Khammam Crime News: ఖమ్మం జిల్లాలో భర్తపై భార్య దాడి చేసిన ఘటన వెలుగులోకి వచ్చింది. పెనుబల్లి మండలం వీ.ఎం. బంజర్ పంచాయతీ పరిధిలోని జంగాల కాలనీలో నివసిస్తున్న గంగారాం (51) తన భార్య చేతిలో తీవ్ర గాయాల పాలయ్యాడు. దాదాపు ముప్పై ఐదు సంవత్సరాలుగా ఈ దంపతులు అక్కడే నివాసం ఉంటున్నారు. అయితే గంగారాం మద్యం వ్యసనంతో బాధపడుతూ ఉండటం వల్ల వారిద్దరి మధ్య పదేపదే గొడవలు జరిగేవి.
దెయ్యం పట్టిందానిలా..
రెండు రోజుల క్రితం లక్ష్మి తన భర్తపై దాడి చేసింది. ఆమె దెయ్యం పట్టిందానిలా అరుస్తూ, కేకలు వేస్తూ పడుకున్న గంగారాం నోటిలో గుడ్డలు కుక్కి కర్రతో కొట్టింది. ఈ దాడిలో గంగారాం తీవ్రంగా గాయపడ్డాడు. రక్తస్రావం జరగడంతో బయటకు పరుగెత్తి సహాయం కోసం కేకలు వేయాల్సి వచ్చింది.
పక్కటెముకలు విరిగినట్లు..
గంగారాం పరిస్థితిని గమనించిన బంధువులు వెంటనే అతన్ని సమీప ఆసుపత్రికి తరలించారు. వైద్యులు ప్రారంభ చికిత్స అందించారు. గాయాలు తీవ్రంగా ఉండటంతో తర్వాత ఖమ్మం ఆసుపత్రికి రిఫర్ చేశారు. అక్కడే ప్రస్తుతం చికిత్స కొనసాగుతోంది. వైద్యుల ప్రకారం గంగారాం పక్కటెముకలు విరిగినట్లు నిర్ధారణ అయింది.
చిత్రహింసలకు గురి..
ఈ సంఘటనలో మరో మలుపు చోటుచేసుకుంది. దాడి అనంతరం గంగారాం స్వయంగా పోలీసులను సంప్రదించి, తన భార్య కావాలనే తనను కొట్టిందని ఫిర్యాదు చేశాడు. అతను తెలిపిన వివరాల ప్రకారం, భార్య గుడ్డలు కుక్కి, ఇనుప రాడ్ , కర్రతో దాడి చేసిందని చెప్పాడు. అంతేకాకుండా తనను చిత్రహింసలకు గురి చేసిందని పోలీసులకు వివరించాడు.
ఫిర్యాదు అందుకున్న వీ.ఎం. బంజర్ పోలీసులు కేసు నమోదు చేశారు. భార్య లక్ష్మిపై పలు సెక్షన్ల కింద నేరం మోపారు. దాడి వెనుక ఉద్దేశం, మానసిక పరిస్థితులు, కుటుంబంలో జరుగుతున్న తగాదాలపై పోలీసులు విచారణ చేపట్టారు.
బంధువుల ప్రకారం, గంగారాం చాలా కాలంగా మద్యం అలవాటు కారణంగా కుటుంబంలో విభేదాలు పెరిగాయని చెప్పారు. తరచూ తగాదాలు జరిగేవని, ఈసారి ఘర్షణ హద్దులు దాటి దాడి వరకు వెళ్లిందని పేర్కొన్నారు. అలాగే, లక్ష్మి దాడి తరువాత కూడా విచిత్రంగా ప్రవర్తించిందని, తానెందుకు అలా కొట్టిందన్న ప్రశ్నలకు సరిగ్గా సమాధానం ఇవ్వలేకపోయిందని బంధువులు తెలిపారు.
ఆరోగ్య పరిస్థితిని..
ప్రస్తుతం పోలీసులు కేసు దర్యాప్తు కొనసాగిస్తున్నారు. గంగారాం ఆసుపత్రిలో చికిత్స పొందుతూ ఉండగా, వైద్యులు అతని ఆరోగ్య పరిస్థితిని గమనిస్తున్నారు. కుటుంబ సభ్యులు అతని కోలుకోవాలని ఎదురుచూస్తున్నారు.
