Uppal IPL Tickets Scam : క్రికెట్ అభిమానుల ఉత్సాహం ఉప్పొంగుతోంది. రేపు ఉప్పల్ రాజీవ్ గాంధీ అంతర్జాతీయ స్టేడియంలో సన్‌రైజర్స్ హైదరాబాద్ (SRH), రాయల్ ఛాలెంజర్స్ బెంగళూరు (RCB) మధ్య జరగనున్న హోరాహోరీ సమరం కోసం నగరమంతా ఆసక్తిగా ఎదురుచూస్తోంది. ఆన్‌లైన్‌లో టికెట్ల విక్రయం ప్రారంభమైనట్లు నోటిఫికేషన్ రావడమే తరువాయి.. లక్షలాది మంది అభిమానులు బుక్ చేసుకోవడానికి ప్రయత్నించారు. కానీ, అక్షరాలా 39 వేల టికెట్లు కేవలం కొద్ది నిమిషాల్లోనే కర్పూరంలా కరిగిపోయాయి. ‘సోల్డ్ అవుట్’ (Sold Out) బోర్డు చూసి సామాన్య అభిమానులు అవాక్కయ్యారు. అసలు ఆన్‌లైన్‌లో పారదర్శకంగా అమ్ముడవాల్సిన 39 వేల టికెట్లు కనురెప్ప కొట్టేలోపు ఎటు పోయాయి? చేతికి చిక్కినట్లే చిక్కి చేజారిన ఈ టికెట్లు బ్లాక్ మార్కెట్లోకి ఎలా వెళ్లాయి? ఈ వేల టికెట్ల దందా వెనుక ఉన్న అసలు చీకటి కోణం ఏమిటి?

టికెట్ల మాయాజాలం.. వెలుగులోకి బ్లాక్ దందా : ఉప్పల్ స్టేడియం సామర్థ్యం దాదాపు 39 వేలు. ఇంత పెద్ద సంఖ్యలో ఉన్న టికెట్లు క్షణాల్లో అయిపోవడం వెనుక ఉన్న సాంకేతిక లోపాలను, కొందరు కమీషన్ ఏజెంట్ల అత్యాశను పోలీసులు నిశితంగా గమనించారు. ఆన్‌లైన్ యాప్స్‌లో టికెట్లు బ్లాక్ చేసి, కృత్రిమ కొరతను సృష్టించి బయట మార్కెట్‌లో ఐదు నుంచి పది రెట్లు ఎక్కువ ధరకు విక్రయిస్తున్నట్లు రాచకొండ పోలీస్ కమిషనరేట్ పరిధిలోని మల్కాజిగిరి స్పెషల్ ఆపరేషన్స్ టీమ్ (SOT) పసిగట్టింది.

Also Read: https://teluguprabha.net/telangana/telangana-railway-development-ashwini-vaishnaw-kishan-reddy-meet/

రంగంలోకి మల్కాజిగిరి పోలీసులు.. డెకాయ్ ఆపరేషన్ : బ్లాక్ టికెట్ల దందాపై పక్కా సమాచారం అందుకున్న మల్కాజిగిరి పోలీసులు, తమ నిఘా నేత్రాన్ని పదునుపెట్టారు. సాధారణ క్రికెట్ అభిమానుల్లా మారువేషాల్లో వెళ్లి (డెకాయ్ ఆపరేషన్) బ్లాక్ మార్కెట్ ముఠాలను సంప్రదించారు. రూ.1,000 విలువ చేసే సాధారణ స్టాండ్ టికెట్‌ను రూ.5,000 నుంచి రూ.10,000 వరకు డిమాండ్ చేస్తున్న ముఠా సభ్యులను రెడ్ హ్యాండెడ్‌గా పట్టుకున్నారు.

10 కేసులు నమోదు.. కటకటాల వెనక్కి నిందితులు : ఈ దాడుల్లో భారీ సంఖ్యలో బ్లాక్ టికెట్లను, నగదును పోలీసులు స్వాధీనం చేసుకున్నారు. అక్రమంగా టికెట్లు విక్రయిస్తున్న వారిపై ఏకంగా 10 కేసులు నమోదు చేశారు. ఈ ముఠా వెనుక ఇంకా ఎవరెవరి హస్తం ఉందనే కోణంలో లోతైన విచారణ జరుపుతున్నారు. ఆన్‌లైన్ టికెటింగ్ ప్లాట్‌ఫామ్‌ల ప్రతినిధులతో కుమ్మక్కై బల్క్ బుకింగ్స్ చేశారా? లేక నకిలీ ఐడీలతో బాట్స్ (Bots) ఉపయోగించి క్షణాల్లో టికెట్లు కొల్లగొట్టారా? అన్న విషయాలపై సైబర్ క్రైమ్ పోలీసుల సహకారంతో దర్యాప్తు చేస్తున్నారు.

Also Read: https://teluguprabha.net/cinema-news/pawan-kalyan-claps-to-megastar-158-film/

అభిమానులకు పోలీసుల హెచ్చరిక : అభిమానులు ఎట్టి పరిస్థితుల్లోనూ బ్లాక్ మార్కెట్‌లో టికెట్లు కొనుగోలు చేసి మోసపోవద్దని పోలీసులు హెచ్చరిస్తున్నారు. బ్లాక్ మార్కెట్‌లో దొరికే వాటిలో నకిలీ (ఫేక్) క్యూఆర్ కోడ్ టికెట్లు కూడా ఉండే ప్రమాదం ఉందని, అనవసరంగా డబ్బులు పోగొట్టుకోవద్దని సూచించారు. బ్లాక్ మార్కెటింగ్ చేస్తూ ఎవరైనా పట్టుబడితే కఠిన చర్యలు తప్పవని రాచకొండ పోలీసులు స్పష్టం చేశారు.