Telangana High Court: గ్రూప్‌-1 అభ్యర్థులకు తెలంగాణ హైకోర్టు కీలక తీర్పుతో షాక్ ఇచ్చింది. మార్చి 10న వెలువరించిన ఫలితాలు, వాటి ఆధారంగా ప్రకటించిన జనరల్ ర్యాంకింగ్ లిస్ట్‌ను ఉన్నత న్యాయస్థానం రద్దు చేసింది. దీంతో ఎంతో కాలంగా ఉద్యోగాల కోసం ఎదురుచూస్తున్న వేలాది మంది అభ్యర్థుల ఆశలపై నీలినీడలు కమ్ముకున్నాయి.
హైకోర్టు ఆదేశాల ప్రకారం, సంజయ్‌ వర్సెస్‌ యూపీఎస్సీ కేసులో సుప్రీంకోర్టు నిర్దేశించిన మార్గదర్శకాలకు అనుగుణంగా గ్రూప్‌-1 మెయిన్స్ పరీక్షల జవాబు పత్రాలను తిరిగి మూల్యాంకనం చేయాలని తెలంగాణ పబ్లిక్ సర్వీస్ కమిషన్ (TSPSC)ని ఆదేశించింది. ఈ మొత్తం ప్రక్రియను 8 నెలల్లోపు పూర్తి చేయాలని స్పష్టం చేసింది. ఒకవేళ ఈ గడువులోగా పునఃమూల్యాంకనం పూర్తి చేయకపోతే, మెయిన్స్ పరీక్షలనే రద్దు చేయాల్సి వస్తుందని హైకోర్టు తీవ్ర హెచ్చరిక జారీ చేసింది.
ఈ వివాదం మూల్యాంకనంలో జరిగిన అవకతవకలపై కొందరు అభ్యర్థులు హైకోర్టులో పిటిషన్లు దాఖలు చేయడంతో మొదలైంది. మరోవైపు, పరీక్షలో ఎంపికైన అభ్యర్థులు తమ ఎంపికను రద్దు చేయవద్దని కోరుతూ వేర్వేరు పిటిషన్లు వేశారు. ఈ అన్ని పిటిషన్లపై న్యాయమూర్తి జస్టిస్‌ నామవరపు రాజేశ్వరరావు వాదనలు విన్నారు. రెండు వర్గాల వాదనలు, సాక్ష్యాలను పరిశీలించిన అనంతరం హైకోర్టు ఈ సంచలన తీర్పును వెలువరించింది. ఈ తీర్పుతో TSPSCపై తీవ్ర ఒత్తిడి నెలకొంది. గతంలో పేపర్ లీక్ వివాదాలతో సతమతమైన కమిషన్, ఇప్పుడు ఈ కొత్త సవాలును ఎదుర్కోవాల్సి వచ్చింది.
ఈ పరిణామం అటు అభ్యర్థుల్లో, ఇటు TSPSCలో కలవరం రేపింది. ఈ తీర్పు ఉద్యోగాల భర్తీ ప్రక్రియను మరింత ఆలస్యం చేసే అవకాశం ఉందని పలువురు నిపుణులు అభిప్రాయపడుతున్నారు. మరోవైపు, TSPSC దీనిపై ఎలా స్పందిస్తుంది, పునఃమూల్యాంకన ప్రక్రియను ఎలా నిర్వహిస్తుందనేది ఆసక్తికరంగా మారింది. ఇది తెలంగాణ రాష్ట్ర ప్రభుత్వ పాలనపై కూడా ప్రభావం చూపే అవకాశం ఉంది
