Direct scholarship deposit for Telangana students : ఫీజు రీయింబర్స్‌మెంట్ వస్తుంది కదా అని ధీమాగా ఉంటే.. కోర్సు చివర్లో కాలేజీ యాజమాన్యాలు సర్టిఫికెట్ల కోసం వేధిస్తున్నాయా? ప్రభుత్వం డబ్బులు విడుదల చేసినా అవి మీ చేతికి రావడం లేదా? ఏళ్లుగా లక్షలాది మంది విద్యార్థులను వేధిస్తున్న ఈ సమస్యకు తెలంగాణ ప్రభుత్వం చెక్ పెట్టేందుకు సిద్ధమవుతోంది. ఎస్సీ విద్యార్థులకు ఇప్పటికే అమలవుతున్న ఒక విధానాన్ని ఇకపై అందరికీ వర్తింపజేయాలని యోచిస్తోంది. అసలు ఏంటీ కొత్త విధానం? దీనివల్ల విద్యార్థులకు కలిగే ప్రయోజనం ఏంటి? కాలేజీల దందాకు నిజంగానే అడ్డుకట్ట పడుతుందా?

ఎందుకీ నిర్ణయం : ప్రభుత్వం ఏటా విద్యార్థుల బోధన రుసుములు, స్కాలర్‌షిప్‌ల కోసం సుమారు రూ.2,400 కోట్ల నుంచి రూ.2,600 కోట్లు విడుదల చేస్తోంది. రాష్ట్రవ్యాప్తంగా 12.5 లక్షల మందికి పైగా విద్యార్థులు దీనిపై ఆధారపడి చదువుకుంటున్నారు. అయితే, ప్రభుత్వం కళాశాలలకు నిధులు విడుదల చేస్తున్నా, కొన్ని యాజమాన్యాలు మాత్రం విద్యార్థుల నుంచి బలవంతంగా ఫీజులు వసూలు చేస్తున్నాయనే ఫిర్యాదులు వెల్లువెత్తుతున్నాయి. “ప్రభుత్వం నుంచి డబ్బులు రాలేదు, ఫీజు కడితేనే సర్టిఫికెట్లు ఇస్తాం” అని వేధిస్తున్నాయని, ఆ తర్వాత ప్రభుత్వం నుంచి నిధులు వచ్చినా ఆ డబ్బును విద్యార్థులకు తిరిగి ఇవ్వడం లేదని సంక్షేమ శాఖల దృష్టికి వచ్చింది. ఈ నేపథ్యంలో, కళాశాలల ప్రమేయాన్ని తగ్గించి, ప్రయోజనాన్ని నేరుగా విద్యార్థికే అందించాలనే ప్రతిపాదనను అధికారులు ప్రభుత్వానికి నివేదించారు.

ఎస్సీల తరహాలో అమలు : కేంద్ర ప్రభుత్వ సంస్కరణల మేరకు, రాష్ట్ర ప్రభుత్వం 2024-25 విద్యా సంవత్సరం నుంచి ఎస్సీ విద్యార్థుల బోధన ఫీజులు, ఉపకారవేతనాలను నేరుగా వారి బ్యాంకు ఖాతాల్లోనే జమ చేస్తోంది. ఈ విధానంలో, రాష్ట్ర ప్రభుత్వం తన 40% వాటాను జమ చేయగానే, కేంద్రం తన 60% వాటాను విడుదల చేస్తుంది. ఈ మొత్తం నేరుగా విద్యార్థి ఖాతాలోకి వెళ్తుంది.
ఇదే విధానాన్ని ఇప్పుడు ఎస్టీ, బీసీ, మైనార్టీ, ఈబీసీ విద్యార్థులకు కూడా అమలు చేసేందుకు ప్రభుత్వం కసరత్తు చేస్తోంది.

ఎస్టీ విద్యార్థులకు: కేంద్రం 75%, రాష్ట్రం 25% నిధులు భరిస్తున్నందున, వీరికి కూడా ఇదే విధానం అమలు చేసే విషయాన్ని కేంద్రం పరిశీలిస్తోంది.
బీసీ, మైనార్టీ, ఈబీసీలకు: ఈ విద్యార్థులకు అయ్యే పూర్తి ఖర్చును రాష్ట్ర ప్రభుత్వమే భరిస్తున్నందున, ఎలాంటి అడ్డంకులు లేకుండా నేరుగా వారి ఖాతాల్లోకే డబ్బు జమ చేయవచ్చని సంక్షేమ శాఖలు భావిస్తున్నాయి.

ఈ నిర్ణయం అమలైతే, రాష్ట్రవ్యాప్తంగా బోధన ఫీజుల చెల్లింపులో ఒకే విధానం అమల్లోకి వస్తుంది.
ఒకే గొడుగు కిందకు ఉపకారవేతనాలు గతంలో స్కాలర్‌షిప్‌ల కోసం దరఖాస్తు చేసుకోవాలంటే విద్యార్థులు మీ-సేవ, ఇంటర్నెట్ కేంద్రాల చుట్టూ తిరగాల్సి వచ్చేది. ఈ కష్టాలకు చెక్ పెడుతూ కేంద్ర ప్రభుత్వం “నేషనల్ స్కాలర్‌షిప్ పోర్టల్”ను అందుబాటులోకి తెచ్చింది. కేంద్ర, రాష్ట్ర ప్రభుత్వాలు, ఇతర ప్రభుత్వ సంస్థలు అందించే అన్ని రకాల స్కాలర్‌షిప్‌ల వివరాలు, దరఖాస్తు ప్రక్రియ ఇప్పుడు ఈ ఒక్క పోర్టల్‌లోనే లభిస్తున్నాయి. ఇది దేశవ్యాప్తంగా విద్యార్థులకు ఎంతగానో ఆసరాగా నిలుస్తోంది.