Youth fitness trend in Telangana : “ఆరోగ్యమే మహాభాగ్యం”.. పెద్దలు చెప్పిన ఈ మాట నేటి ఉరుకులు పరుగుల జీవనంలో అక్షరసత్యంగా నిలుస్తోంది. గంటల తరబడి కంప్యూటర్ల ముందు కూర్చోవడం, మారిన ఆహారపు అలవాట్లతో యువత సైతం ఊబకాయం, చిన్న వయసులోనే దీర్ఘకాలిక వ్యాధుల బారిన పడుతోంది. ఈ ప్రమాద ఘంటికలను గ్రహించిన నేటి యువతరం, తమను తాము కాపాడుకోవడానికి కొత్త మంత్రాన్ని జపిస్తోంది. 

ఒకప్పుడు జిమ్ అంటే కేవలం నగరాలకే పరిమితమైన సంస్కృతి. కానీ ఇప్పుడు ఆ ధోరణి మారింది. సిద్దిపేట వంటి పట్టణాల్లో సైతం యువత ఆరోగ్య స్పృహతో జిమ్‌ల బాట పడుతోంది. ఆధునిక జీవనశైలి తెచ్చిపెడుతున్న ఆరోగ్య సమస్యల నుంచి తమను తాము కాపాడుకోవడమే దీనికి ప్రధాన కారణం.

కుర్చీలకే అతుక్కుపోతూ.. రోగాలను కొనితెచ్చుకుంటూ..
ఆధునిక జీవనంలో వ్యాయామం అనే మాటకు తావులేకుండా పోయింది. విద్యార్థులు చదువుతో, ఉద్యోగస్తులు పనితో అధిక సమయం గడుపుతున్నారు. ముఖ్యంగా కార్యాలయాల్లో గంటల తరబడి కంప్యూటర్ల ముందు కూర్చోవడంతో శారీరక శ్రమ పూర్తిగా కరవైంది. దీని ఫలితంగా యువతలో సైతం ప్రతి ముగ్గురిలో ఒకరు ఊబకాయంతో బాధపడుతున్నారని, గుండె సంబంధిత వ్యాధులు, మధుమేహం వంటివి సర్వసాధారణంగా మారుతున్నాయని వైద్యులు హెచ్చరిస్తున్నారు. ఈ నేపథ్యంలో, ఆరోగ్యకరమైన జీవితం కోసం ప్రతిరోజూ కనీసం గంట వ్యాయామం తప్పనిసరి అని నిపుణులు సూచిస్తున్నారు.

పట్టణాల్లో వెలసిన ‘ఆరోగ్య’ కేంద్రాలు
ఈ పెరిగిన ఆరోగ్య స్పృహకు అనుగుణంగా పట్టణాల్లో జిమ్, ఫిట్‌నెస్ కేంద్రాలు పుట్టగొడుగుల్లా వెలుస్తున్నాయి. ఒక్క సిద్దిపేట పట్టణంలోనే అత్యాధునిక పరికరాలతో సుమారు 10 జిమ్‌లు ఏర్పాటయ్యాయి.

సమయాలు: తెల్లవారుజాము 5 గంటల నుంచి ఉదయం 9 గంటల వరకు, తిరిగి సాయంత్రం 5 గంటల నుంచి రాత్రి 9 గంటల వరకు ఈ కేంద్రాలు యువతతో సందడిగా మారుతున్నాయి.
రుసుములు: పరికరాలు, సౌకర్యాలను బట్టి నెలకు రూ.500 నుంచి రూ.1500 వరకు రుసుము వసూలు చేస్తున్నారు.
వ్యక్తిగత శిక్షణ: కచ్చితమైన ఫలితాల కోసం చాలామంది వ్యక్తిగత శిక్షకుడిని (Personal Trainer) నియమించుకుంటున్నారు. వ్యాయామంతో పాటు ఎలాంటి పౌష్టికాహారం తీసుకోవాలో వీరు సూచనలిస్తున్నారు. ఇందుకోసం నెలకు సుమారు రూ.6 వేల వరకు అదనంగా చెల్లిస్తున్నారు.

జిమ్‌కు క్యూ కడుతున్నది వీరే..
ఇంటర్మీడియట్ విద్యార్థుల నుంచి డిగ్రీ, పీజీ చదివే యువత, సాఫ్ట్‌వేర్ ఉద్యోగులు, వివాహానికి సిద్ధమవుతున్న యువతీ యువకులు సైతం ఫిట్‌నెస్‌పై దృష్టి సారిస్తున్నారు. మహిళల కోసం ప్రత్యేకంగా ఫిట్‌నెస్ కేంద్రాలు కూడా అందుబాటులోకి వచ్చాయి. జిమ్‌లకు వెళ్లలేని వారు, సంఘాలుగా ఏర్పడి పార్కులు, మైదానాల్లో నడక, పరుగు వంటివి సాధన చేస్తున్నారు.
వ్యాయామంతో ఒత్తిడి దూరం – పూర్ణచంద్, సిద్దిపేట

“గత నాలుగేళ్లుగా క్రమం తప్పకుండా జిమ్ చేస్తున్నాను. రోజూ సాయంత్రం గంటన్నర పాటు కసరత్తులు చేస్తా. ఎన్ని పనులున్నా జిమ్‌కు వెళ్లడం మానను. దీనివల్ల శారీరకంగా దృఢంగా మారడమే కాదు, మానసిక ఒత్తిడి నుంచి అద్భుతమైన ఉపశమనం లభిస్తుంది. కండరాలు పటుత్వంగా మారతాయి, రాత్రిళ్లు నిద్ర కూడా బాగా పడుతుంది.”
మొత్తం మీద, యువతలో పెరుగుతున్న ఈ ఫిట్‌నెస్ ఉద్యమం ఒక శుభపరిణామం. ఇది కేవలం శారీరక ఆరోగ్యానికే కాక, మానసిక ప్రశాంతతకు కూడా దోహదపడి, ఆరోగ్యకరమైన సమాజ నిర్మాణానికి పునాది వేస్తోంది.