Chilakalaguda new bus terminal Hyderabad  : హైదరాబాద్ మహానగరంలో రోజురోజుకూ పెరుగుతున్న జనాభా, వాహనాల రద్దీకి అనుగుణంగా ప్రజా రవాణా వ్యవస్థను మరింత బలోపేతం చేసేందుకు తెలంగాణ రాష్ట్ర రోడ్డు రవాణా సంస్థ (TGSRTC) సమగ్ర కార్యాచరణకు శ్రీకారం చుట్టింది. ముఖ్యంగా సికింద్రాబాద్ రైల్వే స్టేషన్, రేతిఫైల్ బస్ స్టేషన్ ప్రాంగణాల్లో నిత్యం నరకప్రాయంగా మారిన ట్రాఫిక్ గందరగోళానికి శాశ్వత పరిష్కారం చూపేందుకు చిలకలగూడ వేదికగా సరికొత్త వ్యూహం రూపుదిద్దుకుంది. దక్షిణ మధ్య రైల్వే మరియు ఆర్టీసీల మధ్య కుదిరిన కీలక ఉమ్మడి భూ బదిలీ ఒప్పందంతో ఈ మెగా ప్రాజెక్టు ఆకృతి దాల్చింది. అయితే, అసలు కాచిగూడ డిపో భూమికి, చిలకలగూడ టెర్మినల్‌కు ఉన్న లంకె ఏమిటి? కోట్లాది రూపాయలతో రూపుదిద్దుకుంటున్న ఈ ప్రణాళిక ప్రయాణికుల నిత్య ట్రాఫిక్ కష్టాలను ఏ విధంగా గట్టెక్కించబోతోంది?

రైల్వే విజ్ఞప్తి – ఆర్టీసీ ‘భూ మార్పిడి’ ఒప్పందం : ప్రస్తుతం కాచిగూడ రైల్వే స్టేషన్ నుంచి ప్రతిరోజూ 70కి పైగా రైళ్లు రాకపోకలు సాగిస్తూ, సుమారు 40,000 మందికి పైగా ప్రయాణికులకు సేవలు అందిస్తున్నాయి. అయితే, రైల్వే స్టేషన్ ఆధునికీకరణ  విస్తరణకు తగినంత భూమి అందుబాటులో లేకపోవడంతో, స్టేషన్‌ను ఆనుకుని ఉన్న ఆర్టీసీ భూమిని కేటాయించాలని రైల్వే శాఖ రాష్ట్ర ప్రభుత్వాన్ని కోరింది.

కాచిగూడ డిపో వద్ద ఆర్టీసీకి మొత్తం 9 ఎకరాల విలువైన స్థలం ఉంది. ఇందులో 5 ఎకరాల స్థలాన్ని రైల్వే శాఖకు అప్పగించి, దానికి బదులుగా చిలకలగూడలోని 5 ఎకరాల రైల్వే స్థలాన్ని పొందేలా పరస్పర భూ బదిలీ ప్రతిపాదనను ఆర్టీసీ సిద్ధం చేసింది. మిగిలిన 4 ఎకరాల స్థలంలో రామాంతపూర్ వైపు ముఖద్వారం ఉండేలా సరికొత్త కాచిగూడ ఆర్టీసీ డిపోను నిర్మించాలని యోచిస్తున్నారు.

రేతిఫైల్, సికింద్రాబాద్ ప్రాంగణాల్లో రద్దీకి విముక్తి : ప్రస్తుతం సికింద్రాబాద్ రైల్వే స్టేషన్ ముందు భాగంలోనూ, రేతిఫైల్ సిటీ బస్ స్టేషన్ వద్ద నగరంలోని వివిధ ప్రాంతాల బస్సుల రాకపోకల వల్ల నిరంతరం తీవ్రమైన గందరగోళ పరిస్థితి నెలకొంటోంది.

కొండాపూర్, మెహిదీపట్నం, చార్మినార్ పటాన్‌చెరు, దిల్​సుఖ్​నగర్, హయత్​నగర్ ఈ మార్గాల నుంచి వచ్చే బస్సులన్నీ రేతిఫైల్ వద్దే నిలపడం వల్ల ప్రధాన రహదారిపై ట్రాఫిక్ స్తంభిస్తోంది. చిలకలగూడలో నూతన బస్ టెర్మినల్ అందుబాటులోకి వస్తే బస్సుల రాకపోకలు విభజించబడి, సికింద్రాబాద్ స్టేషన్ ముందరి ప్రాంతానికి ట్రాఫిక్ చిక్కుల నుంచి ఉపశమనం లభిస్తుంది.

హరిత రవాణా బాటలో ఈవీ ఛార్జింగ్ కేంద్రాలు : చిలకలగూడ బస్ టెర్మినల్ కేవలం బస్సుల నిలుపుదలకే పరిమితం కాకుండా, ఆధునిక సదుపాయాల నిలయంగా మారనుంది.

ఈవీ ఛార్జింగ్ పాయింట్లు: పెరుగుతున్న ఎలక్ట్రిక్ (EV) బస్సుల నిర్వహణ కోసం ప్రత్యేక ఛార్జింగ్ స్టేషన్లు.

మెయింటెనెన్స్ షెడ్లు: విద్యుత్ బస్సుల సాంకేతిక నిర్వహణ సౌకర్యాలు.
ప్రయాణికుల సౌకర్యాలు: డిజిటల్ డిస్‌ప్లే బోర్డులు, ఆధునిక వెయిటింగ్ హాల్స్, ఆహ్లాదకరమైన విశ్రాంతి కేంద్రాలు.

120 మీటర్ల స్కైవాక్ – మెట్రో, రైల్వే స్టేషన్ల మధ్య సునాయాస ప్రయాణం : సుమారు రూ. 700 కోట్లకు పైగా అంచనా వ్యయంతో సికింద్రాబాద్ రైల్వే స్టేషన్ పునరాభివృద్ధి ప్రాజెక్టు శరవేగంగా సాగుతోంది. ఇందులో భాగంగా ఒక కీలకమైన స్కైవాక్ నిర్మాణం సైతం ప్రతిపాదించబడింది.
ప్రస్తుతం సికింద్రాబాద్ ఈస్ట్ మెట్రో స్టేషన్‌లో దిగే ప్రయాణికులు రైల్వే స్టేషన్ చేరుకోవడానికి అర కిలోమీటరు మేర లగేజీతో నడవాల్సి వస్తోంది. రేతిఫైల్ బస్ స్టేషన్ వెనుక భాగం గుండా 120 మీటర్ల పొడవైన ఆధునిక స్కైవాక్ నిర్మిస్తే, మెట్రో ప్రయాణికులు నేరుగా రైల్వే స్టేషన్ ప్లాట్‌ఫారమ్‌లకు చేరుకోవచ్చు. ఈ నిర్మాణం కోసం ఆర్టీసీ నుంచి అవసరమైన ‘నో అబ్జెక్షన్ సర్టిఫికేట్’ (NOC) పొందేందుకు చర్చలు తుది దశకు చేరుకున్నాయి.