Hyderabad Sailing Week 2026 Hussain Sagar : భాగ్యనగరానికి గుండెకాయ వంటి హుస్సేన్‌సాగర్ సరస్సు నీలి జలాలపై గత వారం రోజులుగా రంగురంగుల తెరచాపల తళుకులు, కెరటాలతో పోరాడిన శబ్దాలు వీక్షకులకు కన్నుల పండుగగా నిలిచాయి. దేశవ్యాప్తంగానే కాకుండా అంతర్జాతీయంగా ఉన్న అగ్రశ్రేణి క్రీడాకారులు తమ పట్టుదలతో, చాకచక్యంతో అలలపై సాగించిన ఆ వీరోచిత సమరం శనివారం నాటితో ముగిసింది. భారతదేశంలోనే తొలిసారిగా నిర్వహించిన అంతర్జాతీయ ఐఎల్‌సీఏ ఓపెన్ సెయిలింగ్ ఛాంపియన్‌షిప్ విజేతలు ఎవరు? గాలి దిశను బట్టి, ప్రవాహ వేగాన్ని తట్టుకుంటూ సాగిన ఈ జల క్రీడా సంబరంలో అంతిమంగా సత్తా చాటిన ఆ విజేతల ప్రస్థానం ఏమిటి..? 

హుస్సేన్‌సాగర్‌లో చారిత్రాత్మక ముగింపు వేడుక : మహానగర పరిధిలోని హుస్సేన్‌సాగర్ సరస్సు వేదికగా సుదీర్ఘ కాలంగా సాగుతున్న క్రీడా వైభవాన్ని చాటిచెబుతూ.. దేశంలోనే మొట్టమొదటిసారిగా ప్రతిష్టాత్మకంగా నిర్వహించిన ‘తొలి ఐఎల్‌సీఏ (ILCA) ఓపెన్ ఇండియా ఇంటర్నేషనల్ సెయిలింగ్ ఛాంపియన్‌షిప్’తో పాటు, వైఏఐ 40వ హైదరాబాద్ సెయిలింగ్ వీక్-2026 శనివారం సగర్వంగా ముగిశాయి. హుస్సేన్‌సాగర్‌లోని ఈఎంఈ సెయిలింగ్ అసోసియేషన్ (EMESA) వేదికగా ఈ ముగింపు కార్యక్రమం అత్యంత వైభవంగా జరిగింది.

ఈ వేడుకలకు మిలిటరీ కాలేజ్ ఆఫ్ ఎలక్ట్రానిక్స్ అండ్ మెకానికల్ ఇంజినీరింగ్ (MCEME) కమాండెంట్, కార్ప్స్ ఆఫ్ ఈఎంఈ కల్నల్ కమాండెంట్ మరియు ఈఎంఈఎస్‌ఏ కమోడోర్ లెఫ్టినెంట్ జనరల్ నీరజ్ వర్ష్నే (AVSM, VSM) ముఖ్య అతిథిగా హాజరయ్యారు. పోటీల్లో అద్భుత ప్రతిభ కనబరిచిన విజేతలకు ఆయన బహుమతులు అందజేసి సత్కరించారు.

క్రమశిక్షణకు ప్రతీక సెయిలింగ్ – లెఫ్టినెంట్ జనరల్ నీరజ్ వర్ష్నే : ఈ సందర్భంగా లెఫ్టినెంట్ జనరల్ నీరజ్ వర్ష్నే మాట్లాడుతూ.. భారతదేశంలోనే తొలిసారిగా నిర్వహించిన అంతర్జాతీయ ఐఎల్‌సీఏ ఓపెన్ ఛాంపియన్‌షిప్‌ను హుస్సేన్‌సాగర్ సహజ జలాలపై విజయవంతంగా పూర్తి చేయడం గర్వకారణమన్నారు. గత నాలుగు దశాబ్దాలుగా ఈఎంఈఎస్‌ఏ (EMESA) సంస్థ భారత సెయిలింగ్ రంగానికి అగ్రశ్రేణి ఒలింపియన్లను, అర్జున అవార్డు గ్రహీతలను మరియు ప్రపంచ స్థాయి క్రీడాకారులను అందిస్తూ బాటలు వేస్తోందని గుర్తుచేశారు.

సెయిలింగ్ అనేది కేవలం ఆట మాత్రమే కాదని, అది క్రీడాకారులలో క్రమశిక్షణ, సహనం, ఆత్మవిశ్వాసం, నాయకత్వ లక్షణాలను పెంపొందిస్తుందని ఆయన పేర్కొన్నారు. ప్రతికూల పరిస్థితుల్లోనూ పట్టుదలతో ముందుకు సాగడమే అసలైన విజయమని, రానున్న సంవత్సరాల్లో ఈ పోటీలు మరింత అంతర్జాతీయ ఆదరణ పొందుతాయనే విశ్వాసం వ్యక్తం చేశారు.

భారీ ఎత్తున క్రీడాకారుల భాగస్వామ్యం : ఎంసీఎంఈ ఆధ్వర్యంలో, అంతర్జాతీయ ఐఎల్‌సీఏ మరియు యాచింగ్ అసోసియేషన్ ఆఫ్ ఇండియా (YAI) సంయుక్త సహకారంతో నిర్వహించిన ఈ మెగా ఛాంపియన్‌షిప్‌లో దేశవిదేశాల నుంచి క్రీడాకారులు తరలివచ్చారు. సుమారు 19 ప్రతిష్టాత్మక సెయిలింగ్ క్లబ్‌లు, సంస్థలకు చెందిన 124 మంది మేటి క్రీడాకారులు తమ గమ్యాన్ని ముద్దాడేందుకు అలలపై విన్యాసాలు చేశారు. ఈ పోటీలలో 19 మంది మహిళలు మరియు బాలికలు పాల్గొని పురుషులకు సమానంగా తమ సత్తా చాటారు. సైన్యం (Army), నౌకాదళం (Navy), పౌర సెయిలింగ్ సంస్థల ప్రతినిధులతో పాటు విదేశీ క్రీడాకారులు సైతం ఈ పోటీల్లో భాగస్వామ్యం కావడం విశేషం.

విభిన్న విభాగాల్లో హోరాహోరీ పోరు : ఈ సుదీర్ఘ క్రీడా వారోత్సవాల్లో వేర్వేరు రకాల సాంకేతిక విభాగాలలో పోటీలు జరిగాయి:
ఐఎల్‌సీఏ–7 (ILCA-7)
ఐఎల్‌సీఏ–6 (ILCA-6 – పురుషులు, మహిళలు)
ఐఎల్‌సీఏ–4 (ILCA-4 – బాలురు, బాలికలు)

ప్రతి విభాగంలోనూ క్రీడాకారులు గాలి వీచే దిశలను లెక్కిస్తూ, అలలను అధిగమిస్తూ తమ బోట్లను శరవేగంతో నడిపించి హోరాహోరీగా తలపడ్డారు. ఈ అంతర్జాతీయ క్రీడా వేడుక విజయవంతంగా ముగియడంతో, హైదరాబాద్ నగరం ఈఎంఈఎస్‌ఏ (EMESA) దేశంలోనే అగ్రశ్రేణి సెయిలింగ్ కేంద్రాలుగా మరోసారి సగర్వంగా నిలిచాయి.