Inter-state water dispute : గోదావరి జలాల తరలింపుపై ఆంధ్రప్రదేశ్ ప్రభుత్వం తలపెట్టిన గోదావరి-బనకచర్ల (పోలవరం-బనకచర్ల) అనుసంధాన ప్రాజెక్టుపై తెలంగాణ ప్రభుత్వం లేవనెత్తిన అభ్యంతరాలపై కేంద్రం స్పందించింది. ఈ ప్రాజెక్టు విషయంలో ఏకపక్షంగా ముందుకెళ్లడం కుదరదని, తెలంగాణ సహా భాగస్వామ్య రాష్ట్రాల అభిప్రాయాలను పరిగణనలోకి తీసుకుంటామని స్పష్టం చేసింది. ఈ మేరకు ముఖ్యమంత్రి రేవంత్ రెడ్డికి కేంద్ర జలశక్తి శాఖ మంత్రి సి.ఆర్. పాటిల్ స్వయంగా లేఖ రాశారు. అసలు ఈ ప్రాజెక్టు ఏంటి…? తెలంగాణ అభ్యంతరాలు ఎందుకు చెప్పింది..? కేంద్రం రాసిన లేఖలో ఏముంది..?

నదీ జలాల పంపకాల విషయంలో తెలుగు రాష్ట్రాల మధ్య వివాదాలు కొనసాగుతున్న వేళ, ఆంధ్రప్రదేశ్ ప్రభుత్వం ప్రతిపాదించిన పోలవరం-బనకచర్ల లింక్ ప్రాజెక్టు మరోసారి చర్చనీయాంశంగా మారింది. ఈ ప్రాజెక్టుపై తెలంగాణ ప్రయోజనాలకు విఘాతం కలుగుతుందంటూ ముఖ్యమంత్రి రేవంత్ రెడ్డి జూన్ 19, 2025న కేంద్ర ప్రభుత్వానికి లేఖ రాశారు. దీనిపై తాజాగా స్పందించిన కేంద్ర జలశక్తి శాఖ మంత్రి సి.ఆర్. పాటిల్, సెప్టెంబర్ 23, 2025న ముఖ్యమంత్రికి కీలకమైన హామీ ఇస్తూ ప్రత్యుత్తరం పంపారు.

కేంద్ర మంత్రి లేఖలోని ముఖ్యాంశాలు: ముఖ్యమంత్రి రేవంత్ రెడ్డికి పంపిన లేఖలో కేంద్ర మంత్రి పాటిల్ పలు కీలక విషయాలను స్పష్టం చేశారు.

ఏపీ నివేదిక సమర్పణ: ఆంధ్రప్రదేశ్ ప్రభుత్వం “పోలవరం-బనకచర్ల లింక్ ప్రాజెక్టు”కు సంబంధించిన ప్రాథమిక సాధ్యాసాధ్యాల నివేదికను (Preliminary Feasibility Report – PFR) తమ మంత్రిత్వ శాఖ పరిధిలోని కేంద్ర జల సంఘానికి (CWC) సమర్పించినట్లు మంత్రి ధ్రువీకరించారు.

భాగస్వామ్య రాష్ట్రాలకు సమాచారం: ఈ నివేదిక ప్రస్తుతం పరిశీలనలో ఉందని, దానిని గోదావరి బేసిన్‌లోని భాగస్వామ్య రాష్ట్రాలైన తెలంగాణ, మహారాష్ట్ర, కర్ణాటక, ఒడిశా, మధ్యప్రదేశ్, ఛత్తీస్‌గఢ్‌లకు పంపినట్లు తెలిపారు.

తెలంగాణ అభ్యంతరాల స్వీకరణ: అత్యంత ముఖ్యంగా, “పోలవరం-బనకచర్ల లింక్ ప్రాజెక్టుపై తెలంగాణ రాష్ట్రం లేవనెత్తిన ఆందోళనలను కేంద్ర ప్రభుత్వం స్వీకరించింది” అని లేఖలో స్పష్టంగా పేర్కొన్నారు.

సంప్రదింపుల తర్వాతే ముందడుగు: ఈ ప్రాజెక్టుకు సంబంధించిన సాంకేతిక-ఆర్థిక అంచనా (techno-economic appraisal) ప్రక్రియను నిబంధనల ప్రకారమే చేపడతామని, సంబంధిత అధికారులు  అన్ని భాగస్వామ్య రాష్ట్రాలతో సంప్రదింపులు జరిపిన తర్వాతే తుది నిర్ణయం ఉంటుందని హామీ ఇచ్చారు.

ఈ లేఖ ద్వారా, ప్రాజెక్టు విషయంలో ఏపీ ఏకపక్షంగా వ్యవహరించడానికి వీల్లేదని, తెలంగాణ లేవనెత్తిన ప్రతీ అభ్యంతరాన్ని పరిగణనలోకి తీసుకుంటామని కేంద్రం పరోక్షంగా స్పష్టం చేసినట్లయింది. భాగస్వామ్య రాష్ట్రాలన్నింటినీ సంప్రదించాకే ప్రాజెక్టు భవితవ్యం తేలనుండటంతో ఈ ప్రక్రియ మరింత సంక్లిష్టంగా మారనుంది.