Health risks of street food : వీధి పక్కన పానీపూరీ బండి కనపడితే చాలు, మనసు లాగేస్తుంది, నోరూరుతుంది. కానీ, ఆ క్షణకాలపు రుచి కోసం ఆరాటపడితే, ఒక్కోసారి ప్రాణాలకే ముప్పు వాటిల్లుతుంది. హైదరాబాద్‌కు చెందిన ఓ 22 ఏళ్ల సాఫ్ట్‌వేర్ ఇంజినీర్ విషయంలో ఇదే జరిగింది. అపరిశుభ్రమైన పానీపూరీ తిని, తీవ్రమైన హెపటైటిస్-ఎ బారిన పడి, ఏకంగా నెల రోజుల పాటు ఆసుపత్రిలో మృత్యువుతో పోరాడాల్సి వచ్చింది. అసలు ఆ రోజు ఏం జరిగింది..? వీధి ఆహారం విషయంలో మనం ఎలాంటి జాగ్రత్తలు తీసుకోవాలి..?

రెండు వారాల క్రితం, ఓ 22 ఏళ్ల సాఫ్ట్‌వేర్ ఇంజినీర్, నగరంలోని ఓ వీధిబండి వద్ద పానీపూరీ తిని, అక్కడే ఉన్న డబ్బాలో నీళ్లు తాగాడు. కొద్ది రోజులకే అతనికి కామెర్లు, కడుపునొప్పి, వాంతులు, తీవ్రమైన నీరసం వంటి లక్షణాలు మొదలయ్యాయి. పరిస్థితి విషమించడంతో, నగరంలోని ఆస్టర్ ప్రైమ్ ఆసుపత్రిలో చేరాడు.

“రక్తపరీక్షలు చేయగా, అతనికి హెపటైటిస్-ఎ ఇన్ఫెక్షన్ తీవ్రంగా ఉందని, కాలేయ ఎంజైమ్‌లు ప్రమాదకర స్థాయిలో పెరిగాయని తేలింది. వీధుల్లో అమ్మే అపరిశుభ్రమైన ఆహారం ఎంతటి తీవ్రమైన కాలేయ ఇన్ఫెక్షన్‌లకు దారితీస్తుందో ఈ ఘటనే నిదర్శనం.”
– డాక్టర్ కలువల హర్ష తేజ, కన్సల్టెంట్ గ్యాస్ట్రోఎంటరాలజిస్ట్, ఆస్టర్ ప్రైమ్ ఆసుపత్రి

వైద్యులు సకాలంలో స్పందించి, అతనికి హైడ్రేషన్, కాలేయాన్ని కాపాడే మందులతో చికిత్స అందించారు. దాదాపు నాలుగు వారాల పాటు ఆసుపత్రిలోనే చికిత్స పొందాక, అతను పూర్తిగా కోలుకున్నాడు. ఈ అనారోగ్యం వల్ల అతను నెల రోజుల పాటు ఉద్యోగానికి దూరం కావడమే కాకుండా, భారీగా చికిత్స ఖర్చులు కూడా భరించాల్సి వచ్చింది.

హెపటైటిస్-ఎ: అదొక సైలెంట్ కిల్లర్ : హెపటైటిస్-ఎ, ఈ.. ఈ రెండూ కలుషిత నీరు, అపరిశుభ్రమైన ఆహారం ద్వారా వ్యాపించే కాలేయ ఇన్ఫెక్షన్లు.

ఎలా వ్యాపిస్తుంది: రోడ్డు పక్కన అమ్మే సరిగా ఉడకని ఆహారం, కలుషిత నీటితో చేసిన చట్నీలు, పండ్ల ముక్కల ద్వారా ఈ వైరస్ సులభంగా వ్యాపిస్తుంది.

ప్రమాదం ఎవరికి: చాలామంది యువతలో ఇది దానంతట అదే తగ్గిపోయినా, నిర్లక్ష్యం చేస్తే ప్రాణాపాయానికి దారితీస్తుంది.

“హెపటైటిస్ ఎ, ఈ.. మన దేశంలో నివారించగల ప్రధాన ప్రజారోగ్య సమస్యలు. పరిశుభ్రత పాటించడం, సురక్షితమైన ఆహారం తీసుకోవడం, టీకాలు వేయించుకోవడం ద్వారా వీటిని అరికట్టవచ్చు.”
– డాక్టర్ హరికుమార్ రెడ్డి, సీఈఓ, ఆస్టర్ ప్రైమ్ ఆసుపత్రి

గుణపాఠం.. తీసుకోవాల్సిన జాగ్రత్తలు : ఈ ఘటన మనందరికీ ఓ హెచ్చరిక. వీధి ఆహారం తినేటప్పుడు కొన్ని జాగ్రత్తలు తప్పనిసరి.

చేతులు శుభ్రంగా కడుక్కోవడం.
వీధుల్లో, అపరిశుభ్రంగా ఉన్న ప్రదేశాల్లో ఆహారం తినకపోవడం.
కాచి చల్లార్చిన లేదా ఫిల్టర్ చేసిన నీటినే తాగడం.
హెపటైటిస్-ఎ నిరోధక టీకా వేయించుకోవడం.

రుచికి ప్రాధాన్యమిచ్చి, ఆరోగ్యాన్ని పణంగా పెట్టవద్దని, ముఖ్యంగా వర్షాకాలంలో వీధి ఆహారం విషయంలో మరింత అప్రమత్తంగా ఉండాలని వైద్యులు సూచిస్తున్నారు.