Natural farming in Telangana : అమృతంలాంటి పాలు తాగి ఏకంగా మూడు రోజుల పాటు ఆసుపత్రి పాలైతే ఎలా ఉంటుంది? ఆరోగ్యానికి మేలు చేస్తుందనుకున్న ఆహారమే ప్రాణాల మీదకు తెస్తే పరిస్థితి ఏమిటి? దేశంలో రోజురోజుకూ వ్యవసాయం రసాయనమయంగా మారుతోందని, మనం తినే తిండి మనకే రోగాలను తెచ్చిపెడుతోందని సాక్షాత్తూ కేంద్ర హోం శాఖ సహాయ మంత్రి బండి సంజయ్ కుమార్ సంచలన వ్యాఖ్యలు చేశారు. 20 ఏళ్లుగా జ్వరం, బీపీ, షుగర్ లేని తాను కేవలం పాలు తాగి ఆసుపత్రి బెడ్ ఎక్కాల్సి వచ్చిందని ఆవేదన వ్యక్తం చేశారు. 

రసాయనాలతో నిర్వీర్యమవుతున్న నేలతల్లి : కరీంనగర్ జిల్లా జమ్మికుంటలోని కృషి విజ్ఞాన కేంద్రం (KVK) వేదికగా కిసాన్ మోర్చా ఆధ్వర్యంలో జరిగిన ‘ప్రకృతి వ్యవసాయం-రైతు సమ్మేళనం’లో బండి సంజయ్ పాల్గొన్నారు. ఈ సందర్భంగా ఆయన మాట్లాడుతూ… పాలు, పండ్లు అని లేకుండా మనం తీసుకునే ప్రతి ఆహార పదార్థం కెమికల్స్‌తో నిండిపోయిందని తీవ్ర ఆందోళన వ్యక్తం చేశారు. కనీసం మామిడికాయ తినాలన్నా భయపడే పరిస్థితి దేశంలో నెలకొందన్నారు. “నాకు 20 ఏళ్లుగా ఎలాంటి అనారోగ్యం లేదు.. బీపీ, షుగర్ అసలే లేవు. కానీ హైదరాబాద్‌లో పాలు తాగిన పాపానికి మూడు రోజులు ఆసుపత్రి పాలయ్యాను. రోగాలకు కారకులం మనమే.. వాటిని నివారించగలిగేదీ మనమే” అని ఆయన కుండబద్దలు కొట్టారు. ఆధునిక సాగు పేరుతో మితిమీరిన రసాయనాల వాడకం వల్లే ఈ దుస్థితి దాపురించిందని ఆయన విశ్లేషించారు.

విదేశాలకు తరలుతున్న దేశ సంపద : పంటల దిగుబడి పెంచే నెపంతో మనం వాడుతున్న రసాయన ఎరువులు దేశ ఆర్థిక వ్యవస్థపై పెను భారం మోపుతున్నాయని గణాంకాలతో సహా మంత్రి వివరించారు. దేశవ్యాప్తంగా యూరియా కోసం ఏటా రూ. 2 లక్షల కోట్లు ఖర్చు చేస్తున్నామని, అందులో కేవలం విదేశాల నుంచి యూరియా దిగుమతి చేసుకోవడానికే ఏకంగా రూ. 1.20 లక్షల కోట్లు వెచ్చిస్తున్నామని తెలిపారు. మన దేశ సంపద విదేశాలకు పోతోందని, దీన్ని అరికట్టేందుకే ప్రధానమంత్రి నరేంద్ర మోదీ ‘మేక్ ఇన్ ఇండియా’ (Make in India) కింద స్వదేశీ ఉత్పత్తులను ప్రోత్సహిస్తున్నారని స్పష్టం చేశారు. ప్రధాని మోదీయే తనకు ఈ విషయంలో స్ఫూర్తి అని బండి సంజయ్ ఉద్ఘాటించారు.

ప్రకృతి సాగుతోనే లాభాల పంట : ఈ రసాయన మహమ్మారికి చెక్ పెట్టాలంటే అన్నదాతలు ప్రకృతి వ్యవసాయం  వైపు అడుగులు వేయక తప్పదని మంత్రి సూచించారు. “ప్రకృతి వ్యవసాయం చేస్తే తొలి రెండు మూడేళ్లు లాభాలు రాకపోవచ్చు. కానీ ఆ తర్వాత నేల సారవంతమై అన్నదాతలు కోటీశ్వరులు కావడం ఖాయం. ప్రస్తుతం ఆర్గానిక్ ఉత్పత్తులకు మార్కెట్లో విపరీతమైన డిమాండ్ ఉంది, ప్రజలు కూడా వాటినే కొనేందుకు ఆసక్తి చూపుతున్నారు. రైతులు ఈ మార్పును గమనించాలి” అని ఆయన పిలుపునిచ్చారు. ప్రకృతి సాగులో పండిన పంటలకు సరైన మద్దతు ధర దక్కేలా కేంద్రం చూసుకుంటుందని భరోసా ఇచ్చారు.

కేంద్రం ప్రోత్సాహకాలు – భవిష్యత్ కార్యాచరణ : అన్నదాతలను ఆర్గానిక్ సాగు వైపు ప్రోత్సహించడానికి కేంద్ర ప్రభుత్వం భారీ ప్రణాళికలు రచిస్తోందని బండి సంజయ్ వెల్లడించారు. కేంద్ర బడ్జెట్‌లో జాతీయ కృషి యోజన కింద రూ. 2,400 కోట్లు కేటాయించారు. ప్రకృతి వ్యవసాయం చేసే రైతులకు ఎకరానికి రూ. 4 వేల చొప్పున ప్రోత్సాహకం అందిస్తున్నారు. దేశవ్యాప్తంగా కోటి మంది రైతులను ప్రకృతి సాగు వైపు మళ్లించడమే లక్ష్యంగా, 30 వేల క్లస్టర్ల ద్వారా 30 లక్షల మందికి ప్రత్యేక శిక్షణ ఇస్తున్నారు. రాబోయే రెండేళ్లలో తన సొంత నియోజకవర్గమైన కరీంనగర్ పార్లమెంట్ పరిధిలో 25 వేల మంది రైతులను ప్రకృతి వ్యవసాయం వైపు మళ్లించే బాధ్యత తీసుకుంటానని బండి సంజయ్ హామీ ఇచ్చారు. ఎవరైనా రైతులు ప్రకృతి వ్యవసాయం చేసి, ఆ పొలంలో సెల్ఫీ దిగి పంపితే.. వారిని స్వయంగా తానే సన్మానిస్తానని ప్రకటించారు.