New political party : తెలంగాణ రాజకీయాల్లో మరో కొత్త అధ్యాయానికి తెరలేవనుందా..? బీఆర్ఎస్ అధినేత కేసీఆర్ కుమార్తె, ఎమ్మెల్సీ కల్వకుంట్ల కవిత సొంత రాజకీయ పక్షాన్ని ఏర్పాటు చేయబోతున్నారన్న వార్త రాష్ట్రవ్యాప్తంగా తీవ్ర ప్రకంపనలు సృష్టిస్తోంది. బీసీ నినాదాన్నే ప్రధాన అజెండాగా చేసుకుని, “తెలంగాణ బహుజన రాష్ట్ర సమితి” (TBRS) పేరుతో దీపావళికి పార్టీని ప్రకటించేందుకు రంగం సిద్ధం చేస్తున్నారంటూ విశ్వసనీయ వర్గాల్లో జోరుగా ప్రచారం జరుగుతోంది. అసలు ఈ ప్రచారంలో నిజమెంత..? ఒకవేళ ఇదే నిజమైతే, గులాబీ పార్టీ భవిష్యత్తు ఏంటి..?

తెరపైకి ‘తెలంగాణ బహుజన రాష్ట్ర సమితి’ : గత కొంతకాలంగా పార్టీ కార్యక్రమాలకు, మీడియాకు దూరంగా ఉంటున్న కవిత, తన రాజకీయ భవిష్యత్తుపై కీలక నిర్ణయం తీసుకున్నట్లు తెలుస్తోంది. బీసీలను ఏకం చేసే లక్ష్యంతో “తెలంగాణ బహుజన రాష్ట్ర సమితి” పేరును ఆమె ఖరారు చేసినట్లు సమాచారం. పార్టీ కార్యకలాపాల కోసం బంజారాహిల్స్‌లోని తన నివాసం పక్కనే మూడు అంతస్తుల భవనాన్ని కూడా సిద్ధం చేస్తున్నట్లు రాజకీయ వర్గాల్లో గుసగుసలు వినిపిస్తున్నాయి. దీపావళి పండుగ శుభ ముహూర్తంగా పార్టీని అధికారికంగా ప్రకటించి, జెండా, అజెండాలను ప్రజల ముందు ఉంచనున్నారని అంటున్నారు.

ఎందుకీ కొత్త జెండా : అసెంబ్లీ ఎన్నికల్లో బీఆర్ఎస్ ఓటమి తర్వాత పార్టీలో తనకు  ప్రాధాన్యత లభించడం లేదని, తండ్రి కేసీఆర్, సోదరుడు కేటీఆర్‌ల తర్వాత పార్టీలో తన పాత్రపై అస్పష్టత నెలకొందని కవిత తీవ్ర అసంతృప్తితో ఉన్నట్లు ఆమె సన్నిహితులు చెబుతున్నారు. ఢిల్లీ మద్యం కుంభకోణం కేసులో ఎదుర్కొంటున్న న్యాయపోరాటంలో కూడా పార్టీ నుంచి ఆశించిన స్థాయిలో మద్దతు లభించలేదనే భావన ఆమెలో ఉన్నట్లు తెలుస్తోంది. ఈ పరిణామాల నేపథ్యంలో, తనకంటూ ఒక సొంత రాజకీయ వేదికను నిర్మించుకుని, తన బలాన్ని నిరూపించుకోవాలనే పట్టుదలతో కవిత ఉన్నారని విశ్లేషకులు భావిస్తున్నారు.

బీసీ నినాదంతో ముందుకు : తెలంగాణలో రాజకీయంగా అత్యంత కీలకమైన బీసీ ఓటు బ్యాంకును ఆకట్టుకోవడమే లక్ష్యంగా కవిత అడుగులు వేస్తున్నట్లు స్పష్టమవుతోంది. రాష్ట్రంలో ఇప్పటివరకు బీసీల కోసం ఒక బలమైన ప్రాంతీయ పార్టీ లేని లోటును భర్తీ చేయడం ద్వారా, అధికార కాంగ్రెస్‌కు, ప్రతిపక్ష బీఆర్ఎస్, బీజేపీలకు బలమైన ప్రత్యామ్నాయంగా ఎదగాలన్నది ఆమె వ్యూహంగా కనిపిస్తోంది.

ఒకవేళ ఈ వార్తలే నిజమై, కవిత కొత్త పార్టీ పెడితే, అది బీఆర్ఎస్‌కు తీరని నష్టాన్ని కలిగించడం ఖాయం. ఉద్యమ పార్టీ ఓటు బ్యాంకు చీలిపోయి, రాష్ట్ర రాజకీయ సమీకరణాలు సమూలంగా మారిపోయే అవకాశం ఉంది. ఈ ఊహాగానాలపై కవిత లేదా బీఆర్ఎస్ అధిష్టానం నుంచి అధికారిక ప్రకటన వస్తేనే పూర్తి స్పష్టత రానుంది.