Today Rain in tg: రాష్ట్రంలో నిన్నటి లాగే నేను అక్కడక్కడ సాయంత్రం నుంచి రాత్రి సమయంలో తేలికపాటి వర్షాలు కురుస్తాయని హైదరాబాద్ వాతావరణ కేంద్రం పేర్కొంది. ఉత్తర, తూర్పు తెలంగాణలోని ఆదిలాబాద్, ఆసిఫాబాద్, నిర్మల్, నిజామాబాద్, జగిత్యాల, పెద్దపల్లి, మంచిర్యాల, భూపాలపల్లి, ములుగు, భద్రాద్రి – కొత్తగూడెం వంటి ప్రాంతాల్లో సాయంత్రం నుంచి రాత్రి సమయంలో మోస్తరు వర్షాలు కురుస్తాయని పేర్కొంది.
మధ్య, పశ్చిమ తెలంగాణలోని కొన్ని ప్రాంతాల్లో అక్కడక్కడ తేలికపాటి నుంచి మోస్తరు వర్షాలు కురుస్తాయని హైదరాబాద్ వాతావరణ కేంద్రం తెలిపింది. ఇతర ప్రాంతాల్లో మరీ ముఖ్యంగా హైదరాబాద్, ఇతర ప్రాంతాల్లో సాయంకాలం పూట.. కొద్దిసేపు తేలికపాటి చిరు జల్లులు మాత్రమే కురిసే అవకాశాలు ఉన్నట్లు తెలిపింది.
రాష్ట్రంలో వర్షపు లోటు కొంతవరకు తీరినా.. ఇంకా తీరాల్సిన అవసరం చాలా ఉందని హైదరాబాద్ వాతావరణ కేంద్రం అభిప్రాయ పడింది. జూలై 2-3 వారాల్లో రుతుపవనాలకు మళ్ళీ బ్రేక్ పడనుంది అని తెలిపింది. అల్పపీడనం కారణంగా ఇప్పటికీ రాష్ట్రంలోని వర్షపాతం మంచి స్థాయిలోనే ఉందని తెలిపింది. రాష్ట్రంలో సగటు వర్షపాతం సాధారణ వర్షపాతం 145.5 మిమీ కంటే (-1%) తక్కువగా 144 మిమీగా ఉందని వివరించింది.
చాలా జిల్లాలు ప్రస్తుతం మంచి స్థితిలోనే ఉన్నా.. జూలై 2-3 వారాలలో రుతుపవనాలకు మళ్ళీ బ్రేక్ పడుతుండటంతో ఆయా జిల్లాలు మళ్ళీ లోటును ఎదుర్కొంటున్నందున ఈసారి వర్షాకాలం బాగుండకపోవచ్చుననే అభిప్రాయాలు వెల్లడి అవుతున్నాయి. పలు ప్రాంతాల్లో మధ్యాహ్నం వరకు వాతావరణం పొడిగానే ఉంటుందని.. సాయంత్రం నుంచి రాత్రి కొద్ది సేపు మోస్తరు వర్షం పడుతుందని తెలిపింది.
తెలంగాణలో జూన్ మొదటి వారంలోనే రుతుపవనాలు ప్రవేశించినప్పటికీ, వాటి ప్రభావం అంతగా లేదు. ప్రస్తుతం నెలకొన్న వాతావరణ పరిస్థితులు రుతుపవనాలు చురుకుగా మారడానికి అనుకూలంగా ఉన్నాయని వాతావరణ నిపుణులు చెబుతున్నారు. రాష్ట్రవ్యాప్తంగా వర్షాలు విస్తరించి, రైతాంగానికి ఉపశమనం కలిగించే అవకాశం ఉంటుందని ఇప్పటికే వాతావరణ కేంద్రం తెలిపింది.