Colleges Strike : ఫీజు రీయింబర్స్‌మెంట్ బకాయిలు తక్షణమే విడుదల చేయాలని డిమాండ్ చేస్తూ తెలంగాణలోని ఉన్నత విద్యాసంస్థల సమాఖ్య ఈనెల 15 నుంచి కళాశాలలను నిరవధికంగా బంద్ చేయనున్నట్లు ప్రకటించింది. ఈ మేరకు సమాఖ్య సభ్యులు ఉన్నత విద్యామండలి ఛైర్మన్ బాలకిష్టారెడ్డిని కలిసి తమ నిర్ణయాన్ని స్పష్టం చేశారు. బకాయిలు విడుదల చేసే వరకు బంద్‌ను కొనసాగిస్తామని తేల్చిచెప్పారు. ఈ ఆందోళన వల్ల రాష్ట్రంలోని దాదాపు పది లక్షల మంది విద్యార్థుల భవిష్యత్తుపై తీవ్ర ప్రభావం పడే అవకాశం ఉంది.
సమాఖ్య సభ్యులు తెలిపిన వివరాల ప్రకారం, ప్రభుత్వం నుంచి రావాల్సిన ఫీజు రీయింబర్స్‌మెంట్ బకాయిలు రూ.10 వేల కోట్లకు పైగా పేరుకుపోయాయి. దీంతో కళాశాలల నిర్వహణ, అధ్యాపకుల వేతనాలు, ఇతర మౌలిక వసతుల కల్పన తీవ్ర సమస్యగా మారింది. ఈ పరిస్థితిని పరిష్కరించేందుకు, ఇప్పటికే టోకెన్లు విడుదల చేసిన రూ.1,200 కోట్లనైనా ఈనెల 30వ తేదీ లోగా విడుదల చేయాలని యాజమాన్యాలు డిమాండ్ చేస్తున్నాయి.
ఈ బంద్‌ను మరింత తీవ్రం చేస్తూ, మోక్షగుండం విశ్వేశ్వరయ్య జయంతిని పురస్కరించుకుని ఇంజినీర్స్ డేగా జరుపుకునే సెప్టెంబర్ 15వ తేదీని ‘బ్లాక్ డే’గా ప్రకటించాయి. ఆ రోజున ఇంజినీరింగ్, ఫార్మసీ, నర్సింగ్, ఎంబీఏ, ఎంసీఏ వంటి అన్ని వృత్తి విద్యా కళాశాలలు బంద్ పాటించనున్నాయి. డిగ్రీ, పీజీ కళాశాలలు సెప్టెంబర్ 16 నుంచి బంద్లో పాల్గొంటాయని సమాఖ్య తెలిపింది. విద్యార్థులు, అధ్యాపకులు, కళాశాలల యాజమాన్యాల మధ్య ఈ బంద్ తీవ్ర చర్చనీయాంశంగా మారింది. ప్రభుత్వం తక్షణమే స్పందించి ఈ సమస్యను పరిష్కరించాలని విద్యావేత్తలు కోరుతున్నారు. లేనిపక్షంలో ఉన్నత విద్యారంగం మరింత సంక్షోభంలో కూరుకుపోయే ప్రమాదం ఉందని వారు హెచ్చరిస్తున్నారు.
