Telangana government Telangana Rising Vision Document-2047: తెలంగాణ (Telangana) రాష్ట్ర భవిష్యత్ ప్రణాళికను తెలియజేసే ‘తెలంగాణ రైజింగ్ విజన్ డాక్యుమెంట్ 2047’ తుది రూపం తీసుకుంది. 2047 నాటికి రాష్ట్రాన్ని 3 ట్రిలియన్ డాలర్ల (US$ 3 Trillion) ఆర్థిక వ్యవస్థగా తీర్చిదిద్దడం ఈ దార్శనిక పత్రం ప్రధాన లక్ష్యం. దీని ద్వారా భారతదేశం అంచనా వేసిన జీడీపీలో దాదాపు 10 శాతం వాటాను తెలంగాణ అందించనుంది. ఈ డాక్యుమెంట్ తెలంగాణను దేశంలోనే అత్యంత శక్తివంతమైన, విజ్ఞాన ఆధారిత ఆర్థిక వ్యవస్థగా నిలబెట్టాలని లక్ష్యంగా పెట్టుకుంది.

డిసెంబర్ 8, 9 తేదీల్లో ఫ్యూచర్ సిటీలో జరగనున్న ప్రతిష్టాత్మక ‘తెలంగాణ రైజింగ్ గ్లోబల్ సమ్మిట్’లో ముఖ్యమంత్రి ఎ. రేవంత్ రెడ్డి ఈ విజన్ డాక్యుమెంట్ (Vision Document) ను ఆవిష్కరిస్తారు. ఈ సమ్మిట్ రాష్ట్ర ఆర్థిక ప్రణాళికను ప్రపంచానికి తెలియజేస్తుంది. అలాగే, గత రెండేళ్లలో కాంగ్రెస్ ప్రభుత్వం సాధించిన విజయాలను హైలైట్ చేయడానికి వేదికగా నిలుస్తుందని ముఖ్యమంత్రి కార్యాలయం (CMO) తెలిపింది.

ALSO READ: CM Revanth Reddy: పెట్టుబడులకు వేదికగా హైదరాబాద్‌.. దుబాయ్‌, సింగపూర్‌లతో పోటీ- సీఎం రేవంత్‌

మూడు కీల‌క స్తంభాలు

తెలంగాణ ప్రస్తుత ఆర్థిక వృద్ధి మార్గం 2047 నాటికి సుమారు $1.2 ట్రిలియన్ జీఎస్‌డీపీని మాత్రమే సాధిస్తుందని అంచనా. ఈ అంచనాను మూడు రెట్లు పెంచడానికి, ప్రభుత్వం మూడు పరస్పరం బలోపేతం చేసే స్తంభాలపై (Pillars) ఆధారపడిన సమగ్ర వ్యూహాన్ని ప్రతిపాదించింది:

1. మానవ వనరుల అభివృద్ధి (Human Capital Development)

2. ఉత్పాదకత ఆవిష్కరణ (Productivity and Innovation)

3. పెట్టుబడులు పొదుపు (Investment and Savings)

మానవ వనరులు (Human Capital): ప్రపంచ పోటీకి తగిన శ్రామికశక్తిని సృష్టించడానికి విద్య, నైపుణ్యం, ఆరోగ్య సంరక్షణ రంగాలలో గణనీయమైన పెట్టుబడులు పెట్టాలని రాష్ట్రం యోచిస్తోంది. ఫౌండేషన్ లెర్నింగ్‌ను బలోపేతం చేయడం, ఉన్నత స్థాయి పరిశోధనలను ప్రోత్సహించడం, తెలంగాణ టాలెంట్ పూల్ అన్ని రంగాలలో ఆవిష్కరణలను నడిపించేలా చూసుకోవడంపై దృష్టి పెడుతుంది.

ఉత్పాదకత ఆవిష్కరణ: సైన్స్, టెక్నాలజీ, ఇన్నోవేషన్ ఎకోసిస్టమ్‌ను విస్తరించడం ద్వారా మొత్తం ఉత్పాదకతను పెంచాలని లక్ష్యంగా పెట్టుకున్నారు. తెలంగాణ సైంటిఫిక్ రిటర్న్ ప్రోగ్రామ్, ఎడ్యుసిటీస్, ఫ్రాంటియర్ టెక్నాలజీ మిషన్ల ద్వారా పరిశోధనలను పరిశ్రమలుగా మార్చాలని ప్రణాళికలు రూపొందించారు.

