Zaid Khan Medchal ISI terror link arrest : హైదరాబాద్ శివార్లలోని మేడ్చల్ ప్రాంతంలో వెలుగుచూసిన ఉగ్రవాద లింకుల వ్యవహారం రాష్ట్రవ్యాప్తంగా తీవ్ర సంచలనం సృష్టిస్తోంది. ఉపాధి కోసం ఉత్తరప్రదేశ్ నుంచి నగరానికి వచ్చిన ఓ సాధారణ హోటల్ కార్మికుడు.. ఏకంగా పాకిస్థాన్కు చెందిన ఇంటర్-సర్వీసెస్ ఇంటెలిజెన్స్ (ISI) ముఠాతో సంబంధాలు నెరపడం భద్రతా వర్గాలను విస్మయానికి గురిచేసింది.
బొమ్మ తుపాకుల నుంచి ఉగ్రవాద వలలోకి : ఉత్తరప్రదేశ్లోని ఘజియాబాద్కు చెందిన 23 ఏళ్ల జయీద్ ఖాన్, ఈ ఏడాది ఫిబ్రవరిలో ఉపాధి వెతుక్కుంటూ హైదరాబాద్కు వలస వచ్చాడు. మేడ్చల్లోని ముబారక్ రెస్టారెంట్లో సర్వర్గా పనిలో చేరాడు. అయితే, అతడికి సోషల్ మీడియా పిచ్చి తీవ్రంగా ఉండేది. ఖాళీ సమయాల్లో నకిలీ (బొమ్మ) తుపాకులు చేతబట్టి, దేశ వ్యతిరేక కార్యకలాపాలను ప్రోత్సహించే తరహాలో ఇన్స్టాగ్రామ్లో రీల్స్ చేసి పోస్ట్ చేసేవాడు. ఈ రీల్స్కు ఆన్లైన్లో విశేష స్పందన రావడంతో, మరింత రెచ్చిపోయి అలాంటి విద్వేషపూరిత వీడియోలనే అప్లోడ్ చేయడం ప్రారంభించాడు.
Also Read: https://teluguprabha.net/national-news/highest-temperature-in-delhi-thermal-cameras-record-64-degrees/
పాక్ ఏజెంట్ల ఎంట్రీ – మంతనాలు : అతడి ఉన్మాదపూరితమైన వీడియోలను నిశితంగా గమనించిన పాకిస్థాన్ ఐఎస్ఐ సానుభూతిపరులు హబీబ్, రాణా హుస్సేన్లు అతడిని తమ వలలో వేసుకున్నారు. పాక్ ఐఎస్ఐలో కీలక సభ్యుడైన షహబాద్తో సంబంధాలున్న ఈ ఇద్దరూ.. ముందుగా జయీద్ వీడియోలకు లైకులు కొడుతూ, కామెంట్లు పెడుతూ మెల్లగా దగ్గరయ్యారు. ఆ తర్వాత ఇన్స్టాగ్రామ్ ద్వారా పరిచయం పెంచుకుని, చాటింగ్ మొదలుపెట్టారు. తమ సంస్థలో చేరితే అసలైన ఆయుధాలు సరఫరా చేస్తామని, ఉగ్ర దాడుల్లో శిక్షణ ఇప్పిస్తామని ఆశచూపారు. మాయమాటలతో రెచ్చగొట్టేసరికి జయీద్ వారికి పూర్తిగా బానిసయ్యాడు. తాను పాకిస్థాన్ వచ్చేందుకు కూడా సిద్ధమేనని, వెంటనే ఆయుధాలు పంపాలని చాటింగ్లో కోరినట్లు పోలీసుల ప్రాథమిక విచారణలో బహిర్గతమైంది.
నిఘా సంస్థల పరిశీలన – పక్కా స్కెచ్తో అరెస్ట్ : “కంచే చేను మేసినట్లు” అన్న చందంగా, మన దేశంలోనే ఉంటూ దేశ భద్రతకే ముప్పుగా పరిణమిస్తున్న జయీద్ ఖాన్ కార్యకలాపాలపై కేంద్ర కౌంటర్ ఇంటెలిజెన్స్ సంస్థల దృష్టి పడింది. పాకిస్థాన్ నుంచి అతడికి వస్తున్న ఐపీ అడ్రస్లు, ఆదేశాలను పసిగట్టిన నిఘా వర్గాలు వెంటనే మేడ్చల్ పోలీసులను అప్రమత్తం చేశాయి. దీంతో రంగంలోకి దిగిన పోలీసులు, పక్కా సమాచారంతో ముబారక్ హోటల్పై దాడి చేసి జయీద్ ఖాన్ను అదుపులోకి తీసుకున్నారు.
Also Read: https://teluguprabha.net/telangana/16th-finance-commission-funds-telangana-rural-development/
దర్యాప్తులో విస్తుపోయే నిజాలు : పోలీసులు అతడిని అదుపులోకి తీసుకుని తమదైన శైలిలో కూపీ లాగగా పలు కీలక విషయాలు వెలుగులోకి వచ్చాయి. అతడి గదిలోంచి రెండు నకిలీ (డమ్మీ) తుపాకులను, ఒక స్మార్ట్ ఫోన్ను పోలీసులు స్వాధీనం చేసుకున్నారు. ఆ ఫోన్ను లోతుగా పరిశీలించగా.. అందులో ఐఎస్ఐ ఏజెంట్లతో జరిపిన వాట్సాప్ చాటింగ్లు, వాయిస్ కాల్ రికార్డులు, స్కీన్షాట్లు లభ్యమయ్యాయి. అంతేకాకుండా, దేశంలోని కొందరు వీవీఐపీలు (VVIPs), కీలక ప్రాంతాలకు సంబంధించిన భద్రతా సమాచారాన్ని అతడు పాక్ ముఠాకు చేరవేసినట్లు పోలీసులు గుర్తించారు. ఈ మేరకే దేశ వ్యతిరేక కార్యకలాపాలకు పాల్పడినట్లు జయీద్ ఖాన్ అంగీకరించినట్లు సమాచారం. ప్రస్తుతం నిందితుడిని న్యాయమూర్తి ముందు హాజరుపరచగా, కోర్టు 14 రోజుల జ్యుడీషియల్ రిమాండ్ విధించింది. దీంతో పోలీసులు అతడిని చర్లపల్లి జైలుకు తరలించారు. ఈ ఉగ్ర నెట్వర్క్ మూలాలను లాగేందుకు విచారణాధికారులు ఫోరెన్సిక్ ల్యాబ్ (FSL) నివేదిక ఆధారంగా లోతైన దర్యాప్తును ముమ్మరం చేశారు.