Hyderabad IT job fraud : హైదరాబాద్‌లో ఓ ఐటీ కొలువు.. లక్షలాది మంది యువత కనే కల. ఆ కలల రెక్కలు తొడిగి ఆకాశంలో విహరించాలనుకునే వారి ఆశే, కొందరికి కాసులు కురిపించే పెట్టుబడిగా మారింది. నిరుద్యోగుల బలహీనతనే ఆసరాగా చేసుకుని, ఐటీ హబ్ నడిబొడ్డున ఓ సంస్థ అల్లిన మాయాజాలంలో సుమారు 400 మంది అమాయకులు చిక్కుకున్నారు. లక్షలకు లక్షలు సమర్పించుకుని, ఉద్యోగం వచ్చిందని సంబరపడేలోపే మోసపోయామని గ్రహించారు. అసలు ‘ట్రైనింగ్-ప్లేస్‌మెంట్’ పేరుతో ఈ సంస్థ పన్నిన పన్నాగం ఏమిటి? తెరవెనుక ఈ ఘరానా మోసాన్ని నడిపించిన సూత్రధారులు ఎవరు? జీతాలు అడిగిన పాపానికి బాధితులకు ఎదురైన అనుభవాలేంటి? 

హైదరాబాద్ మహానగరం వేదికగా మరో భారీ ఉద్యోగ మోసం వెలుగులోకి వచ్చింది. మాదాపూర్‌ కేంద్రంగా పనిచేస్తున్న ‘ఎన్​ఎస్​ఎన్​ ఇన్ఫోటెక్​ టెక్నో సొల్యూషన్స్’ అనే ఐటీ సంస్థ, నిరుద్యోగ యువతే లక్ష్యంగా కోట్లలో వసూళ్లకు పాల్పడి బోర్డు తిప్పేసింది. బాధితులు లబోదిబోమంటూ పోలీసులను ఆశ్రయించడంతో ఈ చీకటి బాగోతం బట్టబయలైంది.

దశలవారీగా మోసం.. పక్కా ప్రణాళికతో పలాయనం..
ఆశ చూపి.. వల వేశారు: సుమారు సంవత్సరం క్రితం, ఎన్​ఎస్​ఎన్​ ఇన్ఫోటెక్​ సంస్థ ‘ట్రైనింగ్ కమ్ ప్లేస్‌మెంట్’ పేరుతో ఆకర్షణీయమైన ప్రకటనలు ఇచ్చింది. ప్రముఖ కంపెనీలలో ఉద్యోగాలు ఇప్పిస్తామని నమ్మబలికింది. శిక్షణ, ప్లేస్‌మెంట్ గ్యారెంటీ కోసం ఒక్కో అభ్యర్థి నుంచి వారి అర్హతలను బట్టి రూ.2 లక్షల నుంచి రూ.3 లక్షల వరకు డిపాజిట్ల రూపంలో వసూలు చేసింది. ఇలా దాదాపు 400 మంది నిరుద్యోగుల నుంచి లక్షల్లో డబ్బు దండుకుంది.

నమ్మించి.. నట్టేట ముంచారు: డబ్బు కట్టిన వారిలో కొందరికి ఉద్యోగం ఇచ్చినట్లు నమ్మించారు. ఆఫర్ లెటర్లు ఇచ్చి, ‘వర్క్ ఫ్రమ్ హోమ్’ విధానంలో పనులు అప్పగించారు. మొదటి రెండు నెలలు కొందరికి నామమాత్రంగా స్టైఫండ్ ఇచ్చి, నమ్మకాన్ని పూర్తిగా చూరగొన్నారు. ఆ తర్వాత అసలు కథ మొదలుపెట్టారు. ఆరు నెలల తర్వాత పూర్తి జీతం వస్తుందని చెప్పి, నెలల తరబడి వారితో వెట్టిచాకిరీ చేయించుకున్నారు.

జీతమడిగితే.. జెండా ఎత్తేశారు: నెలలు గడుస్తున్నా జీతాలు రాకపోవడంతో అనుమానం వచ్చిన ఉద్యోగులు, నిర్వాహకులను నిలదీశారు. దీంతో వారు బెదిరింపులకు దిగారు. ఇక లాభం లేదని భావించిన బాధితులు, నేరుగా ఆఫీసుకు వెళ్లాలని నిర్ణయించుకున్నారు. మాదాపూర్‌లోని కార్యాలయ చిరునామా కనుక్కొని అక్కడికి వెళ్లేసరికి వారికి దిమ్మతిరిగే వాస్తవం ఎదురైంది. ఆఫీసుకు తాళం వేసి ఉంది, నిర్వాహకుల ఫోన్లు స్విచ్ ఆఫ్ చేసి ఉన్నాయి. అప్పటికే వారు సర్వం సర్దుకుని పారిపోయారని గ్రహించి, తాము దారుణంగా మోసపోయామని బాధితులు కన్నీరుమున్నీరయ్యారు.

పోలీసుల రంగ ప్రవేశం.. సూత్రధారుల కోసం గాలింపు : ఈ మోసంలో సంస్థ సీఈవో శ్రీనివాస్, డైరెక్టర్ స్వామి నాయుడు, హెచ్​ఆర్ అరుణ ప్రధాన పాత్రధారులుగా బాధితులు ఆరోపిస్తున్నారు. సుమారు 20 మందికి పైగా బాధితులు ఏకమై మాదాపూర్ పోలీస్ స్టేషన్‌లో రాతపూర్వకంగా ఫిర్యాదు చేశారు.

బాధితురాలి ఆవేదన: “మొదట స్టైఫండ్ ఇస్తామని, పూర్తి జీతం రావాలంటే రూ.2 లక్షల నుంచి రూ.3 లక్షలు కట్టాలని సీఈవో శ్రీనివాస్ చెప్పారు. అంత కట్టలేమని చెప్పడంతో, స్టైఫండ్ మోడ్‌లో కొంత కట్టించుకున్నారు. నేను, నా స్నేహితులు తలా రూ.2 లక్షలు కట్టాం. కేవలం రెండు నెలలు రూ.10 వేలు స్టైఫండ్ ఇచ్చి ఆపేశారు. ఆరు నెలల తర్వాత జీతం వస్తుందన్నారు, కానీ ఇవ్వలేదు. వచ్చి చూస్తే ఆఫీసు మూసేశారు.”

ఈ ఫిర్యాదుపై మాదాపూర్ సీఐ కృష్ణమోహన్ స్పందిస్తూ, “ప్రైవేట్ కంపెనీలో ఉద్యోగాలు ఇప్పిస్తామని నమ్మించి డబ్బు వసూలు చేసినట్లు ప్రాథమికంగా నిర్ధారించాం. నిందితులైన శ్రీనివాస్, స్వామి నాయుడు, అరుణపై కేసు నమోదు చేసి, వారి కోసం గాలిస్తున్నాం,” అని తెలిపారు. ఈ సంస్థ వల్ల మోసపోయిన వారు ఇంకెవరైనా ఉంటే నిర్భయంగా పోలీసులను ఆశ్రయించాలని ఆయన సూచించారు. నిరుద్యోగులు ఇలాంటి నకిలీ కంపెనీల పట్ల అప్రమత్తంగా ఉండాలని హెచ్చరించారు.