హైదరాబాద్ ( తెలుగు ప్రభ ) : భారతావని స్వాతంత్ర్య సంబరాల్లో మునిగితేలుతున్న వేళ… దేశ ఆర్థిక రంగానికి వెన్నెముకగా నిలిచిన స్టేట్ బ్యాంక్ ఆఫ్ ఇండియా (SBI) నవశకానికి సరికొత్త బాటలు వేస్తోంది. దేశభక్తి కేవలం వేడుకలకే పరిమితం కాకుండా, ఆధునిక సాంకేతికతను ఒడిసిపట్టుకుంటూ కోట్ల మంది భారతీయుల ఆకాంక్షలకు అనుగుణంగా బ్యాంకింగ్ సేవలను తీర్చిదిద్దడమే నిజమైన దేశసేవ అని చాటుతోంది.
ఘనంగా త్రివర్ణ పతాకావిష్కరణ : హైదరాబాద్లోని కోటిలో ఉన్న ఎస్బీఐ స్థానిక ప్రధాన కార్యాలయంలో స్వాతంత్ర్య దినోత్సవ వేడుకలు అంబరాన్నంటాయి. హైదరాబాద్ సర్కిల్ చీఫ్ జనరల్ మేనేజర్ (CGM) శ్రీ నీలేష్ ద్వివేది జాతీయ పతాకాన్ని ఆవిష్కరించి, గౌరవ వందనం సమర్పించారు. అనంతరం సిబ్బందితో కలిసి జాతీయ గీతాన్ని ఆలపించారు. ఈ సందర్భంగా ఆయన మాట్లాడుతూ, మువ్వన్నెల జెండా దేశపు ఘనమైన సాంస్కృతిక వారసత్వానికి, అసంఖ్యాక సమరయోధుల త్యాగాలకు మరియు కోట్ల మంది ప్రజల ఆశయాలకు సజీవ ప్రతిరూపమని కొనియాడారు.
సాంకేతికతే చోదకశక్తి: ‘యోనో’, ‘ఏఐ’తో నవ శకం : స్వాతంత్ర్యం అనేది మరింత బాధ్యతాయుతమైన కర్తవ్యాన్ని గుర్తుచేస్తుందని సీజీఎం నీలేష్ ద్వివేది ఉద్ఘాటించారు. దేశ సర్వతోముఖాభివృద్ధితో ఎస్బీఐ ప్రస్థానం విడదీయరానిదని పేర్కొంటూ, మారుతున్న వినియోగదారుల అవసరాలకు అనుగుణంగా సంస్థ శరవేగంగా రూపాంతరం చెందుతోందన్నారు.
‘యోనో’ (YONO) యాప్ అత్యాధునిక ఆర్టిఫిషియల్ ఇంటెలిజెన్స్ (AI) సాంకేతికతలను వినియోగించుకుంటూ వినియోగదారులకు మెరుగైన సేవలందిస్తున్నామని తెలిపారు. సమర్థతను పెంచుకుంటూ, అంతర్జాతీయ మార్కెట్లలో పోటీని తట్టుకునేలా బ్యాంక్ నిరంతరం అధునాతన ప్రమాణాలను స్వీకరిస్తోందని వివరించారు.
ఆత్మపరిశీలన – సిబ్బందికి మార్గదర్శనం : తరతరాలుగా ఎస్బీఐపై ప్రజలు ఉంచిన అచంచలమైన నమ్మకాన్ని కాపాడుకోవాల్సిన గురుతర బాధ్యత ఉద్యోగులపై ఉందని సీజీఎం పిలుపునిచ్చారు. ప్రతి ఒక్కరూ తమ విధులను అంకితభావంతో నిర్వర్తిస్తూ, సంస్థను మరింత పటిష్ఠంగా, దేశ ప్రగతికి మరింత ఉపయోగపడేలా తీర్చిదిద్దుతామని ప్రతినబూనాలన్నారు.
కనువిందు చేసిన సాంస్కృతిక వేడుకలు : ఈ వేడుకల్లో ఉద్యోగులు, వారి కుటుంబ సభ్యుల భాగస్వామ్యం ప్రత్యేక ఆకర్షణగా నిలిచింది. చిన్నారులు ప్రదర్శించిన సంప్రదాయ, దేశభక్తి నృత్యాలు ఆహూతులను అలరించాయి. విధి నిర్వహణతో పాటు వివిధ రంగాల్లో విశేష ప్రతిభ కనబరిచిన ఉద్యోగులను, వారి పిల్లలను ఉన్నతాధికారులు సత్కరించి అభినందించారు. ఈ కార్యక్రమంలో ఎస్బీఐ లేడీస్ క్లబ్ అధ్యక్షురాలు శ్రీమతి రష్మి ద్వివేది, జనరల్ మేనేజర్లు శ్రీ సతీష్ కుమార్ (NW-2), శ్రీ రణ్విజయ్ ప్రతాప్ (NW-1)లతో పాటు పలువురు డిప్యూటీ జనరల్ మేనేజర్లు, సీనియర్ అధికారులు మరియు సిబ్బంది పెద్ద సంఖ్యలో పాల్గొన్నారు.