Hyderabad data center market growth : ఐటీ రాజధానిగా ఇప్పటికే విశ్వవ్యాప్త గుర్తింపు పొందిన ‘భాగ్యనగరం’ ఇప్పుడు మరో అరుదైన మైలురాయిని అధిగమించింది. కేవలం సాఫ్ట్‌వేర్ సేవలకే పరిమితం కాకుండా, గ్లోబల్ టెక్ దిగ్గజాల సమాచార నిధికి చిరునామాగా.. అంటే ‘డేటా సెంటర్ హబ్’గా హైదరాబాద్ శరవేగంగా రూపాంతరం చెందుతోంది. ముంబై వంటి తీర ప్రాంత నగరాలకు గట్టి పోటీనిస్తూ, అంతర్జాతీయ సంస్థలకు ‘మోస్ట్ ఫేవరెట్ డెస్టినేషన్’గా మారుతోంది. 

ముంబై తర్వాతి స్థానం మనదే : స్థిరాస్తి సేవల దిగ్గజం ‘నైట్ ఫ్రాంక్ ఇండియా’ తన తాజా నివేదిక “ఇండియా డేటా సెంటర్ మార్కెట్ అప్‌డేట్ 2025″లో హైదరాబాద్ వృద్ధిని కొనియాడింది.
సామర్థ్యంలో భారీ పెరుగుదల: 2022లో కేవలం 60.9 మెగావాట్ల (MW) వద్ద ఉన్న హైదరాబాద్ డేటా సెంటర్ల సామర్థ్యం, 2025 నాటికి 151.4 మెగావాట్లకు చేరుకుంది.

పైప్‌లైన్ ప్రాజెక్టులు: ప్రస్తుతం వివిధ దశల్లో ఉన్న ప్రాజెక్టుల ద్వారా మరో 1.9 గిగావాట్ల (GW) సామర్థ్యం సిద్ధమవుతోంది. ఈ గణాంకాల ప్రకారం దేశంలో ముంబై తర్వాత అత్యంత వేగంగా వృద్ధి చెందుతున్న రెండో నగరంగా హైదరాబాద్ నిలిచింది.

భాగ్యనగరానికే ఎందుకు నీరాజనాలు : డేటా సెంటర్ల ఏర్పాటుకు హైదరాబాద్‌ను ‘ఆదర్శవంతమైన కేంద్రం’గా మార్చిన కీలక అంశాలు ఇవే:
ప్రకృతి వైపరీత్యాల నుంచి రక్షణ: భూకంపాలు, తుపాన్లు వంటి ప్రకృతి వైపరీత్యాల ముప్పు హైదరాబాద్‌కు చాలా తక్కువ. డేటా భద్రతకు ఇది అత్యంత ప్రధానమైన అంశం.
భౌగోళిక అనుకూలత: దేశం మధ్యలో ఉండటం వల్ల సమాచార రవాణా (Latency) వేగంగా జరుగుతుంది.
ప్రభుత్వ ప్రోత్సాహకాలు: గ్రాఫిక్స్ ప్రాసెసింగ్ యూనిట్లు (GPU), లిక్విడ్ కూలింగ్ టెక్నాలజీల వంటి అత్యాధునిక మౌలిక సదుపాయాలకు ప్రభుత్వం అందిస్తున్న మద్దతు ఈ రంగానికి కొండంత అండగా నిలుస్తోంది.
తక్కువ వ్యయం: మెట్రో నగరాలతో పోలిస్తే ఇక్కడ నిర్వహణ వ్యయం తక్కువగా ఉండటం సంస్థలకు లాభిస్తోంది.

దిగ్గజాల క్యూ – మైక్రోసాఫ్ట్ భారీ వ్యూహం: ప్రపంచ ప్రఖ్యాత సంస్థలు హైదరాబాద్‌లో తమ స్థావరాలను ఏర్పాటు చేసేందుకు పోటీ పడుతున్నాయి.
మైక్రోసాఫ్ట్: షాద్‌నగర్ (41 ఎకరాలు), మేకగూడ (22 ఎకరాలు), చందన్‌వెల్లి (53 ఎకరాలు) ప్రాంతాల్లో మైక్రోసాఫ్ట్ తన భారీ డేటా సెంటర్ల సముదాయాన్ని నిర్మిస్తోంది. దక్షిణ భారత ఐటీ హబ్‌గా హైదరాబాద్‌ను ఆ సంస్థ ప్రధాన గమ్యస్థానంగా ఎంచుకుంది.
అమెజాన్ వెబ్ సర్వీసెస్ (AWS): ఇప్పటికే మూడు జోన్లను నిర్వహిస్తూ, మార్కెట్లో 46 శాతం వాటాను కలిగి ఉంది.
ఒరాకిల్ & ఎన్‌టీటీ: దేశవ్యాప్త విస్తరణలో భాగంగా హైదరాబాద్‌లో కొత్త సెంటర్లను ప్రారంభించేందుకు అడుగులు వేస్తున్నాయి. అదానీ కానెక్స్ వంటి సంస్థలు కూడా తమ కార్యకలాపాలను ముమ్మరం చేశాయి.

భారత డేటా సెంటర్ మార్కెట్ – ఒక విశ్లేషణ: క్లౌడ్ కంప్యూటింగ్, ఆర్టిఫిషియల్ ఇంటెలిజెన్స్ (AI) వాడకం పెరగడంతో డేటా నిల్వ అవసరం అమాంతం పెరిగింది. 2025 చివరి నాటికి దేశంలోని ఏడు ప్రధాన నగరాల్లో (ముంబై, ఢిల్లీ, చెన్నై, కోల్‌కతా, పుణె, హైదరాబాద్, బెంగళూరు) ఐటీ సామర్థ్యం 1.6 గిగావాట్లను మించిపోతుందని అంచనా. కేవలం 2024లోనే దేశవ్యాప్తంగా 361.6 మెగావాట్ల కొత్త సామర్థ్యం అందుబాటులోకి రావడం విశేషం.