Medaram Jatara 2026 : తెలంగాణ కుంభమేళాగా పిలవబడే మేడారం మహాజాతరలో అత్యంత కీలకమైన ఘట్టం అట్టహాసంగా ఆవిష్కృతమైంది. చిలకల గుట్ట నుంచి సమ్మక్క తల్లి గద్దెపైకి కొలువుదీరడంతో వనదేవతల దర్శనం కోసం భక్తులు పోటెత్తారు. మేడారం పరిసరాలన్నీ ఆధ్యాత్మిక శోభతో, కోరిన కోర్కెలు తీర్చే దేవతల నామస్మరణతో మారుమోగుతున్నాయి.

గద్దెపై కొలువుదీరిన సమ్మక్క తల్లి

జాతరలో రెండో రోజు అత్యంత ప్రాధాన్యత కలిగిన సమ్మక్క ఆగమనం వైభవంగా జరిగింది. చిలకల గుట్ట వద్ద పూజారులు ప్రత్యేక పూజలు నిర్వహించిన తర్వాత తల్లిని గద్దెకు తీసుకువచ్చారు. సమ్మక్క తల్లి చిలకల గుట్ట నుంచి కిందకు దిగే సమయంలో ఆచారప్రకారం గౌరవ సూచకంగా జిల్లా ఎస్పీ గాలిలోకి కాల్పులు జరిపి వందనం సమర్పించారు. కోయ పూజారులు అమ్మవారి రూపమైన కుంకుమ భరిణెను కట్టుదిట్టమైన భద్రత మధ్య గద్దెలపైకి చేర్చారు. ఇప్పటికే గద్దెలపై ఉన్న సారలమ్మ, పగిడిద్దరాజు, గోవిందరాజులతో సమ్మక్క జతకలవడంతో జాతర పరిపూర్ణమైంది.

Rupee Recovers: రూపాయి ‘రుబాబు’.. డాలర్‌కు ‘జవాబు’! పాతాళం నుంచి కోలుకున్న దేశీయ కరెన్సీ

భక్తుల కోలాహలం – బెల్లం మొక్కులు

వనదేవతలకు భక్తులు తమ శక్తి మేరకు ‘బంగారం’ (బెల్లం) నైవేద్యంగా సమర్పిస్తున్నారు. తమ బరువుకు సమానమైన బెల్లాన్ని తూకం వేసి మొక్కులు చెల్లించుకుంటున్నారు. కేవలం తెలంగాణ నుంచే కాకుండా ఆంధ్రప్రదేశ్, ఛత్తీస్‌గఢ్, మహారాష్ట్ర వంటి పొరుగు రాష్ట్రాల నుంచి కూడా భక్తులు లక్షల సంఖ్యలో తరలివస్తున్నారు. జాతర పరిసరాల్లో సుమారు 8 కిలోమీటర్ల మేర భక్తుల క్యూ లైన్లు కనిపిస్తున్నాయి. కొందరు భక్తులు ఎదుర్కోళ్ళ ఆచారంలో భాగంగా అమ్మవారికి కోళ్లను సమర్పించి తమ భక్తిని చాటుకుంటున్నారు.

ప్రముఖుల దర్శనం

ఈ మహాజాతరను పలువురు రాజకీయ ప్రముఖులు సందర్శించారు. డిప్యూటీ సీఎం భట్టి విక్రమార్క దంపతులు సతీసమేతంగా వచ్చి అమ్మవార్లకు నిలువెత్తు బంగారం సమర్పించారు. రాష్ట్రం సుభిక్షంగా ఉండాలని వారు ఆకాంక్షించారు. అలాగే కేంద్ర మంత్రి కిషన్ రెడ్డి సారలమ్మను దర్శించుకుని, ఆదివాసీల అభివృద్ధికి కేంద్రం కట్టుబడి ఉందని పేర్కొన్నారు. జాతర ఏర్పాట్లపై ప్రభుత్వం చూపిస్తున్న చొరవను ఆయన అభినందించారు.

సమస్యలు , భద్రతా ఏర్పాట్లు

• కనెక్టివిటీ సమస్య: భక్తుల రద్దీ ఊహించని స్థాయిలో పెరగడంతో కొన్ని ఇబ్బందులు కూడా ఎదురవుతున్నాయి. మేడారంలో సెల్ ఫోన్ సిగ్నల్స్ సరిగా లేకపోవడంతో భక్తులు అవస్థలు పడుతున్నారు. దీనివల్ల డిజిటల్ లావాదేవీలు నిలిచిపోయి, నగదు కొరత ఏర్పడింది. ఏటీఎంలో కూడా నగదు అందుబాటులో లేకపోవడంతో వ్యాపారులు, భక్తులు ఇబ్బంది పడుతున్నారు.
• నిఘా: లక్షలాది మంది భక్తుల భద్రత కోసం పోలీస్ యంత్రాంగం కమాండ్ కంట్రోల్ రూమ్ ద్వారా సీసీ కెమెరాలను నిరంతరం పర్యవేక్షిస్తోంది.
• ట్రైనీ ఆఫీసర్లు: ఈసారి జాతరలో గ్రూప్-1 ట్రైనీ ఆఫీసర్లు ట్రాఫిక్ నియంత్రణ, భక్తుల రద్దీ పర్యవేక్షణలో చురుగ్గా పాల్గొంటూ అందరి దృష్టిని ఆకర్షిస్తున్నారు.

ఆర్టీసీ సేవలు , కోయ దొరల ప్రత్యేకం

భక్తుల ప్రయాణం కోసం టిజిఎస్ఆర్టిసి (TGSRTC) దాదాపు 4000 ప్రత్యేక బస్సులను నడుపుతోంది. ప్రయాణికులకు ఎక్కడా అసౌకర్యం కలగకుండా అధికారులు నిరంతరం పర్యవేక్షిస్తున్నారు. మరోవైపు, జాతరలో కోయ దొరలు ప్రత్యేక ఆకర్షణగా నిలుస్తున్నారు. వారు భక్తులకు జాతకాలు చెప్పడంతో పాటు, గాలి ధూళి సోకకుండా రక్షరేకులు కట్టడం, ఆయుర్వేద మూలికలు ఇవ్వడం వంటివి చేస్తున్నారు.

నేడు లక్షలాది మంది భక్తులు దేవతలను దర్శించుకోనున్నారు. రేపటితో ఈ మహాజాతర ముగియనుంది. రేపు సాయంత్రం దేవతలు తిరిగి వనప్రవేశం చేయడంతో మేడారం జాతర పరిసమాప్తం అవుతుంది.

Tirumala Update: మార్చి 3న శ్రీవారి ఆలయం మూసివేత.. కారణం ఇదే!