వనపర్తి ( తెలుగు ప్రభ ) : మువ్వన్నెల జెండా రెపరెపలాడుతున్న వేళ.. గంభీరమైన పోలీస్ వందనం.. కట్టుదిట్టమైన భద్రతా ఏర్పాట్లు.. వేలాది మంది ప్రజలు, ఉన్నతాధికారులతో కిటకిటలాడుతున్న వేడుకల ప్రాంగణం అది. ఖాకీ దుస్తులు ధరించిన వేళ బాధ్యత మాత్రమే గుర్తొస్తుందంటారు. కానీ, ఆ రక్షణ కవచం లోపల కొట్టుకునేది ఓ అమ్మ హృదయమని, కంటికి రెప్పలా కాపాడాల్సిన కన్నబిడ్డ భారమైనా విధి నిర్వహణలో వెనుకడుగు వేయనని నిరూపించారామె. వనపర్తి కలెక్టరేట్ ప్రాంగణంలో పంద్రాగస్టు వేడుకల వేళ ఆ మహిళా కానిస్టేబుల్ ప్రదర్శించిన కర్తవ్యనిష్ఠ అందరి దృష్టినీ ఆకర్షించింది.
పంద్రాగస్టు వేడుకల్లో అపురూప దృశ్యం : 79వ స్వాతంత్య్ర దినోత్సవాన్ని పురస్కరించుకుని వనపర్తి జిల్లా కలెక్టరేట్ కార్యాలయంలో ఘనంగా సంబరాలు నిర్వహించారు. ప్రజాప్రతినిధులు, జిల్లా ఉన్నతాధికారులు, విద్యార్థులు పెద్ద ఎత్తున తరలివచ్చిన ఈ వేడుకల ప్రాంగణంలో పోలీసు శాఖ పటిష్ట బందోబస్తు ఏర్పాటు చేసింది. ప్రస్తుతం వనపర్తి జిల్లా ‘భరోసా’ కేంద్రంలో విధులు నిర్వర్తిస్తున్న సదరు మహిళా కానిస్టేబుల్కు కలెక్టరేట్ వేడుకల భద్రతా విధులను అప్పగించారు.
ఒకవైపు కీలకమైన పండుగ దినాన ఇచ్చిన విధిని తు.చ. తప్పకుండా పాటించాల్సిన బాధ్యత.. మరోవైపు ఇంట్లో వదిలిపెట్టలేని చంటిబిడ్డ పరిస్థితి. ఈ రెండింటి నడుమ ఆమె కర్తవ్యానికే తొలి ప్రాధాన్యం ఇచ్చారు. చిన్నారిని గుండెలకు హత్తుకుని, మరోవైపు కనురెప్ప వాల్చకుండా భద్రతా విధులను నిర్వర్తించారు.
క్రమశిక్షణతో పాటు కరుణ: సమన్వయానికి అసలైన నిదర్శనం : సాధారణంగా బందోబస్తు విధులు అంటే అప్రమత్తత, క్రమశిక్షణ, నిరంతర నిఘా తప్పనిసరి. అలాంటి క్లిష్టమైన వాతావరణంలోనూ ఆమె ఎక్కడా విధులను విస్మరించలేదు. చిన్నారి బరువును సైతం లెక్కచేయకుండా గంటల తరబడి నిలబడి ఉన్నతాధికారుల ఆదేశాలను పాటించారు. అటు అమ్మతనాన్ని పంచుతూనే.. ఇటు రక్షకభట బాధ్యతలను సమర్థవంతంగా మోసారు. ‘చేసే పని పట్ల నిష్ఠ ఉంటే ఏ పరిస్థితులూ అడ్డంకి కావని’ ఆమె చేతల్లో నిరూపించారు.
సోషల్ మీడియాలో ప్రశంసల జడివాన: ‘శభాష్ పోలీసమ్మా!’ : విధి నిర్వహణలో ఆమె చూపిన అంకితభావానికి సంబంధించిన ఛాయాచిత్రాలు ప్రస్తుతం సామాజిక మాధ్యమాల్లో విపరీతంగా వైరల్ అవుతున్నాయి. నెటిజన్లు, స్థానిక అధికారులు ఆమె అంకితభావాన్ని వేనోళ్ల కొనియాడుతున్నారు.
“బాధ్యతాయుతమైన ఖాకీ దుస్తుల్లోనే మాతృత్వాన్ని గౌరవిస్తూ, విధికి న్యాయం చేసిన ఈ మహిళా కానిస్టేబుల్ ప్రతి ఒక్కరికీ స్ఫూర్తిదాయకం” అంటూ సర్వత్రా ప్రశంసలు వెల్లువెత్తుతున్నాయి. మహిళా సాధికారతకు, నేటి తరం మహిళలు ఎదుర్కొంటున్న సవాళ్లను అధిగమించే ధైర్యానికి ఈ దృశ్యం నిలువెత్తు సాక్ష్యంగా నిలిచింది. ఒక చేత్తో పసికందును లాలిస్తూ.. మరో చేత్తో సమాజ రక్షణ బాధ్యతను మోసిన ఈ పోలీసమ్మ నిజమైన ‘స్వాతంత్య్ర స్ఫూర్తి’ని చాటిచెప్పారు.