Chandrababu Naidu: ఆంధ్రప్రదేశ్ ముఖ్యమంత్రి, టీడీపీ అధ్యక్షుడు చంద్రబాబు నాయుడు సెప్టెంబర్ 17న వారణాసిలో జరిగే సేవా సంకల్ప్ అభియాన్ కార్యక్రమంలో పాల్గొననున్నారు. ప్రధాని నరేంద్ర మోదీ 76వ పుట్టినరోజు సందర్భంగా ఈ కార్యక్రమాన్ని నిర్వహిస్తున్నారు. ఎన్డీయే కూటమిలో టీడీపీ భాగస్వామిగా ఉండటంతో చంద్రబాబు పర్యటనకు ప్రాధాన్యం ఏర్పడింది. కార్యక్రమంతో పాటు ఆయన కాశీ విశ్వనాథ ఆలయాన్ని కూడా సందర్శించనున్నారు.

ఏపీ ప్రభుత్వ వర్గాల సమాచారం ప్రకారం చంద్రబాబు సెప్టెంబర్ 17న ఉదయం 10.05 గంటలకు ప్రత్యేక విమానంలో వారణాసికి బయలుదేరుతారు. మధ్యాహ్నం ఒంటి గంట సమయంలో రుద్రాక్ష ఇంటర్నేషనల్ కన్వెన్షన్ సెంటర్‌లో జరిగే సేవా సంకల్ప్ అభియాన్ కార్యక్రమానికి హాజరవుతారు. అనంతరం కాశీ విశ్వనాథ ఆలయానికి వెళ్లి, అక్కడి నుంచి విజయవాడకు తిరిగి రానున్నారు.

25 సంవత్సరాలు పూర్తి చేసుకున్న…

ప్రధాని మోదీ ప్రజా జీవితంలో 25 సంవత్సరాలు పూర్తి చేసుకున్న సందర్భంగా బీజేపీ సెప్టెంబర్ 17 నుంచి అక్టోబర్ 17 వరకు సేవా సంకల్ప్ అభియాన్ నిర్వహిస్తోంది. దేశవ్యాప్తంగా సేవా కార్యక్రమాలు, సంక్షేమ పథకాలపై అవగాహన కల్పించే కార్యక్రమాలు, లబ్ధిదారులను చేరుకునే కార్యక్రమాలు, యువతకు సంబంధించిన కార్యక్రమాలు, పారిశుద్ధ్య కార్యక్రమాలు నిర్వహించనున్నారు.

మోదీ 2001లో గుజరాత్ ముఖ్యమంత్రిగా బాధ్యతలు చేపట్టినప్పటి నుంచి ఆయన రాజకీయ ప్రస్థానాన్ని ఈ కార్యక్రమాల ద్వారా ప్రజలకు వివరించనున్నారు. ఆయన 2001 నుంచి 2014 వరకు గుజరాత్ ముఖ్యమంత్రిగా పనిచేశారు. 2014 నుంచి ప్రధానమంత్రిగా కొనసాగుతున్న ఆయన ప్రస్తుతం మూడోసారి ఈ పదవిలో ఉన్నారు.

మోదీ జన్మస్థలమైన గుజరాత్‌లోని వడనగర్, ఆయన లోక్‌సభ నియోజకవర్గమైన వారణాసిని అనుసంధానిస్తూ బైక్ యాత్రలు నిర్వహించేందుకు బీజేపీ ప్రణాళిక రూపొందించింది. వారణాసి నుంచి వడనగర్‌కు వెళ్లే సేవా సంకల్ప్ బైక్ యాత్రను రక్షణ మంత్రి రాజ్‌నాథ్ సింగ్, ఉత్తరప్రదేశ్ ముఖ్యమంత్రి యోగి ఆదిత్యనాథ్ ప్రారంభించనున్నట్లు వార్తా నివేదికలు తెలిపాయి.

అదే సమయంలో ఆశీర్వాద్ కా దియా కార్యక్రమం ద్వారా ప్రజల ఇళ్లలో దీపాలు వెలిగించే కార్యక్రమాలను నిర్వహించాలని బీజేపీ పిలుపునిచ్చింది. దేశవ్యాప్తంగా సేవా కార్యక్రమాలు, సంక్షేమ పథకాల ప్రచారం, పారిశుద్ధ్య కార్యక్రమాలు చేపట్టనున్నట్లు పార్టీ ప్రకటించింది.

Also Read:Bigg Boss Telugu: రాం ప్రసాద్‌ని ఎత్తి అవతల పారేసిన రోహిత్..హద్దులు దాటిన టాస్కులు