తెలంగాణలో ఎస్సీ వర్గీకరణ విధానం సోమవారం నుంచి అధికారికంగా అమలులోకి రానుంది. భారత రాజ్యాంగ నిర్మాత డాక్టర్ బీఆర్ అంబేడ్కర్ జయంతి రోజున దీనిని ప్రారంభించడం విశేషం. మూడు దశాబ్దాలుగా సాగిన నిరంతర పోరాటానికి ఫలితంగా ఈ చారిత్రాత్మక నిర్ణయం తీసుకున్నారు. ఈ నేపథ్యంలో రాష్ట్ర ప్రభుత్వం వర్గీకరణకు సంబంధించిన ఉత్తర్వులను జారీ చేయనుంది. వర్గీకరణ విధానానికి తుది రూపం ఇచ్చే క్రమంలో ఏర్పాటైన మంత్రివర్గ ఉపసంఘం ఆదివారం హైదరాబాద్‌లో ప్రత్యేకంగా సమావేశమైంది. నీటిపారుదలశాఖ మంత్రి ఉత్తమ్ కుమార్ రెడ్డి అధ్యక్షతన జరిగిన ఈ భేటీలో మంత్రులు దామోదర్ రాజనర్సింహ, పొన్నం ప్రభాకర్, సీతక్కతో పాటు ఏకసభ్య కమిషన్ ఛైర్మన్ జస్టిస్ షమీమ్ అక్తర్, న్యాయశాఖ కార్యదర్శి తిరుపతి, ఎస్సీ సంక్షేమ శాఖ అధికారులు హాజరయ్యారు.
ఈ సందర్భంగా మంత్రి ఉత్తమ్ కుమార్ రెడ్డి మాట్లాడుతూ ప్రస్తుతం రాష్ట్రంలో ఎస్సీ జనాభా 17.5 శాతంగా ఉన్నా, 2011 జనాభా లెక్కల ఆధారంగా ఇప్పటికీ 15 శాతం రిజర్వేషన్లే అమలవుతున్నాయని తెలిపారు. అలాగే క్రీమీలేయర్ విధానం ఎస్సీ వర్గీకరణలో ఉండదని ఆయన స్పష్టం చేశారు. ఇక జస్టిస్ షమీమ్ అక్తర్ నేతృత్వంలోని కమిషన్ తాము చేపట్టిన విశ్లేషణను 199 పేజీల నివేదిక రూపంలో ప్రభుత్వానికి సమర్పించింది. కమిషన్ తన పదవిని 2024 నవంబర్ 11న స్వీకరించి, తక్కువ కాలంలోనే ఈ నివేదికను సిద్ధం చేసింది. బహిరంగ విచారణలు, పర్యటనలు, ప్రజల నుంచి అందిన 4,750 వినతులు, 8,681 ఆన్‌లైన్–ఆఫ్‌లైన్ అభిప్రాయాలతో ఈ అధ్యయనం సమగ్రంగా సాగింది.
మొత్తం 59 ఎస్సీ ఉపకులాలను మూడు విభాగాలుగా వర్గీకరించారు. ఇందులో గ్రూప్ 1 – అన్ని విధాలా అత్యంత వెనుకబడిన కులాలు, గ్రూప్ 2 – మధ్యస్థ స్థితిలో ఉన్న లబ్దిపొందిన కులాలు, గ్రూప్ 3 – మెరుగైన స్థితిలో ఉన్న ఉపకులాలు ఉండనున్నాయి. ఈ వర్గీకరణ ప్రక్రియ ఎస్సీ సముదాయంలోని అన్ని కులాల మధ్య సమన్యాయం సాధించేందుకు దోహదపడుతుందని అధికారులు పేర్కొన్నారు. ప్రయోజనాల పంపిణీలో సమతుల్యతను తీసుకురావడమే దీని ముఖ్య ఉద్దేశ్యమని తెలిపారు. డాక్టర్ అంబేడ్కర్ ఆశయాల ప్రకారమే ఎస్సీ వర్గీకరణ జరగుతుందన్న నమ్మకాన్ని ప్రభుత్వం వ్యక్తం చేస్తోంది. దశాబ్దాలుగా ఎదురుచూస్తున్న ఈ అభివృద్ధి పథకానికి మొదటి అడుగు పడిందన్న సంకేతాలు స్పష్టంగా కనిపిస్తున్నాయి.
