TGPSSC job notifications monthly update : తెలంగాణలోని నిరుద్యోగులకు ఎట్టకేలకు ఒక తీపి కబురు అందింది. ఏళ్ల తరబడి నోటిఫికేషన్ల కోసం, వాయిదాల పర్వం ముగింపు కోసం కళ్లల్లో వత్తులు వేసుకుని ఎదురుచూస్తున్న అభ్యర్థుల నిరీక్షణకు తెరపడే సమయం ఆసన్నమైందా? అవుననే అంటున్నాయి తాజా పరిణామాలు. తెలంగాణ పబ్లిక్ సర్వీస్ కమిషన్ (టీజీపీఎస్సీ) చైర్మన్ బుర్రా వెంకటేశం ఉద్యోగార్థుల్లో నూతన ఉత్సాహాన్ని నింపేలా ఒక సంచలన ప్రకటన చేశారు. ఇక నుంచి ఏడాదికో, రెండేళ్లకో కాకుండా.. ప్రతి నెలా వరుసగా నోటిఫికేషన్లు జారీ చేయబోతున్నట్లు స్పష్టం చేశారు.
ప్రతి నెలా నోటిఫికేషన్ల జాతర : తెలంగాణ ప్రభుత్వ ఉద్యోగాల భర్తీ ప్రక్రియను మరింత వేగవంతం, పారదర్శకం చేసేలా టీజీపీఎస్సీ చైర్మన్ బుర్రా వెంకటేశం కీలక నిర్ణయాలు ప్రకటించారు. ఇకపై నిరుద్యోగులు నోటిఫికేషన్ల కోసం సుదీర్ఘకాలం వేచి చూడాల్సిన అవసరం లేకుండా.. ప్రతి నెలా నిరంతరాయంగా 2 నుంచి 3 ఉద్యోగ ప్రకటనలు విడుదల చేస్తామని ఆయన వెల్లడించారు. ఈ నిర్ణయం ద్వారా నియామకాల్లో జాప్యానికి పూర్తిగా చెక్ పెట్టవచ్చని కమిషన్ భావిస్తోంది.
రేపే మూడు కీలక నోటిఫికేషన్లు.. ఈ నెలలో మొత్తం 5 నుంచి 6 : ఈ క్రమంలోనే మంగళవారం (రేపు) ఒకేసారి 3 నూతన ఉద్యోగ నోటిఫికేషన్లను విడుదల చేయనున్నట్లు బుర్రా వెంకటేశం అధికారికంగా ప్రకటించారు. అంతేకాకుండా, ప్రస్తుత జూన్ నెలలో మొత్తంగా 5 నుంచి 6 నోటిఫికేషన్లు జారీ చేసేందుకు కమిషన్ కసరత్తు పూర్తి చేసిందని వెల్లడించారు. దీంతో ఉద్యోగార్థుల్లో ఒక్కసారిగా నూతన ఉత్తేజం నెలకొంది.
సింగిల్ డిజిట్ ఖాళీలపై ప్రత్యేక దృష్టి : వివిధ ప్రభుత్వ శాఖల్లో అతి తక్కువ ఖాళీలు ఉండిపోయిన పోస్టులను వేగంగా భర్తీ చేసేందుకు టీజీపీఎస్సీ ప్రత్యేక ప్రణాళికను సిద్ధం చేసింది. ఈ సందర్భంగా చైర్మన్ మాట్లాడుతూ.. ప్రస్తుతం దాదాపు 28 రకాల పోస్టులకు సంబంధించి కేవలం ఒక్కొక్క ఖాళీ చొప్పున మాత్రమే ఉన్నాయి. మరో 25 రకాల ఉద్యోగ కేటగిరీలలో 5 కంటే తక్కువ ఖాళీలు ఉన్నాయి. ఇలాంటి చిన్న చిన్న విభాగాల పోస్టుల భర్తీకి సాధారణంగా నియామక ప్రక్రియలు ఆలస్యమవుతుంటాయి. అయితే, వీటిని త్వరలోనే ప్రత్యేక డ్రైవ్స్ లేదా ఆన్లైన్ కంప్యూటర్ ఆధారిత పరీక్షల (CBT) ద్వారా అత్యంత వేగంగా భర్తీ చేయాలని కమిషన్ యోచిస్తోంది.
పారదర్శకత – సమయపాలనే లక్ష్యం : గతంలో పరీక్షల వాయిదాలు, ఫలితాల విడుదలలో తీవ్ర జాప్యం వంటి కారణాలతో నిరుద్యోగులు తీవ్ర మానసిక వేదనకు గురయ్యారు. ఈ సమస్యను సమూలంగా పరిష్కరిస్తూ, ఒక నిర్దిష్ట ‘జాబ్ క్యాలెండర్’ విధానాన్ని అమలు పరచడమే తమ ప్రథమ ప్రాధాన్యతని బుర్రా వెంకటేశం స్పష్టం చేశారు. యూపీఎస్సీ (UPSC) తరహాలోనే నిర్ణీత కాలవ్యవధిలోనే పరీక్షలు నిర్వహించి, ఫలితాలు వెల్లడించే నూతన సంస్కరణలను విజయవంతంగా ముందుకు తీసుకెళ్తున్నామని ఆయన పేర్కొన్నారు.