Adilabad timber trade shift : ఒకప్పుడు ఆదిలాబాద్ అడవిలో పెరిగిన టేకు చెట్టును చూస్తే.. అది కేవలం చెట్టు కాదు, నడిచే బంగారం అనేవారు. దాని నాణ్యతకు, దృఢత్వానికి దేశవ్యాప్తంగా ఎంతటి ఖ్యాతి ఉండేదంటే, ప్రభుత్వ కలప డిపోల్లో జరిగే వేలానికి ఎక్కడెక్కడి నుంచో వ్యాపారులు తరలివచ్చేవారు. కానీ కాలం మారింది. కథ అడ్డం తిరిగింది. ఇప్పుడు అదే ఆదిలాబాద్ వాసి తన ఇంటి వాకిలికి, కిటికీకి ఏ దేశపు కలపను వాడుతున్నాడో తెలుసా? అసలు బంగారు తల్లి లాంటి మన అడవిలో కలపకు కరువెందుకొచ్చింది? ఖండాలు దాటి వస్తున్న విదేశీ కొయ్య మన మార్కెట్ను ఎలా ఆక్రమించింది? నాణ్యతలో మన టేకుకు సాటిరాకున్నా.. జనం ఎందుకు విదేశీ కలప వైపు మొగ్గు చూపుతున్నారు?
ఉమ్మడి ఆదిలాబాద్ జిల్లా అడవుల్లో పెరిగే టేకుకు ఉన్న బ్రాండ్ ఇమేజ్ అంతా ఇంతా కాదు. కానీ నేడు ఆ పరిస్థితి తలకిందులైంది. ఒకప్పుడు కలపను ఎగుమతి చేసిన ప్రాంతం, ఇప్పుడు విదేశాల నుంచి దిగుమతి చేసుకునే దుస్థితికి చేరింది. స్థానిక మార్కెట్లలో మన టేకు కంటే విదేశీ కలపకే గిరాకీ పెరగడం ఈ విచిత్ర పరిస్థితికి అద్దం పడుతోంది.
కారణాల కదంబం.. కరువైన అడవి బంగారం
కఠినమైన అటవీ నిబంధనలు: ఉమ్మడి ఆదిలాబాద్ జిల్లాలో అటవీ ప్రాంతం చాలా ఎక్కువ. ముఖ్యంగా నిర్మల్ (1216 చ.కి.మీ), ఆదిలాబాద్ (1724 చ.కి.మీ), మంచిర్యాల (1764 చ.కి.మీ), కుమురంభీం (2445 చ.కి.మీ) జిల్లాల్లో అడవులు విస్తారంగా ఉన్నాయి. అయితే, కవ్వాల్ టైగర్ రిజర్వ్ ఫారెస్ట్ ఏర్పాటు, అటవీ సంరక్షణపై ప్రభుత్వం తీసుకుంటున్న కఠిన చర్యల వల్ల అడవుల నుంచి కలపను తరలించడంపై తీవ్రమైన ఆంక్షలు అమలవుతున్నాయి.
స్మగ్లింగ్కు అడ్డుకట్ట: గతంలో భారీగా జరిగే కలప అక్రమ రవాణాకు అధికారులు దాదాపుగా అడ్డుకట్ట వేశారు. దీంతో అక్రమ మార్గంలో మార్కెట్కు వచ్చే కలప పూర్తిగా నిలిచిపోయింది. ఇది ఒక రకంగా అడవికి మేలు చేసినా, స్థానిక లభ్యతపై తీవ్ర ప్రభావం చూపింది. ఫలితంగా, మన అత్యుత్తమ నాణ్యమైన కలప మార్కెట్లో దొరకని పరిస్థితి ఏర్పడింది.
విదేశీ కలప దిగుమతి.. సాగరాలు దాటి వస్తున్న ప్రవాహం : స్థానికంగా డిమాండ్కు సరిపడా సరఫరా లేకపోవడంతో, వ్యాపారులు విదేశీ కలప దిగుమతిపై దృష్టి సారించారు.
ఎక్కడి నుంచి వస్తోంది?: ప్రధానంగా ఈక్వెడార్, బ్రెజిల్, శ్రీలంక, సుడాన్ వంటి దేశాలతో పాటు, అనేక ఆఫ్రికన్ దేశాలు భారతదేశానికి టేకును ఎగుమతి చేస్తున్నాయి. పైన్ వంటి ఇతర కలప రకాలను న్యూజిలాండ్, అమెరికా, యూరోపియన్ దేశాల నుంచి దిగుమతి చేసుకుంటున్నారు.
రవాణా మార్గం: ఈ కలప సముద్ర మార్గం ద్వారా చెన్నై, కోల్కతా, విశాఖపట్నం, ముంబయి, గుజరాత్లోని కాండ్లా పోర్టులకు చేరుకుంటుంది. అక్కడి నుంచి రోడ్డు మార్గంలో దేశంలోని అతిపెద్ద కలప మార్కెట్లలో ఒకటైన మహారాష్ట్రలోని నాగ్పూర్కు వస్తుంది. ఆదిలాబాద్, నిర్మల్, మంచిర్యాల జిల్లాల వ్యాపారులు నాగ్పూర్ నుంచే పెద్ద మొత్తంలో కొనుగోలు చేసి స్థానికంగా విక్రయిస్తున్నారు. మరికొంత కలప హైదరాబాద్ వంటి ప్రధాన కేంద్రాలకు చేరి, అక్కడి నుంచి జిల్లాలకు పంపిణీ అవుతోంది.
నాణ్యతకు, ధరకు మధ్య నలుగుతున్న వినియోగదారుడు : వాస్తవానికి నాణ్యతలో మన టేకుకు, విదేశీ టేకుకు మధ్య ఏమాత్రం పోలిక లేదు. ఆదిలాబాద్ టేకులో నీరు, నూనె శాతం ఎక్కువగా ఉండి చాలా గట్టిగా, బరువుగా ఉంటుంది. చెదలు పట్టే సమస్య దాదాపుగా ఉండదు. కానీ, విదేశీ కలప అంత దృఢంగా ఉండదు. అయినప్పటికీ, ధర తక్కువగా ఉండటంతో వినియోగదారులు విదేశీ కలప వైపే మొగ్గు చూపుతున్నారు. నాణ్యత కంటే ధరకే ప్రాధాన్యత ఇస్తున్నారు.
ప్రస్తుత మార్కెట్ తీరు.. వేలంలోనూ విదేశీదే హవా : అటవీ శాఖ ఆధ్వర్యంలో ఇచ్చోడ (ప్రతి నెల 21వ తేదీ), ఖానాపూర్ (22), కాగజ్నగర్ (24) డిపోల్లో ఇప్పటికీ వేలం నిర్వహిస్తున్నారు. బంగారం లాంటి మన కలపనే కావాలనుకునే వారు ఈ వేలంలో పాల్గొంటున్నారు. అయితే, ఆశ్చర్యకరంగా ఈ డిపోల్లో అమ్ముడవుతున్న కలపలో దాదాపు 50 శాతం విదేశీ కర్రే ఉండటం గమనార్హం. ప్రస్తుతం ప్రభుత్వం ఇందిరమ్మ ఇళ్ల నిర్మాణాలను పెద్ద ఎత్తున చేపట్టడంతో కలపకు డిమాండ్ పెరిగి, డిపోల్లో అమ్మకాలు జోరందుకున్నాయి. ఈ డిమాండ్ను కూడా విదేశీ కలపే తీరుస్తోంది.