Telangana : తెలంగాణ రైతులు ఎదుర్కొంటున్న యూరియా కొరత సమస్యను తక్షణం పరిష్కరించాలని డిమాండ్ చేస్తూ రాష్ట్ర కాంగ్రెస్ ఎంపీలు పార్లమెంట్ ఆవరణలో నిరసనకు దిగారు. కాంగ్రెస్ అగ్రనాయకురాలు ప్రియాంక గాంధీ కూడా ఈ ఆందోళనలో పాల్గొని రైతులకు మద్దతు తెలిపారు. కేంద్రంలోని బీజేపీ ప్రభుత్వం తెలంగాణ రైతులపై వివక్ష చూపుతూ, రాష్ట్రానికి కేటాయించిన యూరియాను సరఫరా చేయకుండా ఇబ్బందులకు గురిచేస్తోందని ఎంపీలు ఆరోపించారు. యూరియాను బీజేపీ పాలిత రాష్ట్రాలకు మళ్లిస్తున్నారని విమర్శించారు.

ALSO READ: YS Viveka Murder Case : వైఎస్ వివేకా హత్య కేసు.. కుమార్తె, అల్లుడిపై కేసులు కొట్టివేతకు సుప్రీం కోర్టు ఆదేశం

నల్గొండ ఎంపీ రాఘవ చౌదరి మాట్లాడుతూ.. ఖరీఫ్ సీజన్‌లో తెలంగాణకు 9.80 లక్షల మెట్రిక్ టన్నుల యూరియా కావాల్సి ఉండగా, ఆగస్టు 19 నాటికి 4.80 లక్షల టన్నులు మాత్రమే సరఫరా అయ్యాయని, 2 లక్షల టన్నుల కొరత ఉందని వెల్లడించారు. ఈ కొరత వల్ల రైతులు తీవ్ర ఆర్థిక నష్టాలను ఎదుర్కొంటున్నారని, పంటల దిగుబడి తగ్గే ప్రమాదం ఉందని ఆందోళన వ్యక్తం చేశారు. ముఖ్యమంత్రి రేవంత్ రెడ్డి జూన్‌లో కేంద్ర మంత్రి జె.పి. నడ్డాతో ఈ సమస్యను చర్చించినప్పటికీ, కేంద్రం నుంచి సరైన స్పందన రాలేదని ఎంపీలు విమర్శించారు.

రాష్ట్ర వ్యవసాయ శాఖ మంత్రి తుమ్మల నాగేశ్వరరావు జిల్లా అధికారులతో సమావేశమై, యూరియా సరఫరా పెంచేందుకు చర్యలు తీసుకుంటున్నారు. ఈ నిరసన ద్వారా తెలంగాణ రైతుల సమస్యను జాతీయ స్థాయిలో లేవనెత్తి, కేంద్రాన్ని ఒత్తిడి చేయాలని కాంగ్రెస్ భావిస్తోంది. రైతులకు తక్షణ ఉపశమనం, యూరియా సరఫరా వేగవంతం చేయాలని ఎంపీలు డిమాండ్ చేశారు.