Ice apples: వేసవి కాలం వచ్చిందంటే చాలు పల్లెటూళ్లలో తాటి చెట్ల నిండా ముంజలు కనువిందు చేస్తాయి. ఒకప్పుడు గ్రామాల్లో ఉచితంగానో లేదా అతి తక్కువ ధరకో దొరికే ఈ తాటిముంజలు.. ఇప్పుడు నగరాల్లో విలాసవంతమైన ఫలాల జాబితాలో చేరిపోయాయి. తాజాగా వీటి ధరలు ఆకాశాన్ని తాకుతున్నాయి.
క్విక్ కామర్స్ ప్లాట్ఫామ్స్లో ముంజల హవా: సాధారణంగా రోడ్డు పక్కన బండ్లపై కనిపించే తాటిముంజలు ఇప్పుడు జెప్టో(Zepto) వంటి ఆన్లైన్ డెలివరీ యాప్స్లోకి చేరాయి. అయితే అక్కడ వీటి ధరలు చూసి సామాన్యులు అవాక్కవుతున్నారు. పావు కేజీ ముంజలు ఏకంగా 94 రూపాయలకు విక్రయిస్తున్నారు. అంటే ఒక కిలో తాటిముంజల ధర 376 రూపాయలకు చేరుకుంది. నిత్యం మార్కెట్లో దొరికే ఆపిల్ పండ్ల ధర కంటే సీజనల్గా దొరికే తాటిముంజల ధర ఇప్పుడు రెట్టింపు ఉండటం గమనార్హం. అయినప్పటికీ వీటి రుచికి మరియు ఆరోగ్య గుణాలకు ఫిదా అయ్యే జనం ధరను లెక్కచేయకుండా కొనుగోలు చేస్తున్నారు.
ఆరోగ్యానికి అమృతం: ధర ఎక్కువగా ఉన్నప్పటికీ.. వేసవిలో తాటిముంజలు తినడం వల్ల కలిగే ప్రయోజనాలు అపారం. వీటిలో నీటి శాతం ఎక్కువగా ఉండటం వల్ల ఎండల నుంచి ఉపశమనం లభిస్తుంది. శరీరాన్ని హైడ్రేటెడ్గా ఉంచుతాయి. వీటిలో విటమిన్ ఏ, బీ-కాంప్లెక్స్ మరియు విటమిన్ సీ పుష్కలంగా ఉంటాయి. పొటాషియం, కాల్షియం, మెగ్నీషియం, ఐరన్, జింక్ వంటి శరీరానికి అవసరమైన ఖనిజాలు ఇందులో లభిస్తాయి. ఇందులో కొవ్వు పదార్థాలు అస్సలు ఉండవు. కాబట్టి బరువు తగ్గాలనుకునే వారికి ఇది ఉత్తమ ఆహారం. వీటిలో ఉండే ఫైటో కెమికల్స్ శరీరంలోని ఫ్రీ రాడికల్స్తో పోరాడి కణాల ఆరోగ్యాన్ని కాపాడతాయి. సీజన్ ఉన్నప్పుడే దొరికే ఈ సహజ సిద్ధమైన ఫలాన్ని తిని వేసవి తాపం నుండి మనల్ని మనం కాపాడుకోవచ్చని వైద్యులు సూచిస్తున్నారు.