Indian startup for job seekers : ప్రతిభ ఉంది.. కానీ ఉద్యోగం రావట్లేదు! సరైన రెజ్యూమె లేక, మంచి అవకాశాలను చేజార్చుకుంటున్నారా? ఈ సమస్యకే ఓ అద్భుతమైన పరిష్కారాన్ని కనుగొంది మన వరంగల్ అమ్మాయి ఐత సాయి మయూఖ. ‘జాబ్ హ్యాక్ ప్రో’ అనే తన స్టార్టప్ ద్వారా, నిరుద్యోగ యువతకు ఉద్యోగ వేటలో అండగా నిలుస్తోంది. కేవలం మీరు దరఖాస్తు చేయాలనుకుంటున్న ఉద్యోగపు లింక్‌ను పంపిస్తే చాలు, క్షణాల్లో ఆ ఉద్యోగానికి సరిగ్గా సరిపోయే రెజ్యూమెను సిద్ధం చేసి ఇస్తోంది. అసలు ఎవరీ మయూఖ..? ఆమె ప్రస్థానం ఎలా సాగింది..?

ప్రతిభ ఉన్న ఎంతోమంది భారతీయ యువత, కేవలం సరైన రెజ్యూమెను తయారు చేసుకోలేక, మంచి ఉద్యోగ అవకాశాలను కోల్పోతున్నారని మయూఖ గమనించారు.

ఏటీఎస్ సమస్య: పెద్ద కంపెనీలు, వేలాది దరఖాస్తులను వడపోసేందుకు ‘ఆటోమేటెడ్ ట్రాకింగ్ సిస్టమ్’ (ATS)ను ఉపయోగిస్తాయి. ఆ సిస్టమ్‌కు అనుగుణంగా రెజ్యూమె లేకపోతే, అది ఎంత ప్రతిభావంతుడిదైనా తిరస్కరించబడుతుంది. ఈ సమస్యను అధిగమించేందుకే, మయూఖ ‘జాబ్ హ్యాక్ ప్రో’ అనే ఆర్టిఫిషియల్ ఇంటెలిజెన్స్ (AI) ఆధారిత సంస్థను స్థాపించారు.

‘జాబ్ హ్యాక్ ప్రో’.. పనిచేసేదిలా : ఈ స్టార్టప్ ఉద్యోగార్థులకు అనేక విధాలుగా సహాయపడుతుంది.
లింక్ పోస్ట్ చేస్తే చాలు: మీరు దరఖాస్తు చేయాలనుకుంటున్న ఉద్యోగానికి సంబంధించిన లింక్‌ను ఈ ప్లాట్‌ఫామ్‌లో పోస్ట్ చేస్తే సరిపోతుంది.
క్షణాల్లో రెజ్యూమె: ఆ ఉద్యోగానికి అవసరమైన నైపుణ్యాలు, కీ-వర్డ్స్‌తో, ATS ఫ్రెండ్లీగా, క్షణాల్లో ఓ ఆకర్షణీయమైన రెజ్యూమెను ఇది సిద్ధం చేస్తుంది.

ఇతర సేవలు: రెజ్యూమెతో పాటు, రిక్రూటర్లకు పంపే మెసేజ్‌లను కూడా ఆకట్టుకునేలా తీర్చిదిద్దుతుంది. దరఖాస్తుల స్టేటస్‌ను కూడా ట్రాక్ చేస్తుంది. ఈ సేవలను ఉపయోగించుకుని, ఇప్పటికే ఎంతోమంది పెద్ద పెద్ద సంస్థల్లో కొలువులు సంపాదించారని మయూఖ గర్వంగా చెబుతున్నారు.

మయూఖ ప్రస్థానం.. స్ఫూర్తిదాయకం : వరంగల్ టు అమెరికా: వరంగల్‌కు చెందిన మయూఖ, నిట్-వరంగల్‌లో సివిల్ ఇంజినీరింగ్ పూర్తి చేశారు. ఉన్నత చదువుల కోసం అమెరికా వెళ్లి, ఒహియో స్టేట్ యూనివర్సిటీ నుంచి ఎంఎస్ పట్టా పొందారు.

హార్వర్డ్ ఎంబీఏ: సాఫ్ట్‌వేర్ ఉద్యోగం చేస్తూనే, ప్రతిష్ఠాత్మక హార్వర్డ్ బిజినెస్ స్కూల్ నుంచి ఆన్‌లైన్‌లో ఎంబీఏ పూర్తి చేశారు.

అంతర్జాతీయ వేదికపై : మయూఖ కృషికి తాజాగా ఓ అరుదైన గౌరవం దక్కింది.
ఆమె సంస్థ ‘జాబ్ హ్యాక్ ప్రో’, ప్రపంచంలోనే అతిపెద్ద టెక్నాలజీ సదస్సు అయిన ‘వెబ్ సమ్మిట్ – 2025’కు ఎంపికైంది. ఈ సమ్మిట్‌కు ‘గ్లోబల్ స్టార్టప్ ఫౌండర్’గా భారతదేశం నుంచి ఎంపికైన ఏకైక వ్యక్తి మయూఖ కావడం విశేషం. “పది లక్షల మందికి మా స్టార్టప్ ద్వారా ఉద్యోగాలు చూపించాలన్నదే నా లక్ష్యం,” అని మయూఖ తన ఆశయాన్ని పంచుకున్నారు.