Rains: తెలంగాణలో వచ్చే మూడు నుంచి ఐదు రోజులు భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. రాష్ట్రంలోని పలుచోట్ల ఇప్పటికే మోస్తరు వర్షాలు కురుస్తుండగా, కొన్ని జిల్లాల్లో భారీ నుంచి అతిభారీ వర్షాలు పడే సూచనలు కనిపిస్తున్నాయి. గురువారం వరకు ఈ వర్షాల ప్రభావం ఉండే అవకాశముందని అధికారులు చెబుతున్నారు.
మొదట ఆదిలాబాద్‌, ఆసిఫాబాద్‌, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్‌, వరంగల్‌, హన్మకొండ, జనగాం, సిద్ధిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్‌ మల్కాజ్‌గిరి, వికారాబాద్‌, సంగారెడ్డి, మెదక్‌, కామారెడ్డి వంటి జిల్లాల్లో ఉరుములు, మెరుపులతో కూడిన వర్షాలు కురిసే అవకాశం ఉందని వెల్లడించారు. ఈ జిల్లాల్లో వాతావరణ శాఖ ఎల్లో మరియు ఆరెంజ్ అలర్ట్‌లు జారీ చేసింది.
సోమవారం కూడా అదే జిల్లాల్లో వర్షాలు కురిసే అవకాశముండగా, మంగళవారం నుంచి వర్షపాతం మరింత పెరిగే సూచనలు ఉన్నాయి. ముఖ్యంగా మంగళవారం ఆదిలాబాద్‌, ఆసిఫాబాద్‌, మంచిర్యాల, నిర్మల్ వంటి ఉత్తర తెలంగాణ జిల్లాల్లో భారీ నుంచి అతిభారీ వర్షాలు పడతాయని అంచనా వేస్తున్నారు. బుధవారం కూడా ఈ ప్రభావం కొనసాగే అవకాశం ఉంది. గురువారం నుంచి వర్షాలు కొద్దిగా తగ్గిపోయే అవకాశం ఉన్నా, రాష్ట్రంలోని కొన్ని ప్రాంతాల్లో తేలికపాటి నుంచి మోస్తరు వర్షాలు కొనసాగుతాయని వాతావరణ శాఖ తెలిపింది.
ఇదిలా ఉండగా, గత 24 గంటల్లో కూడా కొన్ని జిల్లాల్లో వర్షాలు నమోదయ్యాయి. ముఖ్యంగా ఆదిలాబాద్‌, ఆసిఫాబాద్‌, సిరిసిల్ల, వికారాబాద్‌ వంటి ప్రాంతాల్లో తక్కువ నుంచి మోస్తరు వర్షపాతం కనిపించింది. వర్షాల కారణంగా కొంత మేరకు తేమ పెరిగినట్లు అధికారులు చెబుతున్నారు. ప్రజలు ముందస్తుగా జాగ్రత్తలు తీసుకోవాలని, అవసరం లేకుండా ప్రయాణాలు చేయొద్దని సూచిస్తున్నారు. ఎలాంటి హానీ జరుగకుండా స్థానిక అధికారులు చర్యలు తీసుకుంటున్నారు.