Ponnam vs Laxman: తెలంగాణ కాంగ్రెస్ పార్టీలో మంత్రులు అడ్లూరి లక్ష్మణ్ కుమార్ మరియు పొన్నం ప్రభాకర్ మధ్య మాటల యుద్ధం తీవ్ర చర్చనీయాంశంగా మారింది. జూబ్లీహిల్స్ ఉపఎన్నిక ప్రచారం సందర్భంగా మంత్రి పొన్నం ప్రభాకర్ చేసిన వ్యాఖ్యలు ఈ వివాదానికి మూలం. ఆ వ్యాఖ్యలు దళిత మంత్రి అయిన అడ్లూరి లక్ష్మణ్‌ను ఉద్దేశించి చేసినవని, వాటిని వెనక్కి తీసుకుని క్షమాపణ చెప్పాలని మంత్రి లక్ష్మణ్ గట్టిగా డిమాండ్ చేస్తున్నారు.
తాజాగా ఈ వివాదంపై స్పందించిన మంత్రి పొన్నం ప్రభాకర్, రహ్మత్‌నగర్ భేటీలో ఏం జరిగిందనే విషయంపై పీసీసీ అధ్యక్షుడికి వివరించానని, ఆయన ఆదేశాలే శిరోధార్యమని స్పష్టం చేశారు. అయితే, లక్ష్మణ్ వ్యాఖ్యలపై మాత్రం తాను స్పందించనని అన్నారు.
మరోవైపు, మంత్రి అడ్లూరి లక్ష్మణ్ ఈ వివాదాన్ని కాంగ్రెస్ అధిష్ఠానం దృష్టికి తీసుకెళ్లారు. పొన్నం తీరుపై ఏఐసీసీ అధ్యక్షుడు మల్లికార్జున ఖర్గే మరియు రాష్ట్ర పార్టీ వ్యవహారాల ఇన్‌చార్జి మీనాక్షి నటరాజన్‌కు లేఖ రాశారు. “నేను మాదిగను కాబట్టే మంత్రి పదవి వచ్చింది. నేను మా సామాజికవర్గంలో పుట్టడం తప్పా?” అని లక్ష్మణ్ ఆవేదన వ్యక్తం చేశారు. పొన్నం అహంకారంగా మాట్లాడారని, రేపటిలోగా క్షమాపణ చెప్పకపోతే సోనియా గాంధీ, రాహుల్ గాంధీలను నేరుగా కలుస్తానని హెచ్చరించారు. ఈ క్రమంలో, పీసీసీ చీఫ్ మహేశ్ కుమార్ గౌడ్ ఇద్దరు మంత్రులతో మాట్లాడారు. బుధవారం ఉదయం వారిద్దరితో సమావేశమై సమస్యను సామరస్యంగా పరిష్కరిస్తామని హామీ ఇచ్చారు. ఈ అంతర్గత విభేదాలు పార్టీ ఐక్యతకు సవాలు విసురుతున్నాయి.
