Mohammad Azharuddin Telangana Minister : క్రికెట్ పిచ్‌పై తన మణికట్టు మాయాజాలంతో ఎన్నో అద్భుతాలు సృష్టించిన ఆయన, ఇప్పుడు రాజకీయ క్షేత్రంలో కీలక ఇన్నింగ్స్ ప్రారంభించారు. భారత మాజీ క్రికెట్ కెప్టెన్, సొగసరి బ్యాటర్ మొహమ్మద్ అజారుద్దీన్ తెలంగాణ రాష్ట్ర మంత్రివర్గంలో అడుగుపెట్టారు. ముఖ్యమంత్రి చేతిలో ఉన్న శాఖను సైతం ఆయనకు అప్పగించడం రాష్ట్ర రాజకీయాల్లో తీవ్ర చర్చనీయాంశంగా మారింది. ఈ అనూహ్య పరిణామం వెనుక ఉన్న రాజకీయ సమీకరణాలు ఏమిటి..? అజార్‌కు కేటాయించిన కీలక శాఖలు ఏవి..? పూర్తి వివరాలు తెలుసుకుందాం పదండి.

ప్రభుత్వ అధికారిక ప్రకటన : తెలంగాణ ప్రభుత్వ సాధారణ పరిపాలన శాఖ మంగళవారం (నవంబర్ 4, 2025) ఈ మేరకు అధికారికంగా ఉత్తర్వులు (G.O.MS.No. 217) జారీ చేసింది. ప్రభుత్వ ప్రధాన కార్యదర్శి కె. రామకృష్ణారావు, తెలంగాణ గవర్నర్ పేరు మీదుగా ఈ ఉత్తర్వులను విడుదల చేశారు. భారత రాజ్యాంగంలోని ఆర్టికల్ 166 (3) ప్రకారం, శ్రీ మొహమ్మద్ అజారుద్దీన్‌ను మంత్రివర్గంలోకి తీసుకున్న అనంతరం, గవర్నర్ ఆయనకు శాఖలను కేటాయించినట్లు నోటిఫికేషన్‌లో స్పష్టంగా పేర్కొన్నారు. ఈ నియామకం నవంబర్ 4, 2025 నుంచే తక్షణమే అమల్లోకి వస్తుందని స్పష్టం చేశారు.

అజార్‌కు అప్పగించిన కీలక శాఖలు : మొహమ్మద్ అజారుద్దీన్‌కు రెండు కీలకమైన శాఖల బాధ్యతలను అప్పగించారు..
ప్రభుత్వ రంగ సంస్థలు (Public Enterprises): అత్యంత ప్రాధాన్యత కలిగిన ఈ శాఖ ఇప్పటివరకు స్వయంగా గౌరవ ముఖ్యమంత్రి పర్యవేక్షణలో ఉండటం గమనార్హం. ఇప్పుడు ఆ శాఖను అజారుద్దీన్‌కు కేటాయించడం, ఆయనపై ప్రభుత్వం ఉంచిన నమ్మకానికి నిదర్శనంగా విశ్లేషకులు భావిస్తున్నారు.

మైనారిటీల సంక్షేమం (Minorities Welfare): ఇప్పటివరకు ఈ శాఖను గౌరవ మంత్రి శ్రీ ఆడ్లూరి లక్ష్మణ్ కుమార్ నిర్వహిస్తున్నారు. రాష్ట్రంలో రాజకీయంగా, సామాజికంగా కీలకమైన ఈ శాఖను ఇప్పుడు అజారుద్దీన్‌కు అప్పగించారు. ఈ కేటాయింపులతో రాష్ట్ర మంత్రివర్గంలో కీలక మార్పులు చోటుచేసుకున్నాయి. అజారుద్దీన్ తన క్రీడాజీవితంలోని అనుభవాన్ని, ప్రజా జీవితంలోని పరిజ్ఞానాన్ని ఉపయోగించి ఈ శాఖలకు కొత్త దిశానిర్దేశం చేస్తారని ప్రభుత్వం ఆశిస్తోంది.