Kamareddy flood situation : కుండపోత వాన కామారెడ్డి జిల్లాను అతలాకుతలం చేసింది. బుధవారం ఒక్కసారిగా విరుచుకుపడిన వరుణుడు, తీవ్ర విషాదాన్ని మిగిల్చాడు. ఉప్పొంగిన వాగులో ఆరుగురు కార్మికులు ప్రాణాలను అరచేతిలో పెట్టుకుని సాయం కోసం ఎదురుచూస్తుంటే, మరోవైపు కాలనీలు నీట మునిగి జనం అల్లాడిపోతున్నారు. ఈ జల ప్రళయానికి రైలు పట్టాలు కొట్టుకుపోయి రవాణా వ్యవస్థ స్తంభించింది. 

బుధవారం మధ్యాహ్నం నుంచి ఎడతెరిపి లేకుండా కురిసిన భారీ వర్షం కామారెడ్డి జిల్లా జనజీవనాన్ని అస్తవ్యస్తం చేసింది. 

ఉప్పొంగిన వాగు.. ప్రాణాలతో పోరాటం : జిల్లాలోని తిమ్మారెడ్డి వద్ద ఉన్న కల్యాణి వాగుపై బ్రిడ్జి నిర్మాణ పనుల్లో విషాదం చోటుచేసుకుంది. ఎగువ ప్రాంతాల్లో కురిసిన కుండపోత వర్షానికి వాగు ఒక్కసారిగా ఉప్పొంగింది. కార్మికులు తేరుకునేలోపే వరద ఉధృతి పెరిగి వారిని చుట్టుముట్టింది. బయటకు వచ్చే దారిలేక, ప్రాణాలను కాపాడుకునేందుకు సమీపంలోని డీసీఎం వాహనంపై ఉన్న వాటర్ ట్యాంకర్‌పైకి ఎక్కి బిక్కుబిక్కుమంటూ గడిపారు. విషయం తెలుసుకున్న జిల్లా కలెక్టర్, ఎస్పీ తక్షణమే స్పందించి, ఎన్డీఆర్ఎఫ్ బృందాలను రప్పించి సహాయక చర్యలను పర్యవేక్షిస్తున్నారు.

జలదిగ్బంధంలో కాలనీలు : భారీ వర్షానికి కామారెడ్డి పట్టణంలోని హౌసింగ్ బోర్డ్ కాలనీ పూర్తిగా జలదిగ్బంధంలో చిక్కుకుంది. ఇళ్లలోకి భారీగా వరద నీరు చేరడంతో ప్రజలు తీవ్ర ఇబ్బందులకు గురయ్యారు. సమాచారం అందుకున్న కామారెడ్డి పట్టణ పోలీసులు వెంటనే రంగంలోకి దిగి, ప్రత్యేక పడవల సహాయంతో సుమారు 60 మందిని సురక్షిత ప్రాంతాలకు తరలించారు. అనేక ఇతర లోతట్టు ప్రాంతాలు కూడా నీట మునిగాయి.

కొట్టుకుపోయిన రైలు పట్టాలు.. రద్దయిన రైళ్లు :ఈ జల ప్రళయం ప్రభావం రైల్వే వ్యవస్థపైనా తీవ్రంగా పడింది.

గండిపడిన ట్రాక్: కామారెడ్డి-భిక్కనూర్ మధ్య రైలు పట్టాల కింద మట్టి పూర్తిగా కొట్టుకుపోయి పెద్ద గండి పడింది.

స్తంభించిన రాకపోకలు: పలుచోట్ల రైలు మార్గంపై వరద నీరు ప్రమాదకర స్థాయిలో ప్రవహిస్తుండటంతో, అధికారులు ముందుజాగ్రత్త చర్యగా హైదరాబాద్-కామారెడ్డి మార్గంలో రైళ్ల రాకపోకలను పూర్తిగా నిలిపివేశారు.

రైళ్ల రద్దు, మళ్లింపు: ఈ పరిణామాల నేపథ్యంలో, దక్షిణ మధ్య రైల్వే కాచిగూడ-మెదక్, నిజామాబాద్-తిరుపతి రైళ్లను పూర్తిగా రద్దు చేసింది. మరో నాలుగు రైళ్లను వేరే మార్గాల్లో మళ్లించినట్లు ప్రకటించింది.

సీఎం స్పందన, సహాయక చర్యలు : కామారెడ్డి జిల్లాలో నెలకొన్న పరిస్థితులపై ముఖ్యమంత్రి రేవంత్ రెడ్డి తక్షణమే స్పందించారు. జిల్లా అధికారులతో ఫోన్‌లో మాట్లాడి పరిస్థితిని సమీక్షించారు. వరద ప్రభావిత ప్రాంతాల్లో వెంటనే సహాయక చర్యలను ముమ్మరం చేయాలని, బాధితులను అన్ని విధాలా ఆదుకోవాలని, సురక్షిత ప్రాంతాలకు తరలించాలని ఆదేశించారు.