Good News: హైదరాబాద్ నుంచి బెంగళూరు మధ్య ప్రయాణించే రైలు ప్రయాణికులకు గుడ్ న్యూస్. హైదరాబాద్ నుంచి బెంగళూరుకు వెళ్లే వందే భారత్ ఎక్స్‌ప్రెస్ రైలులో కోచ్‌ల సంఖ్యను రెట్టింపు చేస్తూ దక్షిణ మధ్య రైల్వే నిర్ణయం తీసుకుంది. అధిక డిమాండ్‌ను దృష్టిలో ఉంచుకుని, ప్రస్తుతం 8 కోచ్‌లతో నడుస్తున్న కాచిగూడ–యశ్వంత్‌పూర్ వందే భారత్ రైలు, జులై 10, 2025 నుంచి 16 కోచ్‌లతో సేవలు అందించనుంది. ఈ మేరకు దక్షిణ మధ్య రైల్వే జనరల్ మేనేజర్ సందీప్ మాథుర్ ప్రకటనలో తెలిపారు. ఈ మార్పుతో రైలులో ఉపయోగపడే సీట్లు 530 నుంచి 1,128కి పెరగనున్నాయి. తాజా కోచ్లతో పాటు, రైలు మొత్తం 14 చైర్ కార్లు (ప్రతి ఒక్కటి సుమారు 73 సీట్ల సామర్థ్యంతో), 2 ఎగ్జిక్యూటివ్ క్లాస్ కోచ్‌లు (ప్రతి ఒక్కటి సుమారు 52 సీట్ల సామర్థ్యంతో) కలిగి ఉంటుంది.

ప్రస్తుతం నడుస్తున్న వందే భారత్ రైలుకు ప్రయాణికుల స్పందన చాలా గొప్పగా ఉందని, ప్రయాణికుల సంఖ్య రోజురోజుకీ పెరుగుతోందని రైల్వే అధికారులు తెలిపారు. ప్రారంభంలో ఈ రైలు 1 ఎగ్జిక్యూటివ్ క్లాస్ మరియు 7 చైర్ కార్లు కలిగిన 8 కోచ్‌లతో ప్రారంభమైంది. అప్పటి నుంచే 100 శాతం కంటే ఎక్కువ ఆక్యుపెన్సీతో ఈ రైలు సాఫీగా నడుస్తోంది. ఇప్పుడు కోచ్‌ల సంఖ్యను పెంచినందున, హైదరాబాద్ – బెంగళూరు మధ్య ప్రయాణించే వారికీ మరింత సౌకర్యంగా ఉంటుంది. ఐటీ ఉద్యోగులు, వ్యాపార ప్రయాణికులు ఇలా అన్ని వర్గాల ప్రయాణికుల కోసమే ఈ పరిష్కారం అని రైల్వే అధికారులు వివరించారు.

గమనించదగ్గ విషయం ఏంటంటే, ఈ రైలు 2023 సెప్టెంబర్ 24న ప్రధానమంత్రి నరేంద్ర మోదీ చేతుల మీదుగా వర్చువల్‌గా ప్రారంభించబడింది. అప్పటి నుంచీ ఈ రైలు ఆ మార్గంలో ప్రయాణికుల అభిరుచిలో మొదటిస్థానంలో నిలిచింది. ఇప్పుడు డిమాండ్ పెరిగిన నేపథ్యంలో మరింత సామర్థ్యాన్ని కలిగిన కొత్త కోచ్‌లను జత చేయడం జరిగింది.