Ponnam Prabhakar On Jubilee Hills by-election : మాజీ ఎంపీ అంజన్ కుమార్ యాదవ్‌తో జరిగిన సమావేశం తర్వాత మీడియాతో మాట్లాడిన బీసీ వెల్ఫేర్ మంత్రి పొన్నం ప్రభాకర్, కాంగ్రెస్ పార్టీలో అభ్యర్థి ఎంపిక ప్రక్రియ గురించి వివరించారు. ఎన్నికల్లో అందరినీ సంప్రదించిన తర్వాతే పార్టీ అధిష్టానం అభ్యర్థి ఎంపిక చేస్తుందని, జూబ్లీహిల్స్‌లో అంజన్ కుమార్ యాదవ్ పోటీ చేయాలని పార్టీలో భావించినప్పటికీ, ప్రస్తుత పరిస్థితులకు అనుగుణంగా టికెట్ వేరే వారికి కేటాయించినట్టు చెప్పారు.
ఏఐసీసీ ఇన్‌చార్జ్ మీనాక్షి నటరాజన్, గద్దం వివేక్‌లతో కలిసి అంజన్ కుమార్ యాదవ్ ఇంటికి వెళ్లి, వారి భవిష్యత్తుపై చర్చించినట్టు మంత్రి పొన్నం ప్రభాకర్ తెలిపారు. అంజన్ కుమార్ యాదవ్ కాంగ్రెస్‌లో సీనియర్ నేత అని, రెండుసార్లు పార్టీ వర్కింగ్ ప్రెసిడెంట్‌గా, రెండుసార్లు పార్లమెంట్ సభ్యుడిగా పనిచేశారని ప్రశంసించారు. కరోనా కాలంలో ఎన్నో సేవా కార్యక్రమాలు చేసి, తాను కూడా కరోనా బారిన పడినప్పటికీ పార్టీకి అంకితమై ఉన్నారని అన్నారు.
హైదరాబాద్‌లో కాంగ్రెస్ పార్టీ అభివృద్ధికి అంజన్ కుమార్ యాదవ్ పెద్ద దిక్కని.. ఆయన హయాంలో నగరంలో పార్టీ మరింత బలపడి ముందుకు సాగుతోందని మంత్రి పొన్నం ప్రభాకర్ చెప్పారు. ప్రస్తుత పరిస్థితులకు తగ్గట్టు పార్టీ నిర్ణయం తీసుకుందని, జూబ్లీహిల్స్‌లో కాంగ్రెస్ గెలుస్తుందని ఆశాభావం వ్యక్తం చేశారు. ప్రభుత్వం చేపట్టిన సంక్షేమ, అభివృద్ధి కార్యక్రమాలకు ప్రజలు పట్టు కడతారని అన్నారు.
జూబ్లీహిల్స్ ఉప ఎన్నిక అంజన్ కుమార్ యాదవ్ సారథ్యంలో జరుగుతోంది. ఆయన నేతృత్వంలో అందరూ కలిసి పని చేస్తూ ముందుకు సాగుతున్నామని మంత్రి పొన్నం ప్రభాకర్ తెలిపారు. ఏఐసీసీ ఇన్‌చార్జ్ మీనాక్షి నటరాజన్ కూడా అంజన్ కుమార్ యాదవ్‌తో మాట్లాడి, పార్టీ బలోపేతానికి సహకరించాలని కోరినట్లు తెలుస్తుంది. కంటోన్‌మెంట్ ఎన్నికల్లో అభివృద్ధి కార్యక్రమాలకు ప్రజలు స్పందించి కాంగ్రెస్‌ను గెలిపించారని, జూబ్లీహిల్స్‌లో కూడా అదే జరుగుతుందని అన్నారు.
అంజన్ కుమార్ యాదవ్ ముందుండి ఎన్నికల కార్యక్రమాలు తీసుకుంటారని.. మా పార్టీలో నియంత్రణ లేదని.. బయట స్వేచ్ఛగా మాట్లాడే స్వేచ్ఛ ఉందని మంత్రి పొన్నం ప్రభాకర్ చెప్పారు. అంజన్ కుమార్ యాదవ్ ముషీరాబాద్‌లో గెలిచి ఉంటే మంత్రి అయ్యేవారని, పార్టీలో ఆయన స్థానం ప్రత్యేకమని తెలిపారు. రాహుల్ గాంధీని ప్రధాని చేయడమే మా లక్ష్యమని, జూబ్లీహిల్స్ ఉప ఎన్నికల్లో అందరం కలిసి పని చేస్తామని పేర్కొన్నారు.
పార్టీలో ఇటీవల జరిగిన సమావేశాల్లో అభ్యర్థి ఎంపికపై చర్చలు జరిగాయి. మంత్రుల కమిటీ నవీన్ యాదవ్, బొంటు రామ్మోహన్, సీఎన్ రెడ్డి, అంజన్ కుమార్ యాదవ్‌లను షార్ట్‌లిస్ట్ చేసింది. అయితే, అధిష్టానం చివరికి నవీన్ యాదవ్ కు టికెట్ కేటాయించింది. ఇక ఈ ఉప ఎన్నికలు పార్టీ బలాన్ని పరీక్షించే అవకాశంగా మారాయి. ప్రజల సపోర్ట్ తో కాంగ్రెస్ మరోసారి గెలుపు సాధిస్తుందని ధీమా వ్యక్తం చేస్తుంటే, మరోవైపు మిగిలిన పార్టీలు సైతం గట్టి ప్రయత్నాలు చేస్తున్నాయి. ఇక ఈ ఎన్నికలు తెలంగాణలో కాంగ్రెస్ పాలిటిక్స్‌కు కొత్త ఊపిరి పోస్తాయని పార్టీ నేతలు భావిస్తున్నారు.
