Bathukamma celebrations in Telangana: తెలంగాణ సంస్కృతి, సంప్రదాయాలకు అద్దం పట్టే బతుకమ్మ పండుగ ఉత్సవాలు సెప్టెంబర్ 21 నుండి రాష్ట్రవ్యాప్తంగా అంగరంగ వైభవంగా ప్రారంభమయ్యాయి. పూలనే దేవతగా కొలిచే ఈ ప్రత్యేకమైన పండుగ.. తొమ్మిది రోజులపాటు అత్యంత భక్తిశ్రద్ధలతో జరగనుంది. తంగేడు, గునుగు, కట్ల, గుమ్మడి వంటి వివిధ రకాల పూలతో బతుకమ్మలను అందంగా అలంకరించి మహిళలు ఈ వేడుకల్లో పాల్గొంటారు. సాధారణంగా దేవుడికి పూలు సమర్పించి పూజిస్తాం. అయితే.. బతుకమ్మ పండుగలో పూలనే దేవతగా భావించి పూజిస్తారు. ఇది ప్రకృతి ఆరాధనకు ప్రతీక. ఈ పండుగ తెలంగాణ అస్తిత్వానికి, ఆత్మగౌరవానికి నిలువుటద్దంలా నిలుస్తుంది.
గౌరీ దేవిని ఆరాధించడం: బతుకమ్మ పండుగ తెలంగాణ ప్రజల సంస్కృతి, సంప్రదాయాలు, ప్రకృతితో ఉన్న అనుబంధాన్ని తెలియజేస్తుంది. ఈ పండుగలో బతుకమ్మను గౌరీ దేవి రూపంగా భావిస్తారు. గౌరీ దేవికి పువ్వులంటే చాలా ఇష్టం. అందుకే ఆమెను పువ్వులతో అలంకరించి పూజిస్తారని నమ్ముతారు. ఇది ఆమెకు కృతజ్ఞత తెలియజేసే ఒక మార్గం.
ప్రకృతి ఆరాధన: బతుకమ్మ పండుగ ప్రధానంగా ప్రకృతితో ముడిపడి ఉంది. ఈ సమయంలో వర్షాలు కురిసి చెరువులు నిండుతాయి. రకరకాల పువ్వులు వికసిస్తాయి. వీటిని ఉపయోగించి బతుకమ్మను తయారుచేస్తారు. ఇది ప్రకృతిలోని జీవశక్తిని ఆరాధించే పండుగ.
సామాజిక ఐక్యత: బతుకమ్మ పండుగ అనేది మహిళలందరినీ ఒక చోట చేర్చి.. కలిసి ఆడిపాడే ఒక సందర్భం. ఇది సామాజిక బంధాలను, ఐక్యతను పెంపొందిస్తుంది. ఒకప్పుడు గ్రామాల్లో మహిళలు ఒక దగ్గర కలిసి.. ఈ వేడుకలను జరుపుకునేవారు. ఇది వారి మధ్య బంధాలను బలోపేతం చేసేది.
పండుగ ఎలా జరుపుకుంటారు?: ఈ పండుగ తొమ్మిది రోజులపాటు జరుగుతుంది. ప్రతి రోజు ఒక రకమైన బతుకమ్మను తయారుచేస్తారు. మహిళలు పూలను ఒక వలయాకారంలో, గోపురం ఆకారంలో పేర్చి బతుకమ్మను అలంకరిస్తారు. దీని పైన పసుపుతో చేసిన గౌరీ దేవిని ఉంచి పూజిస్తారు. రాత్రి వేళల్లో మహిళలు కొత్త దుస్తులు ధరించి బతుకమ్మల చుట్టూ చేరి పాటలు పాడుతూ.. చప్పట్లు కొడుతూ వలయాకారంలో నృత్యం చేస్తారు. ఈ పాటలు జీవితం, కుటుంబం, బతుకమ్మ గొప్పతనం గురించి ఉంటాయి. చివరి రోజున బతుకమ్మను ఊరేగింపుగా తీసుకువెళ్లి సమీపంలోని నీటి వనరులలో నిమజ్జనం చేస్తారు. దీనివల్ల పువ్వులు నీటిలో కలిసి భూమికి తిరిగి పోషకాలను అందిస్తాయని నమ్ముతారు.
