FIFA World Cup: ఫిఫా ప్రపంచకప్‌లో టైటిల్ ఫేవరెట్ అయిన అర్జెంటీనా బోణీ కొట్టింది. కెప్టెన్ లియోనెల్ మెస్సి అద్భుతమైన హ్యాట్రిక్ గోల్స్‌తో చెలరేగడంతో.. అర్జెంటీనా 3-0 తేడాతో అల్జీరియాను చిత్తు చేసింది. ప్రపంచకప్ చరిత్రలో మెస్సికి ఇదే తొలి హ్యాట్రిక్ కావడం విశేషం.

ఆట తొలి నిమిషం నుంచే మెస్సి హవా!: ఆట ప్రారంభమైన కాసేపటికే అర్జెంటీనా మ్యాచ్‌పై పట్టు సాధించింది. స్టార్ స్ట్రైకర్ మెస్సి తన అద్భుతమైన ఆటతీరుతో 17వ నిమిషంలో తొలి గోల్‌ సాధించాడు. దీంతో అర్జెంటీనా 1-0 ఆధిక్యంలో నిలిచింది. అయితే ఆట తొలిభాగం ముగిసే సరికి అల్జీరియా ఎలాంటి గోల్‌ చేయకపోవడంతో.. ఫస్టాఫ్‌లో అర్జెంటీనా ఒక గోల్ ఆధిక్యంతో నిలిచింది.

సెకండాఫ్‌లో మెస్సి విధ్వంసం: రెండో అర్ధభాగంలో మెస్సి మరింత దాటిగా ఆడాడు. దీంతో ఆట 60వ నిమిషంలో రెండో గోల్ సాధించాడు. ఆ తరువాత అర్జెంటీనా పూర్తి ఆధిపత్యం సాధించింది. మెస్సి తనదైన దూకుడుతో 76వ నిమిషంలో మూడో గోల్ కొట్టి హ్యాట్రిక్ పూర్తి చేశాడు. దీంతో స్టేడియం మెస్సి నామస్మరణతో మారుమోగింది. ప్రేక్షకులందరూ లేచి స్టాండింగ్ ఒవేషన్ ఇచ్చారు.

Also read-TG20 League: తెలంగాణ యువ క్రికెటర్ల కోసం టీజీ20 లీగ్‌.. బ్రాండ్ అంబాసిడర్‌గా విజయ్‌ దేవరకొండ

మెస్సికి ఇదే తొలి హ్యాట్రిక్: ఈ మ్యాచ్‌లో హ్యాట్రిక్‌ సాధించడం ద్వారా మెస్సి ప్రపంచకప్ చరిత్రలో పలు అరుదైన రికార్డులను తన పేరిట లిఖించుకున్నాడు. ఐదు వేర్వేరు ప్రపంచ కప్‌లలో గోల్స్ చేసిన రెండో ఆటగాడిగా మెస్సి సరికొత్త చరిత్ర సృష్టించాడు. ఇంతకుముందు పోర్చుగల్ స్టార్ క్రిస్టియానో రొనాల్డో మాత్రమే ఈ ఘనత సాధించగా.. ఇప్పుడు మెస్సి అతని సరసన చేరాడు. ప్రపంచకప్‌లలో మెస్సి చేసిన మొత్తం గోల్స్ సంఖ్య 16కు చేరింది. దీంతో జర్మనీ దిగ్గజ ఆటగాడు మిరాస్లోవ్ క్లోస్ పేరిట ఉన్న అత్యధిక గోల్స్ రికార్డును మెస్సి సమం చేశాడు.