Hyderabad Booming In Cosmetic Industry : ఒకప్పుడు గుసగుసలుగా, నలుగురిలో చెప్పుకోవడానికి సంకోచించే సౌందర్య చికిత్సల గురించి నేడు బహిరంగంగా చర్చ జరుగుతోంది. సోషల్ మీడియా ప్రభావం, మారుతున్న జీవనశైలితో తమ అందాన్ని మెరుగుపరుచుకోవాలనే ఆకాంక్ష సర్వసాధారణమైంది. ఈ నేపథ్యంలో, అద్భుతమైన వైద్య సదుపాయాలు, నిపుణులైన సర్జన్లతో భాగ్యనగరం ఇప్పుడు కాస్మెటిక్, ఈస్తటిక్ చికిత్సలకు ప్రపంచస్థాయి గమ్యస్థానంగా అవతరించింది. కేవలం మన దేశం నుంచే కాకుండా, విదేశాల నుంచి కూడా ప్రజలు అందాన్ని ద్విగుణీకృతం చేసుకునేందుకు హైదరాబాద్ బాట పడుతున్నారు. అసలు హైదరాబాద్ ఈ రంగంలో ఇంతగా ఎలా అభివృద్ధి చెందింది..? తక్కువ ఖర్చుతో అంతర్జాతీయ స్థాయి వైద్యం ఎలా సాధ్యమవుతోంది..? ఈ సౌందర్య విప్లవం వెనుక ఉన్న కారణాలేంటి…?

అంతర్జాతీయ స్థాయికి హైదరాబాద్ అందాల ప్రస్థానం : గత దశాబ్ద కాలంలో హైదరాబాద్ సౌందర్య వైద్య రంగంలో ఒక విప్లవాత్మక మార్పును సంతరించుకుంది. కేవలం విలాసవంతమైనదిగా భావించిన కాస్మెటిక్ చికిత్సలు, ఇప్పుడు ఒక సాధారణ జీవనశైలి ఎంపికగా మారాయి. ఈ మార్పునకు అనేక అంశాలు దోహదం చేశాయి.

అందుబాటులో అంతర్జాతీయ ప్రమాణాలు: సింగపూర్, దుబాయ్ వంటి దేశాలతో పోల్చదగిన చికిత్సలను హైదరాబాద్‌లోని ఆసుపత్రులు అందిస్తున్నాయి, అదీ గణనీయంగా తక్కువ ఖర్చుతో. అత్యాధునిక రోబోటిక్-అసిస్టెడ్ సిస్టమ్స్, హై-ప్రెసిషన్ ఇమేజింగ్ టూల్స్ వంటి టెక్నాలజీని ఉపయోగించడం ద్వారా ప్రపంచ స్థాయి భద్రత, సంరక్షణ ప్రమాణాలను ఇక్కడి ఆసుపత్రులు పాటిస్తున్నాయి.

నిపుణులైన వైద్యుల బృందం: నగరంలో అంతర్జాతీయ శిక్షణ, దశాబ్దాల అనుభవం కలిగిన కాస్మెటిక్, ప్లాస్టిక్ సర్జన్ల బృందం అందుబాటులో ఉంది. వీరి నైపుణ్యం క్లిష్టమైన సర్జరీలను కూడా సులభంగా పూర్తి చేయడానికి దోహదపడుతుంది.

విస్తృత శ్రేణి చికిత్సలు: ముక్కు ఆకృతిని మార్చే రైనోప్లాస్టీ, లైపోసక్షన్, బ్రెస్ట్ ఆగ్మెంటేషన్ వంటి సర్జికల్ విధానాల నుండి బొటాక్స్, డెర్మల్ ఫిల్లర్స్, లేజర్ థెరపీ వంటి నాన్-సర్జికల్ చికిత్సల వరకు అనేక రకాల సేవలు ఇక్కడ అందుబాటులో ఉన్నాయి. ముఖ్యంగా హెయిర్ ట్రాన్స్‌ప్లాంట్ చికిత్సలకు హైదరాబాద్ ప్రసిద్ధి చెందింది.

