ACB raids on Transport Department : “తర్వాత ఎవరు? ఎప్పుడు ఎవరి ఇంటిపై దాడి జరుగుతుందో?” – ఇదీ ప్రస్తుతం తెలంగాణ రవాణా శాఖలో పనిచేస్తున్న కొందరు అవినీతి అధికారుల గుండెల్లో రైళ్లు పరిగెత్తిస్తున్న ప్రశ్న. గత ప్రభుత్వ హయాంలో అక్రమాలకు పాల్పడి, కోట్లు కూడబెట్టారన్న ఆరోపణలపై, అవినీతి నిరోధక శాఖ (ACB) కొరడా ఝుళిపిస్తుండటంతో, ఆ శాఖలో తీవ్ర ప్రకంపనలు మొదలయ్యాయి. ఇప్పటికే ఇద్దరు ఉన్నతాధికారులు ఏసీబీ వలకు చిక్కడంతో, మిగతా వారిలో టెన్షన్ మొదలైంది. అసలు ఈ దాడుల వెనుక ఉన్నదెవరు? ఏసీబీ తదుపరి లక్ష్యం ఎవరు?

కొత్త ప్రభుత్వం కొలువుదీరాక, గత ప్రభుత్వంలో జరిగిన అక్రమాలపై దృష్టి సారించింది. ముఖ్యంగా, రవాణా శాఖలో అన్నీ తానై చక్రం తిప్పిన ఓ ఉన్నతాధికారికి అండగా నిలిచిన ‘కోటరీ’పై ఏసీబీ ప్రత్యేకంగా నిఘా పెట్టింది.

సీఎంవోకు చిట్టా: రాష్ట్రవ్యాప్తంగా అవినీతి ఆరోపణలు ఎదుర్కొంటున్న అధికారుల పూర్తి చిట్టాను, పక్కా ఆధారాలతో ఏసీబీ అధికారులు సిద్ధం చేసి, ముఖ్యమంత్రి కార్యాలయానికి (CMO) అందించినట్లు విశ్వసనీయ సమాచారం. సీఎంవో నుంచి గ్రీన్ సిగ్నల్ అందిన తర్వాతే, ఏసీబీ రవాణా శాఖపై తన దూకుడును పెంచింది.

వరుస దాడులు.. వెలుగులోకి అక్రమాస్తులు : ఏసీబీ తన ఆపరేషన్‌ను పక్కా ప్రణాళికతో అమలు చేస్తోంది. మూడు రోజుల క్రితం, ఖమ్మం ఆర్టీవో కార్యాలయంపై 20 గంటల పాటు సోదాలు చేసి, 20 మంది ప్రైవేట్ ఏజెంట్లను అదుపులోకి తీసుకున్నారు. ఈ నెల 23న, మహబూబ్‌నగర్ రవాణా శాఖ డిప్యూటీ కమిషనర్ కిషన్ నాయక్ నివాసంపై దాడులు చేసి, సుమారు రూ.36 కోట్ల అక్రమాస్తులను గుర్తించారు.

ఉప్పల్‌లో తనిఖీలు: హైదరాబాద్ ఉప్పల్ కార్యాలయంలోనూ ఏసీబీ ఆకస్మిక తనిఖీలు చేసి, ఎంవీఐ రవీందర్ రెడ్డి సెల్‌ఫోన్‌ను స్వాధీనం చేసుకున్నారు. ఈ వరుస దాడులతో, తమ పేర్లు కూడా ఏసీబీ జాబితాలో ఉన్నాయేమోనని కొందరు అధికారులు ఆరా తీస్తున్నట్లు తెలుస్తోంది.

గత ప్రభుత్వ అండతోనేనా? : గత ప్రభుత్వ హయాంలో రవాణా శాఖలో చక్రం తిప్పిన ఓ ఉన్నతాధికారి, కాంగ్రెస్ ప్రభుత్వం రాగానే వీఆర్ఎస్ తీసుకున్నారు. ఆయనకు అండగా నిలిచిన అధికారులే ఇప్పుడు ఏసీబీ టార్గెట్‌గా ఉన్నారని, అంతేకాకుండా, వారిలో కొందరు ఇప్పటికీ పాత పార్టీ ముఖ్య నేతలతో సంబంధాలు కొనసాగిస్తూ, కీలక సమాచారాన్ని చేరవేస్తున్నారన్న ఆరోపణల నేపథ్యంలోనే ఈ దాడులు జరుగుతున్నాయని రవాణా శాఖలో తీవ్ర చర్చ నడుస్తోంది. ఏది ఏమైనా, ఏసీబీ దూకుడుతో రవాణా శాఖలో ప్రక్షాళన మొదలైందని, మరిన్ని భారీ తిమింగలాలు త్వరలోనే వలకు చిక్కడం ఖాయమని స్పష్టమవుతోంది.