WT20 World Cup: మహిళల టీ20 ప్రపంచకప్‌లో ఆస్ట్రేలియా జట్టు మరోసారి తన విశ్వరూపాన్ని ప్రదర్శించింది. ఆదివారం జరిగిన ఏకపక్ష ఫైనల్‌ పోరులో ఇంగ్లాండ్‌ను చిత్తు చేసి, ఏడోసారి ప్రపంచకప్‌ను కైవసం చేసుకుంది. స్థిరత్వానికి మారుపేరైన కంగారూ జట్టు.. అనిశ్చితికి కేరాఫ్ అడ్రస్ అయిన టీ20 ఫార్మాట్‌లోనూ తమకు తిరుగులేదని నిరూపించింది. ఐదుసార్లు ఫైనల్‌కు చేరిన ఇంగ్లాండ్ జట్టు, అందులో నాలుగు సార్లు ఆసీస్ చేతిలోనే పరాజయం పాలై రన్నరప్‌గా నిలవడం గమనార్హం.

ఆసీస్ బౌలర్ల కట్టడి: టాస్ ఓడి మొదట బ్యాటింగ్‌కు దిగిన ఇంగ్లాండ్‌కు ఆరంభంలోనే గట్టి షాక్‌లు తగిలాయి. ఓపెనర్లు అమీ జోన్స్ (6), డానీ వ్యాట్ (8) తీవ్రంగా నిరాశపరిచారు. ఆ తర్వాత అలీస్ క్యాప్సీ (23) కాసేపు ప్రతిఘటించినా.. కెప్టెన్ హెదర్ నైట్ (2) కూడా త్వరగానే అవుట్ కావడంతో ఇంగ్లాండ్ 10.5 ఓవర్లలో 70 పరుగులకే 4 వికెట్లు కోల్పోయి కష్టాల్లో పడింది. ఈ దశలో సీవర్ (53 బంతుల్లో 58 నాటౌట్; 5 ఫోర్లు), ఫ్రేయా కెంప్ (28 బంతుల్లో 44 నాటౌట్; 4 ఫోర్లు, 1 సిక్స్) అద్భుత పోరాటాన్ని కనబరిచారు. ఆసీస్ బౌలర్లను ఎదుర్కొంటూ వీరిద్దరూ ఇన్నింగ్స్‌ను చక్కదిద్దడమే కాకుండా స్కోరు బోర్డును పరుగులు పెట్టించారు. దీంతో ఇంగ్లాండ్ నిర్ణీత 20 ఓవర్లలో 4 వికెట్ల నష్టానికి 150 పరుగులు చేయగలిగింది. ఆసీస్ బౌలర్లలో కిమ్ గార్త్, లూసీ, మోలనూ, అనాబెల్ సదర్లాండ్ తలా ఒక వికెట్ తీశారు.

ఏకపక్షంగా సాగిన ఛేదన: 151 పరుగుల లక్ష్యంతో బరిలోకి దిగిన ఆస్ట్రేలియాకు కూడా ఆరంభంలోనే ఓపెనర్ జార్జియా వోల్ (9) రూపంలో ఎదురుదెబ్బ తగిలింది. లారెన్ బెల్ ఆమెను బౌల్డ్ చేసింది. అయితే ఆ తర్వాత వచ్చిన ఫోబి లిచ్‌ఫీల్డ్‌తో కలిసి ఓపెనర్ బెత్ మూనీ ఇంగ్లాండ్ బౌలర్లపై విరుచుకుపడింది. బెల్ వేసిన నాలుగో ఓవర్లో మూనీ మూడు ఫోర్లు బాదగా.. డీన్ వేసిన తర్వాతి ఓవర్లో లిచ్‌ఫీల్డ్ ఒక ఫోర్, ఒక సిక్సర్‌తో చెలరేగింది. వీరిద్దరి ధాటికి ఆసీస్ 10 ఓవర్లలోనే 98/1 స్కోరుతో విజయం వైపు దూసుకెళ్లింది. అర్ధసెంచరీకి చేరువైన తరుణంలో లిచ్‌ఫీల్డ్ (35 బంతుల్లో 48; 6 ఫోర్లు, 2 సిక్సర్లు) అవుటైనా.. మూనీ మాత్రం 38 బంతుల్లో హాఫ్ సెంచరీ పూర్తి చేసుకుంది. ఆ తర్వాత మరింత వేగంగా ఆడుతూ కెంప్ బౌలింగ్‌లో వరుసగా మూడు బౌండరీలు బాది మ్యాచ్‌ను ఆసీస్ వైపు తిప్పేసింది.

ఆసీస్ ఖాతాలో ఏడో ప్రపంచకప్: విజయానికి మరికొద్ది పరుగుల దూరంలో మూనీ (49 బంతుల్లో 64; 10 ఫోర్లు) అవుటైనప్పటికీ.. ఎలీస్ పెర్రీ (13 నాటౌట్), ఆష్లీ గార్డ్‌నర్ (3 నాటౌట్)లు మిగిలిన పనిని పూర్తి చేశారు. 18 బంతుల్లో 5 పరుగులు కావాల్సిన దశలో, ఎకిల్‌స్టోన్ వేసిన ఓవర్లో గార్డ్‌నర్ రెండు పరుగులు తీయగా, ఆ తర్వాతి బంతి వైడ్‌గా వెళ్లడమే కాకుండా బౌండరీ లైన్ దాటడంతో ఆస్ట్రేలియా 17.1 ఓవర్లలోనే 3 వికెట్లు కోల్పోయి 7 వికెట్ల తేడాతో ఘనవిజయం సాధించింది. ఫైనల్లో మ్యాచ్ విన్నింగ్ ఇన్నింగ్స్ ఆడటమే కాకుండా.. టోర్నమెంట్‌ పొడవునా 238 పరుగులతో అత్యుత్తమ ప్రదర్శన చేసిన బెత్ మూనీకి ‘ప్లేయర్ ఆఫ్ ద మ్యాచ్’తో పాటు ‘ప్లేయర్ ఆఫ్ ద సిరీస్’ అవార్డులు దక్కాయి.