బేగంపేట్ (తెలుగు ప్రభ)  : హైదరాబాద్ నగరం నడిబొడ్డున కొలువైన ఆ పురాతన శతాబ్దాల ఆలయం భక్తజన సంద్రమైంది. శివసత్తుల పూనకాలు, పోతురాజుల వీరంగాలు, మంగళవాయిద్యాల నడుమ లోకకల్యాణం కోసం ఆ జగన్మాత మంగళసూత్రధారణ ముహూర్తం ఆసన్నమైంది. ఆషాఢ మాసం తొలి మంగళవారం పురస్కరించుకుని భక్తుల ఇలవేల్పు బల్కంపేట ఎల్లమ్మ అమ్మవారి కల్యాణ మహోత్సవం అత్యంత వైభవోపేతంగా ప్రారంభమైంది. 

అంగరంగ వైభవంగా కల్యాణ వేడుక : బల్కంపేట ఎల్లమ్మ అమ్మవారి వార్షిక కల్యాణోత్సవాలు మంగళవారం దేవాదాయ శాఖ ఆధ్వర్యంలో అత్యంత వైభవంగా ప్రారంభమయ్యాయి. తెల్లవారుజామున 3 గంటల నుంచే ఆలయంలో అమ్మవారికి ప్రత్యేక అభిషేకాలు, పూజలు నిర్వహించారు. అనంతరం ఉత్సవ మూర్తులను సర్వాంగ సుందరంగా అలంకరించి కల్యాణ వేదికపైకి తీసుకొచ్చారు. వేద పండితుల మంత్రోచ్ఛారణలు, మంగళ వాయిద్యాల నడుమ మధ్యాహ్నం 11:59 గంటలకు అమ్మవారి దివ్య కల్యాణ మహోత్సవం శాస్త్రోక్తంగా జరిగింది. ఈ పవిత్ర ఘట్టాన్ని కనులారా వీక్షించేందుకు తరలివచ్చిన భక్తులతో బల్కంపేట పరిసర ప్రాంతాలు భక్తజన కోలాహలంగా మారాయి.

ప్రభుత్వం తరఫున పట్టువస్త్రాల సమర్పణ : అమ్మవారి దివ్య కల్యాణానికి రాష్ట్ర ప్రభుత్వం తరఫున రవాణా, బీసీ సంక్షేమ శాఖ మంత్రి పొన్నం ప్రభాకర్, దేవాదాయ శాఖ మంత్రి కొండా సురేఖ హాజరయ్యారు. అమ్మవారికి పట్టువస్త్రాలు, ముత్యాల తలంబ్రాలను సమర్పించి ప్రత్యేక పూజలు చేశారు.

ఈ సందర్భంగా మంత్రి కొండా సురేఖ మాట్లాడుతూ.. నిజాం కాలం నుంచి ఈ ఆలయానికి ఎంతో ప్రాముఖ్యత ఉందన్నారు. అమ్మవారిని దర్శించుకుంటే కోరిన కోర్కెలు నెరవేరుతాయని భక్తుల బలమైన నమ్మకమని పేర్కొన్నారు. భక్తులకు ఎలాంటి ఇబ్బందులు కలగకుండా క్యూ లైన్లు ఏర్పాటు చేశామని, ముఖ్యంగా జోగినులకు ప్రత్యేక ప్రాధాన్యత కల్పిస్తూ వారితో సమానంగా విఐపి గ్యాలరీలలో కూర్చునే సౌకర్యం కల్పించామని వివరించారు. మంత్రి పొన్నం ప్రభాకర్ మాట్లాడుతూ.. రాష్ట్రంలో పాడిపంటలు సమృద్ధిగా పండాలని, సకాలంలో వర్షాలు కురిసి తెలంగాణ సుభిక్షంగా ఉండాలని అమ్మవారిని ప్రార్థించినట్లు తెలిపారు.

హాజరైన ప్రముఖులు.. ఆలయ మర్యాదలు : ఈ వైభవ వేడుకకు ముఖ్యమంత్రి సతీమణి, కుమార్తెతో పాటు మంత్రులు పొన్నం ప్రభాకర్, కొండా సురేఖ కుటుంబ సభ్యులు, ప్రభుత్వ విప్ అద్దంకి దయాకర్ కుటుంబ సభ్యులు విచ్చేశారు. కేంద్రమంత్రి జి. కిషన్ రెడ్డి సతీమణి కావ్య రెడ్డి, శాసనసభ్యులు దానం నాగేందర్, తలసాని శ్రీనివాస్ యాదవ్, నవీన్ యాదవ్ తదితర ప్రముఖులు అమ్మవారిని దర్శించుకున్నారు. వీరికి దేవాదాయ శాఖ కమిషనర్ హనుమంతరావు, ఆలయ చైర్మన్ సాయిబాబా, ఈఓ వినోద్ రెడ్డి ఆలయ మర్యాదలతో ఘనంగా స్వాగతం పలికారు.

భక్తులకు వసతులు – ట్రాఫిక్ ఆంక్షలు : ఉత్సవాల నేపథ్యంలో భక్తులకు త్రాగునీరు, నిరంతర విద్యుత్ సరఫరా, వైద్య సదుపాయాలు కల్పించారు. భక్తుల రద్దీని దృష్టిలో ఉంచుకుని హైదరాబాద్ పోలీస్ ట్రాఫిక్ విభాగం జాయింట్ కమిషనర్ జోయల్ డేవిస్ ఆధ్వర్యంలో బల్కంపేట వైపు వచ్చే దారుల్లో ట్రాఫిక్ మళ్లింపులు చేపట్టారు. ఎస్ఆర్ నగర్ కమ్యూనిటీ హాల్, నేచర్ క్యూర్ హాస్పిటల్, జీహెచ్‌ఎంసీ గ్రౌండ్స్ తదితర ప్రాంతాల్లో వాహనాల పార్కింగ్ సదుపాయాలు ఏర్పాటు చేశారు. ఆర్టీసీ తరఫున భక్తుల సౌకర్యార్థం ప్రత్యేక బస్సులు నడిపించారు. జిల్లా కలెక్టర్ డాక్టర్ ప్రియాంక అలా, ట్రాఫిక్ డీసీపీ కాజల్ సింగ్, దేవాదాయ జాయింట్ కమిషనర్ రామకృష్ణారావు, జీహెచ్‌ఎంసీ, జలమండలి, రెవెన్యూ విభాగాల అధికారులు ఈ సమన్వయ ఏర్పాట్లలో చురుగ్గా పాల్గొన్నారు.

రేపు రథోత్సవం : కల్యాణం ముగిసిన తదుపరి కూడా అమ్మవారిని దర్శించుకునేందుకు భక్తులు తండోపతండాలుగా తరలివస్తున్నారు. బుధవారం (జూలై 22, 2026) సాయంత్రం అమ్మవారి వైభవ రథోత్సవ కార్యక్రమం జరగనుంది.