Rs 500 Crore Paddy Scam Investigation : రాష్ట్రంలో ధాన్యం సేకరణ, కస్టమ్ మిల్లింగ్ రైస్ (CMR) వ్యవహారంలో పిల్లి కళ్ళు మూసుకొని పాలు తాగినట్లుగా ఏకంగా వందల కోట్ల రూపాయల మేర ప్రజాధనం గోల్మాల్ అయిందన్న ఆరోపణలు తీవ్ర సంచలనం సృష్టిస్తున్నాయి. రైతుల చెమట చుక్కల విలువను నీరుగారుస్తూ, ప్రభుత్వ ఖజానాకు ఏకంగా రూ. 500 కోట్లకు పైగా గండి కొట్టిన అక్రమాల భాగోతం ఇప్పుడు రాజకీయ వర్గాల్లో దావానలంలా వ్యాపిస్తోంది.

ఈ బారీ కుంభకోణం వెనుక కొందరు కేటుగాళ్లు పక్కా ప్రణాళికతో వ్యవహరిస్తూ, కస్టమ్‌ మిల్లింగ్‌ ధాన్యాన్ని ప్రభుత్వానికి అప్పగించకుండా పక్కదారి పట్టించారన్న వాదనలు బలంగా వినిపిస్తున్నాయి. ఈ నేపథ్యంలోనే బిజెపి రాష్ట్ర అధ్యక్షుడు రామచందర్‌రావు నేరుగా ముఖ్యమంత్రికి బహిరంగ లేఖ రాయడం రాష్ట్రంలో తీవ్ర చర్చనీయాంశంగా మారింది. 

ముఖ్యమంత్రి దృష్టికి రామచందర్‌రావు తీసుకెళ్లిన అంశాల ప్రకారం… ప్రభుత్వం కొనుగోలు కేంద్రాల ద్వారా రైతుల నుంచి సేకరించిన కోట్లాది రూపాయల విలువైన ధాన్యాన్ని కస్టమ్‌ మిల్లింగ్‌ కోసం వివిధ రైస్‌ మిల్లులకు కేటాయించింది. అయితే, మిల్లింగ్ పూర్తయ్యాక నిబంధనల ప్రకారం తిరిగి సివిల్ సప్లైస్ కార్పొరేషన్ (ప్రభుత్వానికి) అందజేయాల్సిన బియ్యం నిల్వలు సరైన పరిమాణంలో భద్రతా గోదాములకు చేరలేదు. కొందరు మిల్లర్లు అధికారుల కన్నుకప్పి లేదా లోపభూయిష్ట వ్యవస్థను ఆసరాగా చేసుకొని ప్రభుత్వ ధాన్యాన్ని బహిరంగ మార్కెట్లో విక్రయించుకున్నారన్న బలమైన సమాచారం ఉంద ని రామచందర్‌రావు లేఖలో స్పష్టం చేశారు.

2023 నుంచి పెరిగిన ‘ఆడిట్ లోపాలు’: 2023 సంవత్సరం నుంచి మిల్లర్లకు అందజేసిన ధాన్యానికి, ప్రభుత్వానికి తిరిగి వచ్చిన బియ్యానికి మధ్య నక్కకు నాకలోకానికి ఉన్నంత వ్యత్యాసం కనిపిస్తోందని విమర్శలు వస్తున్నాయి.

తిరిగి రావాల్సిన కస్టమ్ మిల్లింగ్ రైస్ (CMR): నిర్దేశిత శాతంలో రాకపోవడంతో  ప్రాథమిక నివేదికల ప్రకారం సుమారు రూ. 500 కోట్ల విలువైన ధాన్యం తారతమ్యాలు నమోదయ్యాయి. మిల్లుల్లో నిర్వహించాల్సిన భౌతిక తనిఖీలు  కేవలం ‘కంటితుడుపు చర్యగా’ మారడం వల్లే ఈ అక్రమార్కులు నీటి మూటల సాకులు చెబుతూ పబ్బం గడుపుకున్నారని ఆరోపించారు.

ప్రభుత్వ ఖజానాపై ఆర్థిక భారం – ప్రజాధనం దుర్వినియోగం : ప్రజా పంపిణీ వ్యవస్థ (PDS) కోసం ఉద్దేశించిన ఉచిత/రాయితీ బియ్యం పేదలకు అందకుండా పోవడమే కాకుండా, పన్ను చెల్లింపుదారుల డబ్బుతో సేకరించిన ధాన్యాన్ని బొక్కేయడం వల్ల ప్రభుత్వ ఖజానాపై ఊహించని రీతిలో మోయలేని భారం పడింది. కాగితాల్లో బియ్యం వచ్చినట్లు చూపుతూ, క్షేత్రస్థాయిలో ధాన్యాన్ని మాయం చేసిన శక్తులపై కఠిన చర్యలు తీసుకోకపోతే చట్టం ముందు వ్యవస్థ పరువు పోతుందని రామచందర్‌రావు హెచ్చరించారు.

పారదర్శక, వేగవంతమైన దర్యాప్తునకు డిమాండ్ : ఈ అక్రమాల శృంఖలాన్ని ఛేదించాలంటే ఉన్నతస్థాయి స్వతంత్ర దర్యాప్తు సంస్థతో లేదా ప్రత్యేక విచారణ బృందం (SIT) ద్వారా వేగవంతమైన పరిశీలన జరిపించాలని లేఖలో కోరారు. నిందితులు ఎంతటి వారైనా, అధికారులతో చేతులు కలిపి ప్రజాధనాన్ని కొల్లగొట్టిన వారిపై క్రిమినల్ కేసులు నమోదు చేసి, వారి ఆస్తులను జప్తు చేయాలని బిజెపి డిమాండ్ చేస్తోంది.