Family-centric mental wellness app : మనసు బాగోలేదని చెప్పుకోవడానికి సంకోచం.. సలహా ఇచ్చే నిపుణుల కొరత.. ఇది భారతదేశంలో లక్షలాది కుటుంబాలు నిశ్శబ్దంగా ఎదుర్కొంటున్న మానసిక ఆరోగ్య సంక్షోభం. దేశంలో ప్రతి లక్ష జనాభాకు ఒక్క మనోరోగ వైద్యుడు కూడా అందుబాటులో లేని దయనీయ పరిస్థితుల్లో, సాంకేతికత ఓ సరికొత్త ఆశాకిరణంగా ముందుకొచ్చింది. ఆస్ట్రేలియాకు చెందిన ప్రముఖ సైకలాజికల్ వెల్‌నెస్ స్టార్టప్ ‘గివ్ మీ 5’ (GM5), ఏకంగా $5 మిలియన్ AUD (సుమారు రూ.27 కోట్లు) పెట్టుబడితో, భారతదేశపు మొట్టమొదటి ‘కుటుంబ & కమ్యూనిటీ-కేంద్రిత’ వెల్‌నెస్ యాప్‌ను ఆవిష్కరించింది. ఇప్పటికే పాఠశాలలు, స్వచ్ఛంద సంస్థలతో పనిచేస్తూ B2B రంగంలో విజయం సాధించిన ఈ సంస్థ, ఇప్పుడు నేరుగా వినియోగదారుల చెంతకు చేరనుంది. అసలు ఈ యాప్ ఎలా పనిచేస్తుంది…? ఇది మానసిక ఆరోగ్య సేవల్లో ఉన్న అగాధాన్ని ఎలా పూడ్చనుంది..?

అసలు సమస్య ఎక్కడ : భారతదేశంలో మానసిక ఆరోగ్య నిపుణుల కొరత తీవ్రంగా ఉంది. ప్రతి 100,000 మందికి కేవలం 0.75 మంది సైకియాట్రిస్టులు, 0.7 మంది సైకాలజిస్టులు మాత్రమే ఉన్నారు. దీనివల్ల చాలా కుటుంబాలు తమ భావోద్వేగ సవాళ్లను మౌనంగా భరిస్తున్నాయి. సహాయం కోరాలనే ఆలోచన ఉన్నా, సరైన వేదిక లేక వెనుకడుగు వేస్తున్నాయి. ఈ వాస్తవాన్ని మార్చే లక్ష్యంతో, మనస్తత్వ నిపుణులచే రూపొందించబడిన GM5 యాప్, ఒక సురక్షితమైన, గోప్యమైన, సంకోచం లేని వేదికను అందిస్తోంది.

విశ్వసనీయ నేస్తంలా GM5 యాప్ : ఆగస్టు 2019లో డాక్టర్ లిసా ఫాహే OAM, బ్రెండన్ ఫాహే స్థాపించిన GM5, ఇప్పటికే అమెరికా, ఆస్ట్రేలియా, కెనడా వంటి దేశాల్లో విజయవంతంగా పనిచేస్తోంది. భారతదేశంలోనూ కొన్ని ప్రముఖ స్వచ్ఛంద సంస్థలతో కలిసి 5,000 మందికి పైగా విద్యార్థులకు మానసిక ఆరోగ్య కార్యక్రమాల ద్వారా సేవలందించింది. ఈ క్షేత్రస్థాయి అనుభవంతో, భారతీయుల అవసరాలకు అనుగుణంగా ఈ యాప్‌ను తీర్చిదిద్దారు.

కుటుంబమే కేంద్రంగా: ఈ యాప్ ద్వారా వినియోగదారులు తమ కుటుంబ సభ్యులు, స్నేహితులు, నిపుణులతో ఒక విశ్వసనీయ మద్దతు బృందాన్ని (Trusted Support Circle) ఏర్పాటు చేసుకోవచ్చు.

స్వీయ పర్యవేక్షణ: తమ భావోద్వేగాలను, మానసిక స్థితిని ఎప్పటికప్పుడు ట్రాక్ చేసుకునేందుకు, లక్ష్యాలను నిర్దేశించుకునేందుకు ఇది సహాయపడుతుంది.
భద్రతా ప్రణాళిక: ప్రతికూల ఆలోచనలు వచ్చినప్పుడు అనుసరించాల్సిన వ్యక్తిగత భద్రతా ప్రణాళికను (Wellness Safety Plan) రూపొందించుకోవచ్చు.
అత్యవసర సహాయం: వన్-ట్యాప్ SOS బటన్‌తో అత్యవసర పరిచయాలకు వెంటనే సమాచారం పంపవచ్చు. పూర్తి ఎండ్-టు-ఎండ్ ఎన్‌క్రిప్షన్ ద్వారా సంభాషణలు అత్యంత గోప్యంగా ఉంటాయి.

వ్యవస్థాపకుల మాటల్లో : ఈ సందర్భంగా యాప్ వ్యవస్థాపకురాలు, సీఈఓ డాక్టర్ లిసా ఫాహే మాట్లాడుతూ, “భారతీయ కుటుంబాలు ఒకరికొకరు అండగా నిలవాలనుకుంటాయి, కానీ ఎలా మద్దతు ఇవ్వాలో వారికి తెలియదు. సమస్యలు పెద్దవి కాకముందే, ఒకరి యోగక్షేమాలను ఒకరు తెలుసుకునేందుకు GM5 ఒక సులభమైన మార్గాన్ని అందిస్తుంది. మా సాంకేతికత, విద్య, ప్రైవేట్ సందేశాల ద్వారా ప్రతి ఒక్కరూ తమ భావోద్వేగాలను, ఒకరినొకరు బాగా అర్థం చేసుకునే సాధనాలను పొందుతారు. ఇది ఒక ‘కమ్యూనిటీ ఆఫ్ కేర్’ను ప్రోత్సహిస్తుంది,” అని తెలిపారు.
సంస్థ ఛైర్మన్, బ్రెండన్ ఫాహే మాట్లాడుతూ, “భారతదేశం డిజిటల్‌గా ఎంత ముందున్నా, భావోద్వేగ మద్దతు ఇంకా చాలా ఇళ్లకు చేరలేదు. అందుకే మేము విశ్వాసాన్ని నిర్మించడానికి చిన్నగా ప్రారంభిస్తున్నాం. తొలి 500 మంది వినియోగదారుల అనుభవాల ద్వారా యాప్‌ను మెరుగుపరిచి, ప్రతి కుటుంబానికి నమ్మకమైన నేస్తంగా మార్చడమే మా లక్ష్యం,” అని అన్నారు.

తొలి 500 మందికి ఉచిత యాక్సెస్ : ప్రస్తుతం బీటా దశలో ఉన్న ఈ యాప్‌ను తొలి 500 మంది వినియోగదారులకు ఉచితంగా అందిస్తున్నారు. ఆసక్తి ఉన్నవారు GM5 అధికారిక వెబ్‌సైట్‌ను సందర్శించి, సైన్ అప్ చేయడం ద్వారా యాప్ డౌన్‌లోడ్ లింక్‌ను తమ ఇమెయిల్‌కు పొందవచ్చు. నిపుణుల కొరతను అధిగమించి, ప్రతి ఇంటికీ మానసిక ఆరోగ్య మద్దతును అందించాలనే ఈ వినూత్న ప్రయత్నం ఏ మేరకు విజయవంతమవుతుందో వేచి చూడాలి.