Telangana politics- BRS MLAs:తెలంగాణలో కాంగ్రెస్ పార్టీ అధికారంలోకి వచ్చిన తరువాత బీఆర్ఎస్ పార్టీ తరఫున అసెంబ్లీకి గెలిచిన పది మంది ఎమ్మెల్యేలు ప్రస్తుతం కాంగ్రెస్తో అనుబంధంగా కొనసాగుతున్న పరిస్థితి రాజకీయాల్లో చర్చనీయాంశంగా మారింది. ఈ నేపథ్యంలో ఆ ఎమ్మెల్యేలపై అనర్హత వేటు వేయాలని కోరుతూ బీఆర్ఎస్ పార్టీ సుప్రీంకోర్టును ఆశ్రయించింది. ఎన్నికలు జరిగి దాదాపు రెండున్నరేళ్లు కావస్తున్నప్పటికీ ఈ అంశంపై నిర్ణయం తీసుకోవడంలో ఆలస్యం జరుగుతోందని బీఆర్ఎస్ నాయకత్వం ఆరోపిస్తోంది.
అనర్హత పిటిషన్లపై కదలిక …
ఈ వ్యవహారంపై సుప్రీంకోర్టు జోక్యం చేసుకోవడంతో స్పీకర్ వద్ద ఉన్న అనర్హత పిటిషన్లపై కదలిక మొదలైంది. స్టేషన్ ఘన్పూర్ ఎమ్మెల్యే కడియం శ్రీహరిపై బీఆర్ఎస్ ఎమ్మెల్యే కేపీ వివేకానంద గౌడ్ దాఖలు చేసిన పిటిషన్ను స్పీకర్ గడ్డం ప్రసాద్కుమార్ విచారణకు స్వీకరించారు. ఈ పిటిషన్ విచారణ చేపట్టడం ద్వారా పది మంది ఎమ్మెల్యేలపై దాఖలైన అంశాలను స్పీకర్ పరిశీలించినట్టే అవుతుంది.
Also Read:https://teluguprabha.net/telangana/delhi-excise-policy-case-relief-for-kejriwal-sisodia-kavitha/
ఇప్పటికే ఎనిమిది మంది ఎమ్మెల్యేలపై వచ్చిన పిటిషన్లను స్పీకర్ గడ్డం ప్రసాద్కుమార్ పరిశీలించి ఇటీవల తిరస్కరించారు. ప్రస్తుతం దానం నాగేందర్, కడియం శ్రీహరి సంబంధిత పిటిషన్లపై విచారణ కొనసాగుతోంది. విచారణ జరుగుతున్న నేపథ్యంలో అసెంబ్లీ పరిసరాల్లో భద్రతా చర్యలు పెంచారు. పోలీసులు బందోబస్తు ఏర్పాటు చేసి ఆంక్షలు అమలు చేస్తున్నారు.
పార్టీ మారిన నేపథ్యంలో…
ఖైరతాబాద్ ఎమ్మెల్యే దానం నాగేందర్పై బీఆర్ఎస్ ఎమ్మెల్యే పాడి కౌశిక్ రెడ్డి, బీజేపీ ఎమ్మెల్యే మహేశ్వర్ రెడ్డి వేర్వేరుగా అనర్హత పిటిషన్లు దాఖలు చేశారు. దానం పార్టీ మారిన నేపథ్యంలో ఆయనపై అనర్హత విధించాలని కోరారు. ఈ పిటిషన్లపై స్పీకర్ ఛాంబర్లో ఇటీవల విచారణ జరిగింది.
విచారణకు దానం నాగేందర్ హాజరు కాలేదు. ఆయన తరఫు న్యాయవాదులను పిటిషనర్ల తరఫు న్యాయవాదులు ప్రశ్నించారు. కేసుకు సంబంధించిన ఆధారాలను సమర్పించే అఫిడవిట్లు దానం తరఫున దాఖలు కాలేదని సమాచారం. తదుపరి విచారణను స్పీకర్ మార్చి 2వ తేదీకి వాయిదా వేశారు.
కాంగ్రెస్ పార్టీ బీ ఫారంపై…
దానం నాగేందర్ 2024 ఎన్నికల్లో కాంగ్రెస్ పార్టీ బీ ఫారంపై సికింద్రాబాద్ లోక్సభ స్థానం నుంచి పోటీ చేసిన విషయం ఈ కేసులో ప్రస్తావనకు వచ్చింది. ఈ పరిణామాల నేపథ్యంలో ఆయనపై అనర్హత వేటు పడే అవకాశాలపై రాజకీయ వర్గాల్లో చర్చ సాగుతోంది.
కడియం శ్రీహరి విషయానికి వస్తే…
ఇక కడియం శ్రీహరి విషయానికి వస్తే ఆయనపై అనర్హతకు సరైన ఆధారాలు లేవని ఆయన తరఫు వాదనలు వినిపిస్తున్నాయి. ఆయన కుమార్తె కాంగ్రెస్ పార్టీ తరఫున వరంగల్ లోక్సభ స్థానం నుంచి పోటీ చేసి విజయం సాధించి ప్రస్తుతం లోక్సభలో సభ్యురాలిగా కొనసాగుతున్నారు. ఒకే కుటుంబానికి చెందిన వ్యక్తులు వేర్వేరు పార్టీల్లో ఉండటం అసాధారణం కాదని ఆయన వర్గం అభిప్రాయం వ్యక్తం చేస్తోంది.
ఈ నేపథ్యంలో కడియం శ్రీహరిపై అనర్హత నిర్ణయం ఎలా ఉంటుందన్న దానిపై రాజకీయంగా ఆసక్తి నెలకొంది. మొత్తం పది మంది ఎమ్మెల్యేల అంశం సుప్రీంకోర్టు సూచనలతో తిరిగి ప్రాధాన్యం పొందగా, స్పీకర్ తీసుకునే తుది నిర్ణయం రాష్ట్ర రాజకీయాల్లో ప్రభావం చూపే అవకాశం ఉంది.