పెట్టుబడులు-పొదుపు: ఆర్థిక క్రమశిక్షణ ద్వారా దేశీయ పొదుపు పెట్టుబడులను పెంచాలని ప్రభుత్వం భావిస్తోంది. మెరుగైన ఆర్థిక విధానాలు, మూలధన మార్కెట్లను విస్తరించడం, ప్రాజెక్టులను మరింత సమర్థవంతంగా అమలు చేయడం ద్వారా గృహ, సంస్థాగత పొదుపులను ఉత్పాదక వృద్ధిగా మార్చాలని విధానకర్తలు లక్ష్యంగా పెట్టుకున్నారు.

ఆర్థిక రంగాల మార్పు అంచనా

ఈ విజన్ డాక్యుమెంట్ ప్రకారం, రాబోయే దశాబ్దంలో తెలంగాణ ఆర్థిక వ్యవస్థలో నిర్మాణాత్మక మార్పులు చోటుచేసుకుంటాయి. వ్యవసాయం, పరిశ్రమల వాటా ప్రస్తుతమున్న 17 శాతం, 18 శాతం నుండి 15 శాతానికి తగ్గుతుందని అంచనా. అదే సమయంలో, సేవల రంగం వాటా 65 శాతం నుండి 70 శాతానికి పెరుగుతుందని భావిస్తున్నారు. ఇది విజ్ఞాన-ఆధారిత సేవలకు మారుతున్న పరివర్తనను ప్రతిబింబిస్తుంది.

2047 నాటికి, సేవల రంగం ఒక్కటే దాదాపు $1.9 ట్రిలియన్ (రాష్ట్ర జీఎస్‌డీపీలో మూడింట రెండు వంతుల కన్నా ఎక్కువ) వాటాను అందిస్తుంది. పరిశ్రమ, వ్యవసాయ రంగాలు ఒక్కొక్కటి సుమారు $0.4 ట్రిలియన్ చొప్పున వాటా అందిస్తాయని డాక్యుమెంట్ అంచనా వేసింది.

పరిశ్రమల రంగం వృద్ధి లైఫ్ సైన్సెస్, క్లీన్ మొబిలిటీ, సెమీకండక్టర్ క్లస్టర్ల ద్వారా కొనసాగుతుంది. వ్యవసాయంలో ప్రాథమిక ఉత్పత్తి నుండి అగ్రి-ఫుడ్ ప్రాసెసింగ్, ఎగుమతులు, ఫంక్షనల్ ఫుడ్స్‌ వైపు దృష్టి పెట్టనున్నారు. ఇది గ్రామీణ శ్రేయస్సును, సమగ్ర అభివృద్ధిని బలపరుస్తుంది.

మూడు అంచెల ప్రాంతీయ ప్రణాళిక

సమతుల్య ప్రాంతీయ అభివృద్ధి కోసం మూడు అంచెల (Tiers) ఆర్థిక ప్రణాళికా నమూనాని ఈ విజన్ డాక్యుమెంట్ ఆవిష్కరించింది:

1. అర్బన్ కోర్ (Urban Core): హైదరాబాద్, ప్రధాన పట్టణ సమూహాలు ఇందులో ఉంటాయి. ఇవి సాంకేతికత, ఆవిష్కరణ, ఉన్నత స్థాయి తయారీకి ప్రపంచ కేంద్రాలుగా పనిచేస్తాయి.

2. పెరి-అర్బన్ జోన్స్ (Peri-Urban Zones): మధ్య తరహా తయారీ ద్వారా ఆర్థిక సమైక్యతకు తోడ్పడతాయి.

3. రూరల్ తెలంగాణ (Rural Telangana): అగ్రిటెక్, పశుపోషణ అభివృద్ధి, అడవుల ఆధారిత పరిశ్రమలు, హస్తకళలు, సాంస్కృతిక వ్యవస్థాపకత, పర్యావరణ పర్యాటకంపై దృష్టి పెడుతుంది.

ఈ మూడు అంచెలు కలిసి ప్రాంతీయ అభివృద్ధిని, ఆర్థిక స్థితిస్థాపకతను నిర్ధారిస్తాయని డాక్యుమెంట్ పేర్కొంది.

ALSO READ: Telangana Elections: పంచాయతీ పోరుకు లైన్ క్లియర్: సర్పంచ్ ఎన్నికలపై స్టేకు హైకోర్టు ‘నో’!