రాజేంద్రనగర్ (తెలుగు ప్రభ ) : పర్యావరణ పరిరక్షణ అనేది కేవలం కాగితాలకే, వేదికలపై చేసే ఉపన్యాసాలకే పరిమితం కాకూడదని.. అది నిరంతర కార్యాచరణగా మారినప్పుడే సమాజానికి ప్రయోజనం చేకూరుతుందని శంషాబాద్ మండలం నానాజీపూర్ గ్రామపంచాయతీ నిరూపించింది. ‘వనమహోత్సవం-2026’ సందర్భంగా గ్రామాన్ని పచ్చదనంతో నింపేందుకు పంచాయతీ పాలకవర్గం నడుం బిగించింది. కేవలం ఒకే ఒక్క రోజులో ఊరంతా పండగ వాతావరణంలో 500 మొక్కలు నాటి పర్యావరణ ప్రేమికులకు ఆదర్శంగా నిలిచింది. గ్రామాన్ని రాష్ట్రంలోనే అగ్రగామి ‘హరిత గ్రామంగా’ తీర్చిదిద్దే సంకల్పంతో ఏకంగా 6,000 మొక్కలను నాటే బృహత్తర ప్రణాళికను సిద్ధం చేసింది.
కార్యాచరణతో కదం తొక్కిన నానాజీపూర్: ఒకే రోజు 500 నాట్లు : శంషాబాద్ మండల పరిధిలోని నానాజీపూర్ గ్రామంలో వనమహోత్సవం ఉత్సాహపూరిత వాతావరణంలో ప్రారంభమైంది. గ్రామాన్ని పచ్చని వనంగా మలచే దిశగా సర్పంచ్ మైలారం సురేఖ రాజు, గ్రామపంచాయతీ కార్యదర్శి బి. జ్యోత్స్న స్వయంగా రంగంలోకి దిగారు. తొలిరోజే గ్రామ వీధులు, మైదానాలు, ప్రభుత్వ పాఠశాలలు, ఆసుపత్రి ప్రాంగణాల్లో ఏకంగా 500 మొక్కలు నాటి రికార్డు స్థాయి శ్రీకారం చుట్టారు. గ్రామప్రజలు, యువకులు, మహిళా సంఘాల సభ్యులు ఈ కార్యక్రమంలో ఉత్సాహంగా పాల్గొని పచ్చదనం పెంపునకు తోడ్పాటు అందించారు.
6,000 మొక్కల బృహత్తర ప్రణాళిక.. హరిత విప్లవం : నానాజీపూర్ను రాష్ట్రస్థాయిలో ఆదర్శ హరిత గ్రామంగా తీర్చిదిద్దడమే లక్ష్యంగా గ్రామపంచాయతీ ప్రణాళిక రూపొందించింది. ప్రతి వీధి, ప్రతి కాలనీ, ఖాళీగా ఉన్న ప్రభుత్వ స్థలాలు మరియు రోడ్డుకి ఇరువైపులా మొక్కలు నాటేందుకు ప్రణాళికలు సిద్ధం చేశారు. రాబోయే రోజుల్లో మొత్తం 6,000 మొక్కలు నాటి, వాటిని కాపాడేలా పంచాయతీ యంత్రాంగాన్ని సన్నద్ధం చేశారు. గ్రామ వాతావరణానికి అనుకూలమైన వేప, రావి, గుల్ మొహర్, పండ్ల జాతుల మొక్కలకు ప్రాధాన్యం ఇస్తున్నారు.
‘నాటడం తొలి అడుగు.. సంరక్షించడమే అసలైన బాధ్యత’: ఈ సందర్భంగా సర్పంచ్ మైలారం సురేఖ రాజు మాట్లాడుతూ, పర్యావరణ పరిరక్షణలో ప్రతి పౌరుడి భాగస్వామ్యం అత్యంత కీలకమని స్పష్టం చేశారు.
“మొక్క నాటడం అనేది పర్యావరణ రక్షణలో కేవలం తొలి అడుగు మాత్రమే. నాటిన ప్రతి మొక్కను అది మహా వృక్షంగా ఎదిగే వరకు కంటికి రెప్పలా కాపాడటమే మనందరి నిజమైన బాధ్యత. గ్రామంలోని ప్రతి కుటుంబం కనీసం ఒక మొక్కను దత్తత తీసుకొని దానికి నీళ్లు పోసి సంరక్షిస్తే, నానాజీపూర్ అతి త్వరలోనే పచ్చల హారంగా మారుతుంది” అని ఆమె పిలుపునిచ్చారు.
ప్రజా భాగస్వామ్యమే విజయానికి మూలం: గ్రామపంచాయతీ కార్యదర్శి బి. జ్యోత్స్న మాట్లాడుతూ, మొక్కల పెంపకంలో ప్రజా భాగస్వామ్యమే అసలైన బలమని తెలిపారు. నాటిన మొక్కలు మేకలు, ఇతర పశువుల బారిన పడకుండా ఫెన్సింగ్ ఏర్పాటు చేయడంతో పాటు, క్రమం తప్పకుండా నీరు అందించేందుకు ప్రత్యేక పంచాయతీ సిబ్బందిని కేటాయించినట్లు వెల్లడించారు. గ్రామ మహిళా సంఘాలు, స్థానిక యువజన సంఘాల సహకారంతో 6 వేల మొక్కల లక్ష్యాన్ని విజయవంతంగా సాధిస్తామని ధీమా వ్యక్తం చేశారు.
ఈ వనమహోత్సవ కార్యక్రమంలో గ్రామ ప్రజాప్రతినిధులు, వివిధ వార్డు సభ్యులు, పంచాయతీ సిబ్బంది, పాఠశాల విద్యార్థులు గ్రామ ప్రజలు పెద్ద సంఖ్యలో పాల్గొని కార్యక్రమాన్ని దిగ్విజయం చేశారు.