ప్రభుత్వ ప్రోత్సాహం: తెలంగాణ ప్రభుత్వం మెడికల్ టూరిజాన్ని ప్రోత్సహించడానికి ప్రత్యేక దృష్టి సారించింది. ఇందులో భాగంగా “తెలంగాణ రైజింగ్ 2047” విజన్ డాక్యుమెంట్‌లో మెడికల్ టూరిజానికి ప్రాధాన్యత కల్పించనున్నట్లు ప్రభుత్వం ప్రకటించింది. విమానాశ్రయం సమీపంలో వెయ్యి ఎకరాల్లో ప్రత్యేక హెల్త్ క్యాంపస్ ఏర్పాటు చేయాలనే ప్రణాళికలు కూడా ఉన్నాయి.

నిపుణుల మాటల్లో : ప్రముఖ కన్సల్టెంట్ డెర్మటాలజిస్ట్ రెనోవా హాస్పిటల్స్‌కు చెందిన డాక్టర్ కె. క్రాంతి వర్మ ప్రకారం, “అందుబాటు ధరలు, ప్రపంచ స్థాయి మౌలిక సదుపాయాలు, నైపుణ్యం కలిగిన నిపుణుల కలయిక హైదరాబాద్‌ను కాస్మెటిక్ హబ్‌గా మార్చింది.” ఇది కేవలం దేశీయ రోగులనే కాకుండా మధ్యప్రాచ్యం, ఆఫ్రికా, ఆగ్నేయాసియా దేశాల నుంచి కూడా మెడికల్ టూరిస్టులను ఆకర్షిస్తోందని ఆయన వివరించారు.

ప్రఖ్యాత ‘ది ఈస్తటిక్ క్లినిక్స్’ వ్యవస్థాపకులు, డైరెక్టర్ డాక్టర్ దేబ్రాజ్ షోమ్ మాట్లాడుతూ, “హైదరాబాద్ నా కెరీర్‌లో ఒక ప్రత్యేక స్థానాన్ని కలిగి ఉంది. 2009లో జూబ్లీహిల్స్‌లో ఒక టాప్-క్లాస్ ఈస్తటిక్ సర్జరీ సెంటర్‌ను ఏర్పాటు చేసినప్పుడు, నగరం ఈ రంగంలో ఇంకా ప్రారంభ దశలోనే ఉంది. కానీ నేడు, హైదరాబాద్ కాస్మెటిక్, డెర్మటాలజీ చికిత్సలకు ఒక ప్రధాన కేంద్రంగా స్థిరపడింది” అని తన అనుబంధాన్ని గుర్తు చేసుకున్నారు. రోగుల అంచనాలు కూడా మారాయని, వారు ఇప్పుడు కేవలం చికిత్స గురించి మాత్రమే కాకుండా, సమగ్రమైన సంప్రదింపులు, హెన్సివ్ ఆఫ్టర్‌కేర్ కోరుకుంటున్నారని ఆయన పేర్కొన్నారు.

మెడికల్ టూరిజం విజయ రహస్యం : హైదరాబాద్ మెడికల్ టూరిజంలో విజయం సాధించడానికి పకడ్బందీ ప్రణాళిక దోహదపడుతోంది.

సులభమైన ప్రయాణం: దేశం నడిబొడ్డున ఉండటం, జాతీయంగా, అంతర్జాతీయంగా విమాన సౌకర్యాలు మెరుగ్గా ఉండటం వల్ల రోగులు సులభంగా ప్రయాణించగలుగుతున్నారు.

ప్రత్యేక సమన్వయకర్తలు: అంతర్జాతీయ రోగుల ప్రయాణంలో సహాయపడటానికి మెడికల్ టూరిజం ప్రొవైడర్లు, క్లినిక్‌లు ప్రత్యేక సమన్వయకర్తలను నియమిస్తాయి.

అంకితమైన సేవలు: ప్రత్యేక సిబ్బంది, ప్రైవేట్ గదులు, వ్యక్తిగత సంరక్షణ వంటి కాన్సియార్జ్ సేవలు రోగుల సౌకర్యాన్ని, గోప్యతను నిర్ధారిస్తాయి.

మొత్తంమీద, అత్యాధునిక సాంకేతిక పరిజ్ఞానం, వైద్య నిపుణుల నైపుణ్యం, ప్రభుత్వ మద్దతు, రోగి-కేంద్రీకృత విధానాల కలయికతో హైదరాబాద్ సౌందర్య వైద్య రంగంలో తన స్థానాన్ని పదిలపరుచుకుని, ప్రపంచ పటంలో ఒక ప్రముఖ గమ్యస్థానంగా నిలుస్తోంది.