Journalists Safety: జర్నలిస్టుల రక్షణ కోసం తెలంగాణ ప్రభుత్వం కీలక నిర్ణయం తీసుకుంది. రాష్ట్రంలో జర్నలిస్టులపై జరుగుతున్న దాడుల కేసులను విచారించడం, వారి రక్షణకు తగిన చర్యలు చేపట్టడం లక్ష్యంగా ముందడుగేసింది. ఈ మేరకు ప్రధాన కార్యదర్శి కె. రామకృష్ణ రావు ఉన్నత స్థాయి కమిటీ ఏర్పాటుపై అధికారిక ఉత్తర్వులు జారీ చేశారు. జర్నలిస్టు సంఘాల విజ్ఞప్తుల మేరకు ప్రభుత్వం ఈ నిర్ణయం తీసుకుంది. ఈ ‘హై పవర్ కమిటీ’కి రాష్ట్ర సమాచార, పౌరసంబంధాల శాఖా మంత్రి అధ్యక్షత వహిస్తారు. కమిటీలో కీలక ప్రభుత్వ ఉన్నతాధికారులు సభ్యులుగా ఉండనున్నారు.
జర్నలిస్ట్ సంఘాలకు సైతం చోటు: ప్రభుత్వ అధికారులతో పాటు రాష్ట్రంలోని ప్రముఖ జర్నలిస్ట్ సంఘాల ప్రతినిధులకు సైతం కమిటీలో స్థానం కల్పించే విధంగా.. రేవంత్ సర్కార్‌ ఉత్తర్వులు జారీ చేసింది. తెలంగాణ యూనియన్ ఆఫ్ వర్కింగ్ జర్నలిస్ట్స్ , తెలంగాణ స్టేట్ యూనియన్ ఆఫ్ వర్కింగ్ జర్నలిస్ట్స్, తెలంగాణ వర్కింగ్ జర్నలిస్ట్స్ ఫెడరేషన్, తెలంగాణ అసోసియేషన్ ఆఫ్ ఎలక్ట్రానిక్ మీడియా జర్నలిస్ట్స్ , తెలంగాణ ఎలక్ట్రానిక్ మీడియా జర్నలిస్ట్స్ యూనియన్ సహా మొత్తం 8 ప్రముఖ మీడియా యూనియన్ల ప్రతినిధులు ఇందులో సభ్యులుగా ఉంటారు.
కమిటీ విధివిధానాలు: ప్రభుత్వం జారీ చేసిన ఉత్తర్వుల ప్రకారం ఈ కమిటీ రెండేళ్ల కాలం పాటు పనిచేస్తుంది. ఈ హై పవర్ కమిటీ జర్నలిస్టులపై జరిగిన దాడులు, దౌర్జన్యాలకు సంబంధించిన ఫిర్యాదులను స్వీకరిస్తుంది. అంతే కాకుండా వాటిపై లోతుగా విచారణ జరుపుతుంది. విచారణ అనంతరం తక్షణమే తీసుకోవాల్సిన చర్యలపై ప్రభుత్వానికి నివేదిక రూపంలో సిఫార్సులు అందజేస్తుంది. భవిష్యత్తులో ఎలాంటి దాడులు జరగకుండా నివారించడానికి చేపట్టాల్సిన చర్యలను సైతం కమిటీ సూచిస్తుంది. కమిటీ సిఫార్సుల మేరకు ప్రభుత్వం తదుపరి చర్యలు తీసుకోనుంది. రాష్ట్రంలో మీడియా సిబ్బందికి మరింత సురక్షితమైన వాతావరణాన్ని కల్పించడంలో ఈ కమిటీ కీలక పాత్ర పోషించనుంది.
కమిటీలో అధికారిక సభ్యులు:
- హోం శాఖ ముఖ్య కార్యదర్శి
- పొలిటికల్ విభాగం ముఖ్య కార్యదర్శి
- సాధారణ పరిపాలన శాఖ ముఖ్య కార్యదర్శి
- అదనపు డైరెక్టర్ జనరల్ ఆఫ్ పోలీస్ (లా అండ్ ఆర్డర్)
- సమాచార, పౌరసంబంధాల శాఖ అదనపు డైరెక్టర్/డైరెక్టర్ మెంబర్-కన్వీనర్‌గా వ్యవహరిస్తారు.
