ABVP protest at Inter Board Office : హైదరాబాద్ నాంపల్లిలోని తెలంగాణ ఇంటర్మీడియట్ విద్యామండలి (TGBIE) ప్రాంగణం ఒక్కసారిగా రణరంగాన్ని తలపించింది! అనుమతులు, గుర్తింపులు లేవు… కానీ అడ్మిషన్ల పేరుతో వేల మంది విద్యార్థుల జీవితాలతో చెలగాటమాడుతున్న కార్పొరేట్, ప్రైవేటు కళాశాలలపై చట్టపరమైన చర్యలు తీసుకోవాలని డిమాండ్ చేస్తూ విద్యార్థి పరిషత్ నేతలు చేపట్టిన నిరసన జ్వాలలు మిన్నుముట్టాయి. హఠాత్తుగా కార్యాలయం ముట్టడికి యత్నించిన ఆందోళనకారుల నినాదాలతో నాంపల్లి వీధులు హోరెత్తాయి. 

సమరశంఖం పూరించిన ఏబీవీపీ: ముట్టడికి మెరుపు యత్నం : రాష్ట్రంలో ఎలాంటి అనుమతులు లేకుండా, కనీస ప్రమాణాలు లేని భవనాల్లో చట్టవిరుద్ధంగా కొనసాగుతున్న జూనియర్ కళాశాలల పట్ల ఇంటర్ బోర్డు అధికారులు ‘కంటితుడుపు చర్యల’తో కాలయాపన చేస్తున్నారని అఖిల భారతీయ విద్యార్థి పరిషత్ (ఏబీవీపీ) తీవ్ర ఆగ్రహం వ్యక్తం చేసింది.

నాంపల్లిలోని విద్యామండలి కార్యాలయానికి పెద్ద ఎత్తున చేరుకున్న ఏబీవీపీ శ్రేణులు, నేతలు ఒక్కసారిగా బోర్డు ముఖ్య ద్వారం వద్ద భైఠాయించారు. “అనుమతుల్లేని అక్రమ కళాశాలల గుర్తింపును రద్దు చేయాలి”, “విద్యార్థుల భవిష్యత్తును పణంగా పెడుతున్న యాజమాన్యాలపై క్రిమినల్ కేసులు నమోదు చేయాలి” అంటూ  నినాదాలు చేశారు.

పోలీసులతో తీవ్ర తోపులాట… భగ్గుమన్న నిరసన : ప్రశాంతంగా ధర్నా నిర్వహిస్తున్న విద్యార్థి నాయకులు, బోర్డు అధికారులను కలిసి నేరుగా వినతిపత్రం అందజేసేందుకు లోపలికి దూసుకెళ్లేందుకు యత్నించడంతో వాతావరణం ఒక్కసారిగా వేడెక్కింది. ముందస్తు సమాచారంతో బారికేడ్లు ఏర్పాటు చేసి మోహరించిన పోలీసులు, నిరసనకారులను గొలుసుకట్టుగా ఏర్పడి అడ్డుకున్నారు. దీంతో ఆందోళనకారులకు, పోలీసులకు మధ్య తీవ్ర స్థాయిలో తోపులాట, వాగ్వాదం చోటుచేసుకుంది. పోలీసులు ఎంత వారించినా వెనక్కి తగ్గని ఏబీవీపీ నాయకులు, గేట్లను నెట్టుకుని లోపలికి ప్రవేశించేందుకు యత్నించడంతో నాంపల్లి ఇంటర్ బోర్డు ప్రాంగణంలో ‘నీయా-నా పంతం’ అన్నట్లుగా పరిస్థితి మారింది.

నేతల బలవంతపు అరెస్టులు.. రక్షణగా అదనపు బలగాలు : పోలీసులతో జరిగిన తోపులాటలో పలువురు విద్యార్థి నేతలు కిందపడిపోగా, ఉద్రిక్తత మరింత పెరగకుండా పోలీసులు నిరసనకారులను బలవంతంగా అదుపులోకి తీసుకున్నారు. ఏబీవీపీ ముఖ్య నాయకులతో పాటు డజన్ల కొద్దీ కార్యకర్తలను పోలీసులు చుట్టుముట్టి బలవంతంగా పోలీసు వ్యాన్లలోకి ఎక్కించి స్థానిక పోలీస్ స్టేషన్‌కు తరలించారు. అరెస్టు చేసి తీసుకెళ్తున్న సమయంలోనూ విద్యార్థి నేతలు ఇంటర్ బోర్డు అధికారులకు, ప్రభుత్వ వైఖరికి వ్యతిరేకంగా నినాదాలు హోరెత్తించారు. అసనిర్బంధ చర్యలకు నిరసనగా బోర్డు పరిసర ప్రాంతాల్లో గట్టి పోలీస్ బందోబస్తు ఏర్పాటు చేశారు.

‘బాధ్యులపై చర్యలు తీసుకోకపోతే పోరాటం తీవ్రతరం చేస్తాం’ : అరెస్టు అనంతరం ఏబీవీపీ నాయకులు విలేకరులతో మాట్లాడుతూ ఇంటర్ బోర్డు అధికారుల ఉదాసీనతపై మండిపడ్డారు. విద్యార్థుల భవిష్యత్తుతో వ్యాపారం చేస్తున్న అక్రమ కళాశాలలపై చర్యలు తీసుకోకుండా బోర్డు యంత్రాంగం  వ్యవహరిస్తోందని దుయ్యబట్టారు. విద్యాశాఖ నిబంధనలు తుంగలో తొక్కి నడుస్తున్న ప్రైవేటు సంస్థల తీరును ప్రశ్నిస్తే అరెస్టులతో గొంతు నొక్కాలని చూడటం సమంజసం కాదని స్పష్టం చేశారు. అనుమతులు లేని కాలేజీలను తక్షణమే మూసివేసి, బాధ్యులైన అధికారులపై చర్యలు తీసుకునేంతవరకు తమ పోరాటం ఆగేది లేదని హెచ్చరించారు.