Microgreens cultivation in Nirmal : ఒకప్పుడు స్టార్ హోటళ్లు, సంపన్నుల ఇళ్లకే పరిమితమైన ‘సూపర్ ఫుడ్’, ఇప్పుడు సామాన్యుడి గడప తొక్కుతోంది. పోషకాల గని, ఆరోగ్యానికి పెన్నిధి అయిన ‘మైక్రో గ్రీన్స్’ (సూక్ష్మ హరిత ఆహారం), ఇప్పుడు నిర్మల్ జిల్లాలో పేదలకు సైతం అందుబాటులోకి వచ్చింది. దీర్ఘకాలిక వ్యాధులకు దివ్యౌషధంగా పనిచేసే ఈ సూక్ష్మ మొలకలను, స్థానిక మహిళా సంఘాలే పండిస్తూ, ఆరోగ్య విప్లవానికి నాంది పలుకుతున్నాయి. అసలు ఏమిటీ మైక్రో గ్రీన్స్…? వీటిని ఎలా పండిస్తున్నారు…?

ఏమిటీ ‘మైక్రో గ్రీన్స్’ : విత్తనం మొలకెత్తిన తర్వాత, దానికి రెండు ఆకులు వచ్చిన తొలి దశనే ‘మైక్రో గ్రీన్’ అంటారు. ఈ లేత మొలకలలో, పూర్తిస్థాయిలో ఎదిగిన మొక్క కంటే అనేక రెట్లు ఎక్కువ పోషకాలు, విటమిన్లు, యాంటీ ఆక్సిడెంట్లు ఉంటాయని శాస్త్రీయంగా నిరూపించబడింది. వీటిని ఇంట్లోనే, ఎలాంటి రసాయనాలు లేకుండా, కేవలం మట్టి, నీటితో సులభంగా పెంచుకోవచ్చు.

ఒక ట్రేలో మట్టి, కొకొపీట్, సేంద్రియ ఎరువులు వేయాలి. గోధుమలు, రాగులు, పెసర్లు, ముల్లంగి, క్యారెట్ వంటి విత్తనాలను నానబెట్టి, ఆ ట్రేలో చల్లాలి. కేవలం ఆరు రోజుల్లోనే ఈ విత్తనాలు మొలకెత్తి, కోతకు సిద్ధమవుతాయి. వీటిని సలాడ్లు, జ్యూస్‌లు, స్మూతీలలో నేరుగా తీసుకోవచ్చు.

నిర్మల్‌లో వినూత్న ప్రయోగం : ఈ ఆరోగ్యకరమైన ఆహారాన్ని అందరికీ అందించాలనే లక్ష్యంతో, నిర్మల్ జిల్లా గ్రామీణాభివృద్ధి శాఖ (DRDO) ఓ వినూత్న కార్యక్రమానికి శ్రీకారం చుట్టింది.

మహిళా శక్తికి బాధ్యత: నిర్మల్ మండల సమాఖ్య ఆధ్వర్యంలో, మహిళా సంఘాల సభ్యులకు మైక్రో గ్రీన్స్ పెంపకంపై ప్రత్యేక శిక్షణ ఇచ్చారు.

ఉత్పత్తి కేంద్రం: స్థానిక సమాఖ్య కార్యాలయంలోనే ప్రత్యేకంగా ఓ గదిని కేటాయించి, సేంద్రియ పద్ధతిలో ఎర్రముల్లంగి, క్యారెట్, బీట్‌రూట్, ఆకుకూరలు, గోధుమ వంటి దేశీ రకాల విత్తనాలతో మైక్రో గ్రీన్స్‌ను పండిస్తున్నారు.

పేదలకు అందుబాటులో: పండించిన ఈ మైక్రో గ్రీన్స్‌ను, మహిళా రైతు ఉత్పత్తిదారుల సంస్థ ద్వారా తక్కువ ధరకే ప్రజలకు, ముఖ్యంగా మధుమేహం, బీపీ వంటి దీర్ఘకాలిక వ్యాధులతో బాధపడుతున్న వారికి విక్రయిస్తున్నారు.

“ప్రజలందరి ఆరోగ్యవంతమైన జీవనం కోసం వీటిని అందుబాటులోకి తీసుకొచ్చాం. మైక్రో గ్రీన్స్ వ్యాధి నిరోధక శక్తి పెంపునకు ఎంతో దోహదం చేస్తాయి. కేవలం రూ.1.30 లక్షల పెట్టుబడితో ఈ కార్యక్రమాన్ని ప్రారంభించాం.”
– విజయలక్ష్మి, డీఆర్డీవో, నిర్మల్

ఆరోగ్యంపై పెరిగిన అవగాహన : కరోనా మహమ్మారి తర్వాత, ప్రజల్లో ఆరోగ్యంపై అవగాహన గణనీయంగా పెరిగింది. మిల్లెట్లు, మొలకలు, నట్స్ వంటి వాటికి గిరాకీ పెరిగింది. అయితే, ఇవి పేద, మధ్యతరగతి వారికి ఖర్చుతో కూడుకున్న పని. ఈ నేపథ్యంలో, నిర్మల్ మహిళా సంఘాలు చేపట్టిన ఈ కార్యక్రమం, తక్కువ ఖర్చుతోనే సంపూర్ణ ఆరోగ్యాన్ని అందించే ఓ ఆదర్శ మార్గాన్ని చూపుతోంది.