Kavitha Emotional After BRS suspension: “నాకు 27 ఏళ్లు ఉన్నప్పుడు రాజకీయాల్లోకి వచ్చాను. తెలంగాణ, కేసీఆర్, బీఆర్ఎస్, జాగృతి కోసం నా 20 ఏళ్ల జీవితాన్ని త్యాగం చేశాను. కానీ సడెన్‌గా ఇప్పుడు బీఆర్ఎస్‌తో నీకు ఏం సంబంధం అని ప్రశ్నిస్తున్నారు. ఇది చాలా బాధగా ఉంది,” అంటూ బీఆర్ఎస్ ఎమ్మెల్సీ కల్వకుంట్ల కవిత తీవ్ర భావోద్వేగానికి లోనయ్యారు. పార్టీ వ్యతిరేక కార్యకలాపాలకు పాల్పడుతున్నారన్న ఆరోపణలతో అధిష్టానం తనను సస్పెండ్ చేయడంపై ఆమె కన్నీటి పర్యంతమయ్యారు. రెండు దశాబ్దాల తన రాజకీయ ప్రస్థానాన్ని, పార్టీ కోసం చేసిన సేవలను గుర్తుచేసుకుంటూ ఆమె వ్యక్తం చేసిన ఆవేదన, బీఆర్ఎస్‌లో ముదిరిన సంక్షోభానికి, కుటుంబంలో ఏర్పడిన అగాధానికి అద్దం పడుతోంది.
అంచెలంచెలుగా బహిష్కరణ వేళ: ఆవేదన.. ఆగ్రహం : బీఆర్ఎస్ అధినేత, ముఖ్యమంత్రి కేసీఆర్ పార్టీ నాయకత్వంపై తీవ్ర విమర్శలు చేసిన తన కుమార్తె కవితపై సస్పెన్షన్ వేటు వేసారు. పార్టీలో క్రమశిక్షణను ఉల్లంఘించారన్న కారణంతో ఈ నిర్ణయం తీసుకున్నట్లు బీఆర్ఎస్ వర్గాలు వెల్లడించాయి. ఈ నిర్ణయం వెలువడిన అనంతరం మీడియా ముందుకు వచ్చిన కవిత, తీవ్ర ఆవేదనతో మాట్లాడారు. తన రాజకీయ జీవితం మొత్తం తెలంగాణ ఉద్యమం, బీఆర్ఎస్ పార్టీతోనే ముడిపడి ఉందని, అలాంటిది ఇప్పుడు పార్టీతో సంబంధం లేదనడం తనను తీవ్రంగా కలచివేసిందని వాపోయారు.
“నా వయసు ఇప్పుడు 47 ఏళ్లు. నా జీవితంలో 20 ఏళ్లు పార్టీకే అంకితం చేశాను. అలాంటి నన్ను హఠాత్తుగా ఎందుకు దూరం పెట్టాల్సి వచ్చింది..?” అని ఆమె అధిష్టానాన్ని సూటిగా ప్రశ్నించారు. పార్టీ నిర్ణయం తనను బాధించినా, తాను వెనకడుగు వేసేది లేదని, ప్రజల వద్దకే వెళ్తానని ఆమె గద్గద స్వరంతో ప్రకటించారు. ఈ వ్యాఖ్యలు, కవిత భవిష్యత్ కార్యాచరణపై తీవ్ర చర్చకు దారితీశాయి.
