండిపోయి దుర్వాసన వస్తోందా? ఈ సమస్యను ఎవరికి చెప్పాలో, ఎలా పరిష్కరించుకోవాలో తెలియక ఇబ్బంది పడుతున్నారా? అయితే, మీ కోసమే ఈ శుభవార్త. భాగ్యనగర పారిశుద్ధ్య సమస్యలకు చెక్ పెట్టేందుకు, గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) ఓ సరికొత్త, సులభమైన పరిష్కారంతో ముందుకొచ్చింది. ఇకపై, అధికారుల చుట్టూ తిరగాల్సిన పనిలేదు, గంటల తరబడి ఫోన్లు చేయాల్సిన అవసరం లేదు. మీ అరచేతిలో ఉన్న స్మార్ట్‌ఫోన్‌తో ఒక్క వాట్సాప్ మెసేజ్ పెడితే చాలు, మీ సమస్య పరిష్కారమవుతుంది.
పెరుగుతున్న నగరం.. పేరుకుపోతున్న చెత్త: హైదరాబాద్ మహానగరం శరవేగంగా విస్తరిస్తోంది. జనాభాతో పాటు చెత్త సమస్య కూడా అదే స్థాయిలో పెరుగుతోంది. బస్తీల్లో సుమారు 20 శాతం మంది, నెలకు రూ.100 చెల్లించడం భారంగా భావించి, ఇంటింటికీ వచ్చే స్వచ్ఛ ఆటోలకు చెత్తను ఇవ్వడం లేదు. ప్లాస్టిక్ కవర్లలో చెత్తను నింపి, రోడ్లపై, ఖాళీ ప్రదేశాల్లో పడేస్తున్నారు. దీనివల్ల నగరంలో పారిశుద్ధ్యం పడకేయడమే కాకుండా, ఇటీవల కురిసిన వర్షాలకు నాలాలు పూడుకుపోయి, వరదలకు ప్రధాన కారణంగా మారుతోంది.
వాట్సాప్‌తో సులభమైన ఫిర్యాదు: ఈ సమస్యకు అడ్డుకట్ట వేసేందుకు, కేవలం పారిశుద్ధ్య సంబంధిత ఫిర్యాదుల కోసమే జీహెచ్‌ఎంసీ ప్రత్యేకంగా ఒక వాట్సాప్ నంబర్‌ను అందుబాటులోకి తెచ్చింది.
ఫిర్యాదు చేసే విధానం: ముందుగా 81259 66586 అనే నంబర్‌ను మీ సెల్‌ఫోన్‌లో సేవ్ చేసుకోండి. ఆ నంబర్‌కు వాట్సాప్ ద్వారా ‘హాయ్’ (Hi) అని మెసేజ్ పంపండి. వెంటనే, జీహెచ్‌ఎంసీ నుంచి ‘నమస్తే’ అంటూ ఒక లింక్‌తో కూడిన ప్రత్యుత్తరం వస్తుంది. ఆ లింక్‌పై క్లిక్ చేయగానే, ఒక ఫిర్యాదు పత్రం (Complaint Page) ఓపెన్ అవుతుంది. అందులో, సమస్య ఉన్న ప్రాంతం యొక్క ఫొటోను అప్‌లోడ్ చేసి, కచ్చితమైన లొకేషన్‌ను, పూర్తి వివరాలను నమోదు చేసి పంపించాలి. మీ ఫిర్యాదు సంబంధిత పారిశుద్ధ్య అధికారికి చేరి, తక్షణమే చర్యలు తీసుకుంటారు.
ఇప్పటికే ఉన్న మార్గాలు: కేవలం పారిశుద్ధ్యం కోసమే ఈ కొత్త వాట్సాప్ నంబర్‌ను ప్రవేశపెట్టినప్పటికీ, ఇతర సమస్యల కోసం పౌరులు ‘మై జీహెచ్‌ఎంసీ’ (My GHMC) మొబైల్ యాప్, సామాజిక మాధ్యమం ఎక్స్ (ట్విట్టర్) (@GHMConline), కంట్రోల్ రూమ్ నంబర్ 040 2111 1111 ద్వారా కూడా తమ ఫిర్యాదులను నమోదు చేయవచ్చు.
ప్రజల బాధ్యత కూడా ముఖ్యం: అధికారులు ఎన్ని చర్యలు తీసుకున్నా, ప్రజల భాగస్వామ్యం, బాధ్యత లేకుండా నగరాన్ని పరిశుభ్రంగా ఉంచడం అసాధ్యం. చెత్తను రోడ్లపై పడవేయకుండా, స్వచ్ఛ ఆటోలకు అందించడం, ప్లాస్టిక్ వాడకాన్ని తగ్గించడం వంటివి మనందరి బాధ్యత.
