RTC live bus tracking on Google Maps : “బస్సు కోసం ఎంతసేపు ఆగాలి?”, “ఈ బస్సు ఎక్కడికి వెళ్తుంది?”, “తర్వాతి బస్సు ఎప్పుడు..?”.. ఆర్టీసీ ప్రయాణికులకు నిత్యం ఎదురయ్యే ప్రశ్నలివి. ఈ తిప్పలకు చెక్ పెడుతూ, తెలంగాణ ఆర్టీసీ ప్రయాణికులకు ఓ తీపి కబురు అందించింది. ఇకపై, మీరు ఎక్కాల్సిన సిటీ బస్సు, జిల్లా బస్సు, చివరికి అంతర్రాష్ట్ర బస్సు సైతం ఎక్కడుందో, మీ బస్టాప్‌కు ఎప్పుడు వస్తుందో మీ అరచేతిలోని గూగుల్ మ్యాప్స్‌లోనే చూసుకోవచ్చు. అసలు ఈ అద్భుతం ఎలా సాధ్యం కానుంది..? దీనివల్ల ప్రయాణికులకు ఎలాంటి ప్రయోజనం చేకూరనుంది..?

గూగుల్ ప్రతిపాదన.. ఆర్టీసీ సానుకూలత : తెలంగాణ ఆర్టీసీ బస్సుల లైవ్ ట్రాకింగ్ సమాచారాన్ని తమ మ్యాప్స్‌లో పొందుపరిచేందుకు అనుమతించాలని గూగుల్ సంస్థ రాష్ట్ర ప్రభుత్వాన్ని కోరింది. దీనిపై సానుకూలంగా స్పందించిన ఆర్టీసీ యాజమాన్యం, గూగుల్ ప్రతినిధులతో చర్చలు జరిపింది. రాష్ట్రంలోని దాదాపు 9,500 ఆర్టీసీ బస్సులకు ఇప్పటికే జీపీఎస్ సౌకర్యం ఉండటంతో, వాటి లైవ్ డేటాను గూగుల్‌కు షేర్ చేయడానికి అంగీకరించింది. దీపావళి నాటికి ఈ ప్రక్రియను పూర్తిచేయాలని ఆర్టీసీ ఎండీ నాగిరెడ్డి అధికారులను ఆదేశించారు.

ఇకపై ప్రయాణం ఇలా : ఈ సేవలు అందుబాటులోకి వచ్చాక, ప్రయాణికులు గూగుల్ మ్యాప్స్ ద్వారా తమ ప్రయాణాన్ని సులభంగా ప్లాన్ చేసుకోవచ్చు.

గమ్యస్థానాన్ని ఎంచుకోండి: గూగుల్ మ్యాప్స్‌లో, ‘పబ్లిక్ ట్రాన్స్‌పోర్ట్’ (ట్రాన్సిట్) సింబల్‌ను ఎంచుకుని, మీరు ఎక్కడి నుంచి ఎక్కడికి వెళ్లాలనుకుంటున్నారో టైప్ చేయాలి.

బస్సు వివరాలు పొందండి: వెంటనే, మీ సమీపంలోని బస్టాప్ ఎంత దూరంలో ఉంది, అక్కడికి ఏయే బస్సులు వస్తాయి, మీరు ఎక్కాల్సిన బస్సు నంబర్, అది మీ స్టాప్‌కు ఎన్ని నిమిషాల్లో చేరుకుంటుంది వంటి పూర్తి వివరాలు కనిపిస్తాయి.

లైవ్‌లో ట్రాక్ చేయండి: ప్రతి 30 సెకన్లకు ఒకసారి బస్సు కదలికలు అప్‌డేట్ అవుతుండటంతో, బస్సు ఎక్కడుందో మీరు లైవ్‌లో ట్రాక్ చేయవచ్చు.
ఉదాహరణకు, మీరు షాపూర్‌నగర్ నుంచి సికింద్రాబాద్ వెళ్లాలనుకుంటే, సికింద్రాబాద్ వెళ్లే బస్సు ప్రస్తుతం ఎక్కడ ఉంది, మీ బస్టాప్‌కు ఎప్పుడు వస్తుందో కచ్చితంగా తెలుసుకోవచ్చు. దీనివల్ల బస్సుల కోసం గంటల తరబడి పడిగాపులు కాయాల్సిన అవసరం ఉండదు.

‘గమ్యం’కు ప్రత్యామ్నాయం : ప్రస్తుతం ఆర్టీసీకి ‘గమ్యం’ పేరుతో సొంత యాప్ ఉన్నప్పటికీ, నిర్వహణ లోపాలతో అది ప్రయాణికులకు పూర్తిస్థాయిలో ఉపయోగపడటం లేదు. ఇప్పుడు, ప్రపంచవ్యాప్తంగా కోట్లాది మంది వినియోగించే గూగుల్ మ్యాప్స్‌తో ఆర్టీసీ అనుసంధానం కావడం, ప్రజా రవాణా వ్యవస్థను బలోపేతం చేసే దిశగా ఓ విప్లవాత్మక అడుగు అని చెప్పవచ్చు. ఇది ప్రయాణికులకు సమయాన్ని ఆదా చేయడమే కాకుండా, ఆర్టీసీ బస్సుల వినియోగాన్ని కూడా పెంచనుంది.